Mahabharata · Chapter 9.12

pīḍite dharmarāje tu madrarājena māriṣa / sātyakirbhīmasenaśca mādrīputrau ca pāṇḍavau /
parivārya rathaiḥ śalyaṃ pīḍayāmāsurāhave //

tamekaṃ bahubhirdṛṣṭvā pīḍyamānaṃ mahārathaiḥ /
sādhuvādo mahāñjajñe siddhāścāsanpraharṣitāḥ //

āścaryamityabhāṣanta munayaścāpi saṅgatāḥ //

bhīmaseno raṇe śalyaṃ śalyabhūtaṃ parākrame /
ekena viddhvā bāṇena punarvivyādha saptabhiḥ //

sātyakiśca śatenainaṃ dharmaputraparīpsayā /
madreśvaramavākīrya siṃhanādamathānadat //

nakulaḥ pañcabhiścainaṃ sahadevaśca pa़ñcabhiḥ /
viddhvā taṃ tu punastūrṇaṃ tato vivyādha saptabhiḥ //

sa tu śūro raṇe yattaḥ pīḍitastairmahārathaiḥ /
vikṛṣya kārmukaṃ ghoraṃ bhāraghnaṃ vegavattaram //

sātyakiṃ pañcaviṃśatyā śalyo vivyādha māriṣa /
bhīmasenaṃ tu saptatyā nakulaṃ saptabhistathā //

tataḥ sa viśikhaṃ cāpaṃ sahadevasya dhanvinaḥ /
chittvā bhallena samare vivyādhainaṃ trisaptabhiḥ //

sahadevastu samare mātulaṃ bhūrivarcasam / sajyamanyaddhanuḥ kṛtvā pañcabhiḥ samatāḍayat /
śarairāśīviṣākārairjvalajjvalanasannibhaiḥ //

sārathiṃ cāsya samare śareṇānataparvaṇā /
vivyādha bhṛśasaṅkruddhastaṃ vai bhūyastribhiḥ śaraiḥ //

bhīmasenastu saptatyā sātyakirnavabhiḥ śaraiḥ /
dharmarājastathā ṣaṣṭyā gātre śalyaṃ samārpayat //

tataḥ śalyo mahārāja nirviddhastairmahārathaiḥ /
susrāva rudhiraṃ gātrairgairikaṃ parvato yathā //

tāṃśca sarvānmaheṣvāsānpañcabhiḥ pañcabhiḥ śaraiḥ /
vivyādha tarasā rājaṃstadadbhutamivābhavat //

tato'pareṇa bhallena dharmaputrasya māriṣa /
dhanuściccheda samare sajjayaṃ sa sumahārathaḥ //

athānyaddhanurādāya dharmaputro yudhiṣṭhiraḥ /
sāśvasūtadhvajarathaṃ śalyaṃ prācchādayaccharaiḥ //

sa cchādyamānaḥ samare dharmaputrasya sāyakaiḥ /
yudhiṣṭhiramathāvidhyaddaśabhirniśitaiḥ śaraiḥ //

sātyakistu tataḥ kruddho dharmaputre śarārdite /
madrāṇāmadhipaṃ śūraṃ śarairvivyādha pañcabhiḥ //

sa sātyakeḥ praciccheda kṣurapreṇa mahaddhanuḥ /
bhīmasenamukhāṃstāṃśca tribhistribhiratāḍayat //

tasya kruddho mahārāja sātyakiḥ satyavikramaḥ /
tomaraṃ preṣayāmāsa svarṇadaṇḍaṃ mahāraṇe //

bhīmaseno'tha nārācaṃ jvalantamiva pannagam / nakulaḥ samare śaktiṃ sahadevo gadāṃ śubhām /
dharmarājaḥ śataghnīṃ ca jighāṃsuḥ śalyamāhave //

tānāpatata evāśu pañcānāṃ vai bhujacyutān /
vārayāmāsa samare śastrasaṅghaiḥ sa madrarāṭ //

sātyakiprahitaṃ śalyo bhallaiściccheda tomaram /
prahitaṃ bhīmasenena śaraṃ kanakabhūṣaṇam //

dvidhā ciccheda samare kṛtahastaḥ pratāpavān /
nakulapreṣitāṃ śaktiṃ hemadaṇḍāṃ bhayāvahām //

gadāṃ ca sahadevena śaraughaiḥ samavārayat /
śarābhyāṃ ca śataghnīṃ tāṃ rājñaściccheda bhārata //

paśyatāṃ pāṇḍuputrāṇāṃ siṃhanādaṃ nanāda ca /
nāmṛṣyattatra śaineyaḥ śatrorvijayamāhave //

athānyaddhanurādāya sātyakiḥ krodhamūrcchitaḥ /
dvābhyāṃ madreśvaraṃ vidvā sārathiṃ ca tribhiḥ śaraiḥ //

tataḥ śalyo raṇe rājansarvāṃstāndaśabhiḥ śaraiḥ /
vivyādha bhṛśasaṅkruddhastotrairiva mahādvipān //

te vāryamāṇāḥ samare madrarājñā mahārathāḥ /
na śekuḥ sammukhe sthātuṃ tasya śatruniṣūdanāḥ //

tato duryodhano rājā dṛṣṭvā śalyasya vikramam / nihatānpāṇḍavānmene pāñcālānatha sṛñjayān /

tathāvidhaṃ mahārāja madrarājasya vikramam / asahyaṃ mānavairyuddhe tadbabhūva nararṣabha //

tato rājanmahābāhurbhīmasenaḥ pratāpavān /
santyajya manasā prāṇānmadrādhipamayodhayat //

nakulaḥ sahadevaśca sātyakiśca mahārathaḥ /
parivārya tadā śalyaṃ samantādvyakirañśaraiḥ //

sa caturbhirmaheṣvāsaiḥ pāṇḍavānāṃ mahārathaḥ /
vṛtastānyodhayāmāsa madrarājaḥ pratāpavān //

tasya dharmasuto rājankṣurapreṇa mahāhave /
cakrarakṣaṃ jaghānāśu madrarājasya pārthivaḥ //

tasmiṃstu nihate śūre cakrarakṣe mahārathe /
madrarājo'pi balavānsainikānāvṛṇoccharaiḥ //

samāvṛtāṃstatastāṃstu rājanvīkṣya svasainikān /
cintayāmāsa samare dharmaputro yudhiṣṭhiraḥ //

kathaṃ nu na bhavetsatyaṃ tanmādhavavaco mahat /
api kruddho raṇe rājankṣapayeta balaṃ mama //

ahaṃ maddhātaraścaiva sātyakiśca mahārathaḥ /
pāñcālāḥ sṛñjayāścaiva na śaktāsma hi madrapam //

nihaniṣyati caivādya mātulo'smānmahābalaḥ /
govindavacanaṃ satyaṃ kathaṃ bhavati kintvidam //

tataḥ sarathanāgāśvā pāṇḍavāḥ pāṇḍupūrvaja /
madrarājaṃ samāseduḥ pīḍayantaḥ samantataḥ //

nānāśastraughabahulāṃ śastravṛṣṭiṃ samudyatām /
vyadhamatsamare rājā mahābhrāṇīva mārutaḥ //

tataḥ kanakapuṅkhāṃ tāṃ śalyakṣiptāṃ viyadgatām /
śaravṛṣṭimapaśyāma śalabhānāmivāyatim //

te śarā madrarājena preṣitā raṇamūrdhani /
sampatantaḥ sma dṛśyante śalabhānāṃ vrajā iva //

madrarājadhanurmuktaiḥ śaraiḥ kanakabhūṣaṇaiḥ /
nirantaramivākāśaṃ sambabhūva janādhipa //

na pāṇḍavānāṃ nāsmākaṃ tatra kiñcidvyadṛśyata /
bāṇāndhakāre mahati kṛte tatra mahāhave //

madrarājena balinā lāghavāccharavṛṣṭibhiḥ / cālyamānaṃ tu taṃ dṛṣṭvā pāṇḍavānāṃ balārṇavam /
vismayaṃ paramaṃ jagmurdevagandharvadānavāḥ //

sa tu tānsarvato yattāñśaraiḥ sañchādya māriṣa /
dharmarājamavacchādya siṃhavadvyanadanmuhuḥ //

te cchannāḥ samare tena pāṇḍavānāṃ mahārathāḥ /
nāśaknuvaṃstadā yuddhe pratyudyātuṃ mahāratham //

dharmarājapurogāstu bhīmasenamukhā rathāḥ /
nijaghnuḥ samare śūraṃśalyamāhavaśobhinam //