Mahabharata · Chapter 8.93

rathau tayoḥ śvetahayau divyau yuktau mahāsvanau / samāsthitau lokavīrau śaṅkhāndadhmuḥ pṛthakpṛthakam /
vāsudevārjunau vīrau karṇaśalyau ca bhārata //

tadbhīrusantrāsakaraṃ yuddhaṃ samabhavattadā /
anyonyaspāndhenorugraṃ śakraśambarayoriva //

tayordhvajau hi vimalau śuśubhāte rathe sthitau /
rāhuketū yathā'kāśe uditau jagataḥ kṣaye //

karṇasyāśīviṣanibhā ratnasāramayī dṛṛhā /
purandaradhanuḥ prakhyā hastikakṣyā virājate //

kapiśreṣṭhastu pārthasya vyāditāsya ivāntakaḥ /
daṃṣṭrābhirbhīṣayanbhābhirdurnirīkṣyo raviryathā //

yuddhābhilāṣuko bhūtvā dhvajo gāṇḍīvadhanvanaḥ /
karṇadhvajamupātiṣṭhatsvasthānādvegavānkapiḥ //

utpatya ca mahāvegaḥ kakṣyāmabhyāhanattadā /
nakhaiśca daśanaiścaiva garuḍaḥ pannagaṃ yathā //

sā kiṅkiṇīkābharaṇā kālapāśopamā tadā /
abhyadravatsusaṃrabdhā hastikakṣyā'tha taṃ kapim //

tayorghoratare yuddhe dvairathe dyūta āhite /
prākurvatāṃ dhvajau yuddhaṃ pūrvaṃ pūrvataraṃ tadā //

hayā hayānabhyaheṣanspardhamānāḥ parasparam / avidhyatpuṇḍarīkākṣaḥ śalyaṃ nayanasāyakaiḥ /
śalyaśca puṇḍarīkākṣaṃ tathaivābhisamaikṣata //

tatrājayadvāsudevaḥ śalyaṃ nayanasāyakaiḥ /
karṇaṃ cāpyajayadṛṣṭyā kuntīputro dhanañjayaḥ //

ayābravītsūtaputraḥ śalyamābhāṣya sasmitam //

yadi pārtho raṇe hanyādadya māmiha karhicit /
kiṃ kariṣyasi saṅghāme śalya satyamathocyatām //
śalya uvāca /

yadi karṇa raṇe hanyādadya tvāṃ śvetavāhanaḥ /
ubhāvekarayenāhaṃ hanyāṃ mādhavapāṇḍavau //
sañjaya uvāca /

evameva tu govindamarjunaḥ pratyabhāṣata /
taṃ prahasyābravītkṛṣṇaḥ pārthaṃ paramidaṃ vacaḥ //

pateddivākaraḥ sthānācchīryedbhūmiranekadhā /
śailyamagniriyānna tvāṃ hanyātkārṇo dhanañjaya //

yadi caitatkathañcitsyāllokaparyasanaṃ bhavet /
hanyāṃ karṇaṃ tathā śalyaṃ bāhubhyāmeva saṃyuge //

iti kṛṣṇavacaḥ śrutvā prahasankapiketanaḥ /
arjunaḥ pratyuvācedaṃ kṛṣṇamakliṣṭakāriṇam //

mama tāvadaparyāptau karṇaśalyau janārdana /
sapatākadhvajaṃ karṇaṃ saśalyarathavājinam //

sacchatrakavacaṃ caiva saśaktiśarakārmukam /
draṣṭā'syadya raṇe kṛṣṇa śaraiśchinnamanekadhā //

adyaiva sarathaṃ sāśvaṃ saśaktikavacāyudham /
sañcūrṇitamivāraṇye vṛkṣaṃ paśyādya dantinā //

adya rādheyabhāryāṇāṃ vaidhavyaṃ samupasthitam /
dhruvaṃ svapneṣvaniṣṭāni tābhirdṛṣṭāni mādhava //

draṣṭāsi dhruvamadyaiva vidhavāḥ karṇayoṣitaḥ /
na hi me śāmyate manyuryadanena purā kṛtam //

kṛṣṇāṃ sabhāgatāṃ dṛṣṭvā mūḍhenādīrghadarśinā /
asmāṃstathā'vahasatā kṣipatā ca punaḥpunaḥ //

adya draṣṭāsi govinda karṇamunmathitaṃ mayā /
vāraṇeneva mattena puṣpitaṃ gajatīruham //

adya tā madhurā vācaḥ śrotāsi madhusūdana /
diṣṭyā jayasi vārṣṇeya iti karṇe nipātite //

adyābhimanyujananīṃ prahṛṣṭaḥ sāntvayiṣyasi /
kuntīṃ pitṛṣvasāraṃ ca prahṛṣṭaḥ san janārdana //

adya bāṣpamukhīṃ kṛṣṇāṃ sāntvayiṣyasi mādhava /
vāgbhiścāmṛtakalpābhirdharmarājaṃ ca pāṇḍavam //