Mahabharata · Chapter 8.92

prajāpatistu taṃ dṛṣṭvā devabhāgaṃ samāgatam /
abravīttu tato rājanpaśyato vai svayambhuvaḥ //

ubhāvatirathau śūrāvubhau dṛḍhaparākramau /
ubhau sadṛśakarmāṇau vajricakrāyudhaupamau //

aho bata mahadyuddhaṃ karṇārjunasamāgame /
bhaviṣyati mahāghoraṃ vṛtravāsavayoriva //

prajāpatirathoktvaivaṃ svayambhuvamacodayat /
samo'stu vijayaḥ kāmamubhayornarasiṃhayoḥ //

karṇārjunavivādena mā naśyedakhilaṃ jagat /
svayambho brūhi tadvākyaṃ samo'stu vijayo'nayoḥ //

evamuktastu bhagavāñjaye tābhyāmaniścite /
ityabravīnmahārāja mahābrahmā prajāpatim //

dvāvapyetau hi kṛtinau dvāvapyatibalotkaṭau /
bhaviṣyatyanayoryuddhaṃ trailokyasya bhayāvaham //

tataḥ prajāpatiṃ tatra sahasrākṣo'bhyacodayat /
vijayo dhruva evāstu pāṇḍavasya mahātmanaḥ //

manasvī balavāñśūraḥ kṛtavidyastapodhanaḥ /
vibharti ca mahātejā dhanurvedamaśeṣataḥ //

pārthaḥ sarvaguṇopeto devakāryamidaṃ yataḥ /
kliśyante pāṇḍavā nityaṃ vanavāsādibhirbhṛśaṃ //

sampannastapasā caiva paryāptaḥ puruṣarṣabhaḥ /
atikrāmecca māhātmyāddiṣṭamapyavicārayan //

atikrame ca lokānāmabhāvo niyato bhavet /
nāvasthānaṃ ca paśyāmi kruddhayoḥ kṛṣṇayoḥ kvacit //

sraṣṭārau jagataścaitau tataśca puruṣarṣabhau /
naranārāyaṇāvetau purāṇāvṛṣisattamau //

aniyamyau niyantārau jagataḥ puruṣarṣabhau /
[naitayostu samaḥ kaściddivi vā mānuṣeṣu vā //

anugamyāstrayo lokāḥ saha devarṣicāraṇaiḥ / sarvadevagaṇāścāpi sarvabhūtāni yāni ca /
anayostu prabhāvena vartate nikhilaṃ jagat // ]

kāmaṃ tu sukṛtām̐llokānāpnotu puruṣarṣabhaḥ /
karṇo vaikartanaḥ śūro vijayastvastu kṛṣṇayoḥ //

vasūnāṃ samalokatvaṃ marutāṃ vāsamāpnuyāt /
sahito droṇabhīṣmābhyāṃ nākapṛṣṭhe mahīyatām //

kleśito hi vane pārtho dirghakālaṃ pitāmaha /
tasmādeṣa jayedyuddhe tapasā'bhyadhiko'rjunaḥ //

pūrvaṃ bhagavatā proktaḥ kṛṣṇayorvijayo dhruvaḥ /
tattathāstu namaste'stu pramo brūhi pitāmaha //

tatsahasrākṣavacanaṃ niśamya bhagavānprabhuḥ /
novāca tajjayaṃ tulyaṃ tayoḥ karṇakirīṭinoḥ //

tasmādāśāṃ gataḥ śakrastūṣṇīmbhūte pitāmahe /
vijayaḥ pāṇḍaveyasya karṇasya ca vadho bhavet //

brahmeśānau tato vākyamūcaturbhuvaneśvaram /
vijayo dhruva evāstu pāṇḍavasya mahātmanaḥ //

manasvī jayatāṃ śūraḥ kṛtavidyastapodhanaḥ /
bibharti ca mahātejā dhanurvedamaśeṣataḥ //

atikrāmecca māhātmyāddiṣṭamapyavicārayan /
atikrame ca lokānāmabhāvo niyato bhavet //

na ca vidma hyavasthānaṃ kruddhayoḥ kṛṣṇayoḥ kvacit /
sraṣṭārau jagataścaiva sataśca puruṣarṣabhau //

kāmaṃ tu sukṛtām̐llokānprāpnotveṣa parantapaḥ /
karṇo vaikartanaḥ śūro vijayastu nare dhruvaḥ //

tathokte devadevābhyāṃ sahasrākṣo'bravīdvacaḥ /
āmantrya sarvabhūtāni brahmeśānānuśāsanāt //

śrutaṃ bhavadbhiryatproktaṃ bhagavadbhyāṃ jagaddhitam /
tattathā vyetu te rogaḥ śamāpnuta vimanyavaḥ //

iti śrutvendravacanaṃ sarvabhūtāni māniṣa / vismitānyabhavanrājanpūjayāñcakrire tadā /
nocustadā jayaṃ tulyaṃ tayoḥ puruṣasiṃhayoḥ //

vyasṛjaṃśca sugandhīni puṣpavarṣāṇi harṣitāḥ /
nānārūpāṇi vibudhā devatūryāṇyavādayan //

didṛkṣavaścāpratimaṃ dvairathaṃ narasiṃhayoḥ /
vismayotphullanayanā nānyā bubudhire kriyāḥ //