Mahabharata · Chapter 9.13

arjuno drauṇinā viddho yuddhe bahubhirāyasaiḥ /
tasya cānucaraiḥ śūraistrigartānāṃ mahārathaiḥ //

drauṇiṃ vivyādha samare tribhireva śilīmukhaiḥ / tathetarānmaheṣvāsāndvābhyāṃ dvābhyāṃ dhanañjayaḥ /
bhūyaścaiva mahārāja śaravarṣairavākirat //

śarakaṇṭakitāste tu tāvakā bharatarṣabha /
na jahuḥ pārthamāsādya tāḍyamānāḥ śitaiḥ śaraiḥ //

arjunaṃ rathavaṃśena droṇaputrapurogamāḥ /
parivārya mudā yuktā yodhayantaścakāśire //

taistu kṣiptāḥ śarā rājankārtasvaravibhūṣitāḥ /
arjunasya rathopasthaṃ pūrayāmāsurañjasā //

tathā kṛṣṇau maheṣvāsau vṛṣabhau sarvadhanvinām /
vivyadhuśca śarairghoraiḥ prahṛṣṭā yuddhadurmadāḥ //

kūbaraṃ rathacakrāṇi īṣā yoktrāṇi vā vibho /
yugaṃ caivānukarṣaṃ ca śarabhūtamabhūttadā //

naitādṛśaṃ dṛṣṭapūrvaṃ rājanneva ca naḥ śrutam /
yādṛśaṃ tatra pārthasya tāvakāḥ sampracakrire //

sa rathaḥ sarvato bhāti citrapuṅkhaiḥ śitaiḥ śaraiḥ /
ulkāśataiḥ sampradīptaṃ vimānamiva bhūtale //

tato'rjuno mahārāja śaraiḥ sannataparvabhiḥ /
avākirattāṃ pṛtanāṃ megho dhṛṣṭyeva parvatam //

te vadhyamānāḥ samare pārthanāmāṅkitaiḥ śaraiḥ /
pārthabhūtamamanyanta prekṣamāṇāstathāvidham //

kopoddhūtaśarajvālo dhanuḥśabdānilo mahān /
sainyendhanaṃ dadāhāśu tāvakaṃ pārthapāvakaḥ //

cakrāṇāṃ patatāṃ cāpi yugānāṃ ca dharātale /
tūṇīrāṇāṃ patākānāṃ dhvajānāṃ ca rathaiḥ saha //

īṣāṇāmanukarṣāṇāṃ triveṇūnāṃ ca bhārata /
akṣāṇāmatha yoktrāṇāṃ pratodānāṃ ca rāśayaḥ //

śirasāṃ patatāṃ cāpi kuṇḍaloṣṇīṣadhāriṇām /
bhujānāṃ ca mahābhāga skandhānāṃ ca samantataḥ //

chatrāṇāṃ vyajanaiḥ sārdhaṃ makuṭānāṃ ca rāśayaḥ /
samadṛśyanta pārthasya rathamārgeṣu bhārata //

agamyarūpā pṛthivī māṃsaśoṇitakardamā / bhīrūṇāṃ trāsajananī śūrāṇāṃ harṣavardhinī /
babhūva bharataśreṣṭha rudrasyākrīḍanaṃ yathā //

hatvā tu samare pārthaḥ sahasre dve parantapaḥ /
rathānāṃ savarūthānaṃ vidhūmo'gniriva jvalan //

yathā hi bhagavānagnirjagaddagdhvā carācaram /
vidhūmo dṛśyate rājaṃstathā pārtho dhaṉañjayaḥ //

drauṇistu samare dṛṣṭvā pāṇḍavasya parākramam /
rathenātipatākena pāṇḍavaṃ pratyavārayat //

tāvubhau puruṣavyāghrau śvetāśvau dhanvināṃ varau /
samīyatustadā'nyonyaṃ parasparavadhaiṣiṇau //

tayorāsīnmahārāja bāṇavarṣaṃ sudāruṇam /
jīmūtayoryathā vṛṣṭistapānte bharatarṣabha //

anyonyaspardhinau tau tu śaraiḥ sannataparvabhiḥ /
tatakṣatustadā'nyonyaṃ śṛṅgābhyāṃ vṛṣabhāviva //

tayoryuddhaṃ mahārāja ciraṃ samamivābhavat /
śastrāṇāṃ saṅgamaścaiva ghorastatrābhavatpunaḥ //

tato'rjunaṃ dvādaśabhī rukmapuṅkhaiḥ sutejanaiḥ /
vāsudevaṃ ca daśabhirdrauṇirvivyādha bhārata //

tataḥ prahasya bībhatsurvyākṣipadgāṇḍivaṃ dhanuḥ /
mānayitvā muhūrtaṃ tu guruputraṃ mahāhave //

vyaśvasūtarathaṃ cakre savyasācī parantapaḥ /
mṛdupūrvaṃ tataścainaṃ punaḥpunaratāḍayat //

hatāśve tu rathe tiṣṭhandroṇaputrastvayasmayam /
musalaṃ pāṇḍuputrāya cikṣepa parighopamam //

tamāpatantaṃ sahasā hemapaṭṭavibhūṣitam /
ciccheda saptadhā vīraḥ pārthaḥ śatrunibarhaṇaḥ //

sa cchinnaṃ musalaṃ dṛṣṭvā drauṇiḥ paramakopanaḥ / ādade parighaṃ ghoraṃ nagendraśikharopamam /
cikṣepa caiva pārthāya drauṇiryuddhaviśāradaḥ //

tamantakamiva kruddaṃ parighaṃ prekṣya pāṇḍavaḥ /
arjunastvarito jaghne pañcabhiḥ sāyakottamaiḥ //

sa cchinnaḥ patito bhūmau pārthabāṇairmahāhave /
dārayanpṛthivīndrāṇāṃ manaḥ sabdena bhārata //

tato'paraistribhirbhallairdrauṇiṃ vivyādha pāṇ़ḍavaḥ //

so'tividdho balavatā pārthena sumahātmanā /
nākampata tadā drauṇiḥ pauruṣeṣu vyavasthitaḥ //

surathaṃ ca tato rājanbhāradvājo mahāratham /
avākiraccharavrātaiḥ sarvakṣatrasya paśyataḥ //

tatastu suratho'pyājau pāñcālānāṃ mahārathaḥ /
rathena meghaghoṣeṇa drauṇimevābhyadhāvata //

vikarṣanvai dhanuḥśreṣṭhaṃ sarvabhārasahaṃ dṛḍham /
jvalanāśīviṣanibhaiḥ śaraiścainamavākirat //

surathaṃ taṃ tataḥ kruddhamāpatantaṃ mahāratham /
cukopa samare drauṇirdaṇḍāhata ivoragaḥ //

triśikhāṃ bhrukuṭīṃ kṛtvā sṛkviṇī parisaṃlihan / udvīkṣya surathaṃ roṣāddhanurjyāmavamṛjya ca /
mumoca tīkṣṇaṃ nārācaṃ yamadaṇḍopamadyutim //

sa tasya hṛdayaṃ bhittvā praviveśātivegitaḥ /
śaktāśanirivotsṛṣṭo vidārya dharaṇītalam //

tataḥ sa patito bhūmau nārācena samāhataḥ /
vajreṇa ca yathā śṛṅgaṃ parvatasyeva dīryataḥ //

tasminvinihate vīre droṇaputraḥ pratāpavān /
āruroha rathaṃ tūrṇaṃ tameva rathināṃ varaḥ //

tataḥ sajjo mahārāja drauṇirāhavadurmadaḥ /
arjunaṃ yodhayāmāsa saṃśaptakavṛto raṇe //

tatra yuddhaṃ mahaccāsīdarjunasya paraiḥ saha /
madhyandinagate sūrye yamarāṣṭravivardhanam //

tatrāścaryamapaśyāma dṛṣṭvā teṣāṃ parākramam /
yadeko yugapadvīrānsamayodhayadarjunaḥ //

vimardaḥ sumahānāsīdarjunasya paraiḥ saha /
śatakratoryathāpūrvaṃ mahatyā daityasenayā //