Mahabharata · Chapter 8.94

taddetanāgāsurasiddhayakṣai-- rgandharvarakṣopsarasāṃ ca saṅghaiḥ /
brahmarṣirājarṣisuparṇajuṣṭaṃ babhau viyadvismayanīyarūpam //

nānadyamānaṃ ninadairmanojñai-- rvāditragītastutinṛtyahāsaiḥ /
sarve'ntarikṣaṃ dadṛśurmanuṣyāḥ khasthāśca tadvismayanīyarūpam //

tataḥ prahṛṣṭāḥ kurupāṇḍuyodhā vāditraśaṅkhasvanasiṃhanādaiḥ /
vinādayanto vasudhāṃ diśaśca svanena sarvāndviṣato nijaghnuḥ //

narāśvamātaṅgarathaiḥ samākulaṃ śarāsiśaktyṛṣṭinipātaduḥsaham /
abhīrujuṣṭaṃ hatadehasaṅkulaṃ raṇājiraṃ lohitamābabhau tadā //

[babhūva yuddhaṃ kurupāṇḍavānāṃ yathā surāṇāmasuraiḥ sahābhavat.]
tathā pravṛte tumule sudāruṇe dhanañjayaścādhirathiśca sāyakaiḥ / diśaśca sainyaṃ ca śitairajihmagaiḥ parasparaṃ prāvṛṇutāṃ sudaṃśitau //

tatastvadīyāśca pare ca sāyakaiḥ kṛte'ndhakāre dadṛśurna kiñcana /
bhayāturā ekarathau samāśrayaṃ-- stato'bhavattvadbhutameva sarvataḥ //

tato'stramastreṇa parasparaṃ tau vidhūya vātāviva pūrvapaścimau /
ghanāndhakāre vitate tamonudau yathoditau tadvadatīva rejatuḥ //

na cābhisartavyamiti pracoditāḥ pare tvadīyāśca tathā'vatasthire /
mahārathau tau parivārya sarvataḥ surāsurāḥ śambaravāsavāviva //

mṛdaṅgabherīpaṇavānakasvanai-- rninādite vāhanaśaṅkhanisvanaiḥ /
tau siṃhanādairbabhaturnarottamau pataṅgacandrāviva duḥsahāvubhau //

mahādhanurmaṇḍulamadhyagāvubhau suvarcasau bāṇasahasradīdhitī /
didhakṣamāṇau sacarācaraṃ jaga-- dyugāntasūryāviva duḥsahau raṇe //

ubhāvajeyāvahitāntakāvubhā-- vubhau jighāṃsū kṛtinau parasparam /
mahāhave vītabhayau samīyatu-- rmahendrajambhāviva karṇapāṇḍavau //

tato mahāstrāṇi mahādhanurdharau vimuñcamānāviṣubhirbhayānakaiḥ /
narāśvanāgānamitānnijaghnatuḥ parasparaṃ cāpi mahārathau nṛpa //

tato visasruḥ punararditā narā narottamābhyāṃ kurupāṇḍavāśrayāḥ /
sanāgapattyaśvarathā diśo drutā-- stathā yathā siṃhahatā vanaukasaḥ //

tatastu duryodhanabhojasaubalāḥ kṛpo guroścāpi suto mahāhave /
mahārathāḥ pañca dhanañjayācyutau śaraiḥ śarīrārtikarairatāḍayan //

dhanūṃṣi teṣāmiṣudhīndhvajānhayā-- nrathāṃśca sūtāṃśca dhanañjayaḥ śaraiḥ /
samaṃ pramadhyāśu parānsamantataḥ śarottamairdvādaśabhinna sūtajam //

athābhyadhāvaṃstvaritāḥ śataṃ rathāḥ śataṃ gajāścārjunamātatāyinaḥ /
śakāstuṣārā yavanāśca sādinaḥ sahaiva kāmbhojavarairjighāṃsavaḥ //

varāyudhānpāṇigataiḥ śaraiḥ saha kṣurairnyakṛntatprapatañśirāṃsi ca /
hayāṃśca nāgāṃśca rathāṃśca yudhyato dhanañjayaṛ śatrugaṇānkṣitau kṣiṇaut //

tato'ntarikṣe suratūryaniḥsvanāḥ sasādhuvādā hṛṣitaiḥ samīritāḥ /
nipeturapyuttamapuṣpavṛṣṭayaḥ surūpagandhāḥ pavaneritāḥ śubhāḥ //

tadadbhutaṃ devamanuṣyasākṣikaṃ samīkṣya bhūtāni visismiyustadā /
tavātmajaḥ sūtasutaśca na vyathāṃ na vismayaṃ jagmaturekaniścayau //

athābravīddroṇasutastavātmajaṃ karaṃ kareṇa pratipīḍya sāntvayan /
prasīda duryodhana śāmya pāṇḍavai-- ralaṃ virodhena dhigastu vigraham //

hato gururbrahmasamo mahāstravi-- ttathaiva bhīṣmapramukhā mahārathāḥ /
ahaṃ tvavadhyo mama cāpi mātulaḥ praśādhi rājyaṃ saha pāṇḍavaiściram //

dhanañjayaḥ syāsyati vārito mayā janārdano naiva virodhamicchati /
yudhiṣṭhiro bhūtahite rataḥ sadā vṛkodarastadvaśagastathā yamau //

tvayā tu pārthaiśca kṛte ca saṃvide prajāḥ śivaṃ prāpnuyuricchayā tava /
vrajantu śeṣāḥ svapurāṇi pārthivā nivṛttavairāśca bhavantu sainikāḥ / na cedvacaḥ śroṣyasi me narādhipa dhruvaṃ hi tapto'si hato'ribhiryudhi //

vṛddhaṃ pitaramālokya gāndhārīṃ ca yaśasvinīm /
kṛpālurdharmarājo hi yācitaḥ śamameṣyati //

yathocitaṃ ca vai rājyamanujñāsyati te prabhuḥ /
vipaścitsumatirvīraḥ sarvaśāstrārthatattvavit //

vairaṃ neṣyati dharmātmā svajane nāstyatikramaḥ /
na vigrahamatiḥ kṛṣṇā svajane pratinandati //

bhīmasenārjunau cobhau mādrīputrau ca pāṇḍavau / vāsudevamate caiva pāṇḍavasya ca dhīmataḥ /
sthāsyanti puruṣavyāghrāstayorvacanagauravāt //

rakṣa duryodhanātmānamātmā sarvasya bhājanam /
jīvane yatnamātiṣṭha jīvanbhadrāṇi paśyati //

rājyaṃ śrīścaiva bhadraṃ te jīvamāne ca kalpate /
mṛtasya tu khalu kauravya naiva rājyaṃ kutaḥ sukham //

lokavṛttamidaṃ vṛttaṃ pravṛttaṃ paśya bhārata /
śāmya tvaṃ pāṇḍavaiḥ sārdhaṃ śeṣaṃ rakṣa kulasya ca //

mā bhūtsa kālaḥ kauravya yadā'hamahitaṃ vacaḥ /
brūyāṃ kāmaṃ mahābāho mā'vamaṃsthā vaco mama //

dharmiṣṭhamidamatyarthaṃ rājñaścaiva kulasya ca / etaddhi paramaṃ śreyaḥ kuruvaṃśasya vṛddhaye /
prayāhi taṃ ca gāndhāre kulasya ca sukhāvaham //

pathyamāyatisaṃyuktaṃ karṇo'pyarjunamāhave /
na jeṣyati naravyāghra iti me niścitā matiḥ //

rocatāṃ te naraśreṣṭha mamaitadvacanaṃ śubham /
ato'nyathā hi rājendra vināśaḥ sumahānbhavet //

idaṃ ca dṛṣṭaṃ jagatā saha tvayā kṛtaṃ yadekena kirīṭamālinā /
yathā na kuryādbalabhinna cāntako na ca pracetā bhagavānna yakṣarāṭ //

ato'pi bhūyānsvaguṇairdhanañjayo na cātivartiṣyati me vaco'khilam /
tavānuyātrāṃ ca sadā kariṣyati prasīda rājendra śamaṃ tvamāpnuhi //

mamābhimānaḥ paramaḥ sadā tvayi bravīmyatastvāṃ paramācca sauhṛdāt /
nivārayiṣyāmi ca karṇamāhave mahānhi me'sti praṇayo'tha sūtaje //

vadanti maitrīṃ sahajāṃ vicakṣaṇā-- stathaiva sāmnā ca dhanena cārjitām /
pratāpataścopanatāṃ caturvidhāṃ tadasti sarvaṃ tava pāṇḍaveṣu //

nisargataste tava vīra bāndhavāḥ punaśca sāmnā hitamāpnuyuḥ prabho /
tvayi prasanne yadi mitratāṃ gate hitaṃ kṛtaṃ syājjagatastvayā'tulam //

itīdamuktaḥ suhṛdā vaco hitaṃ vicintya niḥśvasya ca durmanā'bravīt /
yathā bhavānāha sakhe tathaiva ta-- nmamāpi vijñāpayato vacaḥ śṛṇu //

nihatya duḥśāsanamuktavānbahu prahasya śārdūlavadeṣa durmatiḥ /
vṛkodarastadvṛdaye mama sthitaṃ na tatparokṣaṃ bhavataḥ kutaḥ śamaḥ //

na cāpi karṇaṃ prasahedraṇe'rjuno mahāgiriṃ merumivogramārutaḥ /
na cāśvasiṣyanti pṛthātmajā mayi prasahya vairaṃ bahuśo vicintya //

na cāpi karṇaṃ guruputra saṃyugā-- dupārametyarhasi vīra bhāṣitum /
śrameṇa yukto mahatādya phalguna-- stameṣa karṇaḥ prasabhaṃ haniṣyati //

vasundharāyāḥ parivartanaṃ bhave-- dvrajecca śoṣaṃ makarālayo'rṇavaḥ /
plaveyurapyadrivarā mahāmbudhau na cārjuno jeṣyati karṇamāhave //

apāṃ pṛthivyā nabhaso nabhasvataḥ sutigmadīpteśca hiraṇyaretasaḥ /
abhāva eṣāmapi sarvato bhave-- nna cārjuno jeṣyati karṇamāhave //

tamevamuktvā'pyanunīya cāsakṛ-- ttavātmajaḥ svānanuśāsti sainikān /
drutaṃ ghnatābhidravatāhitānimā-- nahīnasatvāḥ kimu joṣamāsate //