Mahabharata · Chapter 9.14

duryodhano mahārāja dhṛṣṭadyumnaśca pārṣataḥ /
cakratuḥ sumahadyuddhaṃ śaraśaktisamākulam //

tato rājansamāpetuḥ śaradhārāḥ sahasraśaḥ /
ambudānāṃ yathā kāle jaladhārāḥ samantataḥ //

rājā ca pārṣataṃ viddhvā śaraiḥ pañcabhirāśugaiḥ /
droṇahantāramugreṣuṃ punarvivyādha saptabhiḥ //

dhṛṣṭadyumnastu samare balavāndṛḍhavikramaḥ /
saptatyā viśikhānāṃ vai duryodhanamapīḍayat //

pīḍitaṃ vīkṣya rājānaṃ sodaryā bharatarṣabha /
mahatyā senayā sārdhaṃ parivavruḥ sma pārṣatam //

sa taiḥ parivṛtaḥ śūraḥ sarvato'tirathai rbhṛśam /
vyacaratsamare rājandarśayannastralāghavam //

śikhaṇḍī kṛtavarmāṇaṃ gautamaṃ ca mahāratham //
prabhadrakaiḥ samāyukto yodhayāmāsa dhanvinau //

tatrāpi sumahadyuddhaṃ ghorarūpaṃ viśāmpate /
prāṇānsantajatāṃ yuddhe prāṇadyūtābhidevane //

śalyaḥ sāyakavarṣāṇi vimuñjansarvatodiśam /
pāṇḍavānpīḍayāmāsa sasātyakivṛkodarān //

tathā tau tu yamau yamatulyaparākramau /
yodhayāmāsa rājendra vīryeṇāstrabalena ca //

śalyasāyakanunnānāṃ pāṇḍavānāṃ mahāmṛdhe /
trātāraṃ nādhyagacchanta kecittatra mahārathāḥ //

tatastu nakulaḥ śūro dharmarāje prapīḍite /
abhidudrāva vegena mātulaṃ mādrinandanaḥ //

sañchādya samare vīraṃ nakulaḥ paravīrahā /
vivyādha cainaṃ daśabhiḥ smayamānaḥ stanāntare //

sarvapārasavairbāṇaiḥ karmāraparimārjitaiḥ /
svarṇapuṅkhaiḥ śilādhautairdhanuryantrapracoditaiḥ //

śalyastu pīḍitastena svasrīyeṇa hi mātulaḥ /
nakulaṃ pīḍayāmāsa patribhirnataparvabhiḥ //

tato yudhiṣṭhiro rājā bhīmaseno'tha sātyakiḥ /
sahadevaśca mādreṇo madrarājamupādravan //

tānāpatata evāśu pūrayāṇānrathasvanaiḥ / diśaśca vidiśaścaiva kampayānāṃśca medinīm /
pratijagrāha samare senāpatiramitrajit //

yudhiṣṭhiraṃ tribhirviddhvā bhīmasenaṃ ca pañcabhiḥ /
sātyakiṃ ca śatenājau sahadevaṃ tribhiḥ śaraiḥ //

tatastu saśaraṃ cāpaṃ nakulasya mahātmanaḥ /
madreśvaraḥ kṣurapreṇa madhye ciccheda māriṣa //

tadapāsya dhanuśchinnaṃ tataḥ śalyasya sāyakaiḥ / athānyaddhanurādāya mādrīputro mahārathaḥ /
madrarājarathaṃ tūrṇaṃ pūrayāmāsa patribhiḥ //

yudhiṣṭhirastu madreśaṃ sahadevaśca māriṣa /
daśabhirdaśabhirbāṇairurasyenamavidhyatām //

bhīmasenastu taṃ ṣaṣṭyā sātyakirdaśabhiḥ śaraiḥ /
madrarājamabhidrutya jaghnatuḥ xxṅkapatribhiḥ //

madrarājastataḥ kruddhaḥ sātyakiṃ navabhiḥ śaraiḥ /
vivyādha bhūyaḥ saptatyā śarāṇāṃ nataparvaṇām //

athāsya saśaraṃ cāpaṃ muṣṭau ciccheda māriṣa /
hayāṃśca caturaḥ saṅkhye preṣayāmāsa mṛtyave //

virathaṃ sātyakiṃ kṛtvā madrarājo mahārathaḥ /
viśikhānāṃ śatenainamājaghāna samantataḥ //

mādrīputraṃ ca saṃrabdho bhīmasenaṃ ca pāṇḍavam /
yudhiṣṭhiraṃ ca kauravya vivyādha daśabhiḥ śaraiḥ //

tatrādbhutamapaśyāma madrarājasya pauruṣam /
yadenaṃ sahitāḥ pārthā nābhyavartanta saṃyuge //

athānyaṃ rathamāsthāya sātyakiḥ satyavikramaḥ / pīḍitānpāṇḍavāndṛṣṭvā madrarājavaśaṃ gatān /
abhidudrāva vegena madrāṇāmadhipaṃ balāt //

āpatantaṃ rathaṃ tasya śalyaḥ samitiśobhanaḥ /
pratyudyayau rathenaiva matto mattamiva dvipam //

sa sannipātastumulo babhūvādbhutadarśanaḥ / sātyakeścaiva śūrasya madrāṇāmadhipasya ca /
yādṛśo vai purā vṛttaḥ śambarāmararājayoḥ //

sātyakiḥ prekṣya samare madrarājamavasthitam /
vivyādha daśabhirbāṇaistiṣṭhatiṣṭheti cābravīt //

madrarājastu subhṛśaṃ viddhastena mahātmanā /
sātyakiṃ prativivyādha citrapuṅkhaiḥ śitaiḥ śaraiḥ //

tataḥ pārthā maheṣvāsāḥ sātvatā'bhisṛtaṃ nṛpam /
abhyavartanrathaistūrṇaṃ mātulaṃ vadhakāṅkṣayā //

tata āsītparāmardastumulaḥ śoṇitodakaḥ /
śūrāṇāṃ yudhyamānānāṃ siṃhānāmiva nardatām //

teṣāmāsīnmahārāja vyadhikṣepaḥ parasparam /
siṃhānāmāmiṣepsūnāṃ kūjatāmiva saṃyuge //

teṣāṃ bāṇasahasraughairākīrṇā vasudhā'bhavat /
antarikṣaṃ ca sahasā bāṇabhūtamabhūttadā //

śarāndhakāraṃ sahasā kṛtaṃ tena samantataḥ /
abhracchāyeva sañjajñe śarairmuktairmahātmabhiḥ //

tatra rājañśarairmuktairnirmuktairiva pannaigaḥ /
svarṇapuṅkhaiḥ prakāśadbhirvyarocanta diśastadā //

tatrādbhutaṃ paraṃ cakre śalyaḥ śatrunibarhaṇaḥ /
yadekaḥ samare śūro yodhayāmāsa vai bahūn //

madrarājabhujotsṛṣṭaiḥ kaṅkabarhiṇavājitaiḥ /
sampatadbhiḥ śarairghorairavākīryata medinī //

tatra śalyarathaṃ rājanvicarantaṃ mahāhave /
apaśyāma yathāpūrvaṃ śakrasyāsurasankṣaye //