Mahabharata · Chapter 8.91

vṛṣasenaṃ hataṃ dṛṣṭvā krodhāmarṣasamanvitaḥ /
putraśokodbhavaṃ vāri netrābhyāṃ samavāsṛjat //

rathena karṇastejasvī jagāmābhimukho ripum /
yuddhāyāmarpatāmrākṣaḥ samāhūya dhanañjayam //

tau rathau sūryasaṅkāśau vaiyāghraparivāritau /
sametau dadṛśustatra dvāvivārkau samudgatau //

śvetāśvau puruṣādityāvāsthitāvarimardanau / śuśubhāte mahātmānau candrādityau yathā divi /
rathau caturbhirjaladairbhagamitrāvivāmbare //

tau dṛṣṭvā vismayaṃ jagmuḥ sarvasainyāni māriṣa /
trailokyavijaye yattāvindravairocanāviva //

rathajyātalanirhādairbāṇaśaṅkharavaistathā /
tau rathāvabhyadhāvanta kṣatriyāḥ sarva eva hi //

dhvajāvālokya vīrāṇāṃ vismayaḥ samapadyata /
hastikakṣyāṃ ca karṇasya vānaraṃ ca kirīṭinaḥ //

tau rathau samprasaktau tu dṛṣṭvā bhārata pārthivāḥ /
siṃhanādaravāṃścakruḥ sādhuvādāṃśca puṣkalān //

śrutvā tayordvairathaṃ ca tatra yodhāḥ sahasraśaḥ /
cakrurbāhusvanāṃścaiva tathā bāṇaravaṃ mahat //

ājaghnuḥ kuravastatra vāditrāṇi samantataḥ /
rādheyamabhito dadhmuḥ śaṅkhāñśatasahasraśaḥ //

tathaiva pāṇḍavāḥ sarve harṣayanto dhanañjayam /
tūryaśaṅkhaninādena diśaḥ sarvā vyanādayan //

kṣvelitāsphoṭitotkruṣṭaistumulaṃ sarvato'bhavat /
bāhuśabdaiśca śūrāṇāṃ karṇārjunasamāgame //

tau dṛṣṭvā puruṣavyāghrau rathasthau rathināṃ varau /
pragṛhītamahācāpau śaraśaktidhvajāyutau //

varmiṇau baddhanistriṃśau śvetāśvau śaṅkhaśobhitau /
tūṇīravasampannau dvāvapyetau sudarśanau //

raktacandanadigdhāṅgau samadau govṛṣāviva /
cāpavidyuddhvajopetau śastrasampattiyodhinau //

cāmaravyajanopaitau śvetacchatropaśobhitau /
kṛṣṇaśalyarathopetau tulyarūpau mahārathau //

siṃhaskandhau dīrghabhujau raktākṣau hemamālinau / siṃhaskandhapratīkāśau vyūḍhoraskau mahābalau /
anyonyavadhamicchantāvanyonyajayakāṅkṣiṇau //

anyonyamabhidhāvantau goṣṭhe govṛṣabhāviva /
prabhinnāviva mātaṅgau susaṃrabdhāvivācalau //

āśīviṣaśiśuprakhyau yamakālāntakopamau /
indravṛtrāviva kruddhau sūryacandrasamaprabhau //

mahāgrahāviva kruddhau yugāntāya samutthitau /
devagarbhau devasamau devatulyau ca rūpataḥ //

yadṛcchayā samāyātau sūryācandramasau yathā /
balinau samare dṛptau nānāśastradharau yudhi //

tau dṛṣṭvā puruṣavyāghrau śārdūlāviva dhiṣṭhitau /
babhūva paramo harṣastāvakānāṃ viśāmpate //

saṃśayaḥ sarvabhūtānāṃ vijaye samapadyata /
sametau puruṣavyāghrau prekṣya karṇadhanañjayau //

ubhau varāyudhadharāvubhau raṇakṛtaśramau /
ubhau ca bāhuśabdena nādayantau nabhastalam //

ubhau viśrutakarmāṇau pauruṣeṇa balena ca /
ubhau ca sadṛśau yuddhe śambarāmararājayoḥ //

kārtavīryasamau cobhāvubhau dāśaratheḥ samau /
viṣṇuvīryasamau cobhāvubhau bhavasamau yudhi //

ubhau śvetahayau rājanrathapravaravāhinau /
sārathipravarau cāpi ubhau madrajanārdanau //

tato dṛṣṭvā mahārāja rājamānau mahārathau /
siddhacāraṇasaṅghānāṃ vismayaḥ samapadyata //

dhārtarāṣṭrāstatastūrṇaṃ sabalā bharatarṣabha /
parivavrurmahātmānaṃ karṇamāhavaśobhinam //

tathaiva pāṇḍavā dṛṣṭvā dhṛṣṭadyumnapurogamāḥ /
yamau ca cekitānaśca prahṛṣṭāśca prabhadrakāḥ //

nānādeśyāśca ye śūrāḥ śiṣṭā yuddhābhinandinaḥ /
te sarve sahitā hṛṣṭāḥ parivavrurdhanañjayam //

rirakṣiṣantaḥ śathrughnāḥ pattyaśvarathakuñjarāḥ /
dhanañjayasya vijaye dhṛtāḥ karṇavadhe'pi ca //

tathaiva tāvakāḥ sarve yattāḥ senāprahāriṇaḥ /
duryodhanamukhā rājankarṇaṃ jugupurāhave //

tāvakānāṃ raṇe karṇo glaho hyāsīdviśāmpate /
tathaiva pāṇḍaveyānāṃ glahaḥ pārtho'bhavattadā //

tayostu sabhyāstatrāsanprekṣakāścābhavanyudhi /
tatraiṣāṃ glahamānānāṃ dhruvau jayaparājayau //

tābhyāṃ dyataṃ samāsaktaṃ vijayāyetarāya vā /
asmākaṃ pāṇḍavānāṃ ca sthitānāṃ raṇamūrdhani //

tau tu sthitau mahārāja samare yuddhaśālinau /
anyonyaṃ pratisaṃrabdhāvanyonyavadhakāṅkṣiṇau //

tāvumau prajihīrṣantāvindravṛtrāviva prabho /
bhīmarūpadharāvāstāṃ mahādhūmāviva grahau //

tato'ntarikṣe sañjajñe vivādo bharatarṣabha /
mitho bhedāśca bhūtānāmāsankarṇārjunāntare //

vyāśrayanta dvidhā bhinnāḥ sarve lokāstu māriṣa / devadānavagandharvāḥ piśācoragarākṣasāḥ /
pratipakṣagrahaṃ cakruḥ karṇārjunasamāgame //

dyaurāsītkarṇapakṣe'tra sanakṣatrā viśāmpate /
bhūrviśālā pārthamātā putrasya jayakāṅkṣiṇī //

sāgarāścaiva girayaḥ saritaśca narottama /
mahījā jalajāścaiva vyāśrayanta kirīṭinam //

asurā yātudhānāśca guhyakāśca parantapa /
karṇaḥ samabhavadyatra khecarāṇi vayāṃsi ca //

ratnāni nidhayaḥ sarve vedāścākhyānapañcamāḥ /
sopavedopaniṣado vyāśrayanta kirīṭinam //

vāsukiścitrasenaśca takṣakaścopatakṣakaḥ / mahīviyajjalacarāḥ kādraveyāśca sānvayāḥ /
viṣavanto mahānāgā veginaścārjune'bhavan //

airāvatāḥ saurabheyā vaiśāleyāśca bhoginaḥ /
ete'bhavannarjunasya pāpāḥ sarpāśca karṇataḥ //

īhāmṛgā vyālamṛgā maṅgalā mṛgapakṣiṇaḥ / maṅgalāḥ paśavaścaiva siṃhavyāghrāstathaiva ca /
pārthasya vijaye rājansarva eva samāśritāḥ //

vasavo marutaḥ sādhyā rudrā devāśvināvapi / agnī rudraśca somaśca pannagāśca diśo daśa /
karṇataḥ samapadyanta śvasṛgālavayāṃsi ca //

vasavaśca mahendreṇa marutaśca sahāgninā /
dhanañjayasya te vargā ādityāḥ karṇato'bhavan //

devatāḥ pitṛbhiḥ sārdhamṛṣibhiśca parantapa / tumburupramukhāḥ sarve gandharvā bharatarṣabha /
yamau vaiśravaṇaścaiva varuṇaśca yato'rjunaḥ //

devarṣibrahmarṣigaṇāḥ sarve ca khacarāśca ye prāleyāḥ sahamauneyāḥ śubhāścāpsarasāṃ gaṇāḥ //

sahāpsarobhiḥ śubhrābhirdevadūtāśca guhyakāḥ /
kirīṭinaṃ saṃśritāḥ sma puṇyagandhā manoramāḥ //

amanojñāśca ye gandhāste sarve karṇamāśritāḥ /
viparītānyaniṣṭāni bhavanti vinaśiṣyatām //

ye tvantakāle puruṣaṃ viparītamupāśritam / praviśanti naraṃ kṣipraṃ mṛtyukāle'bhyupāgate /
te bhāvāḥ sahitāḥ karṇaṃ praviṣṭāḥ sūtanandanam //

ojastejaśca siddhiśca praharṣaḥ satyavikramau /
manastuṣṭirjayaścāpi tathā'nando nṛpottama //

īdṛśārni naravyāgh tasminsaṅgrāmasāgare /
nimittāni ca śubhrāṇi viviśurjiṣṇumāhave //

ṛṣayo brāhmaṇaiḥ sārdhamabhajanta kirīṭinam //

tato devagaṇaiḥ sārdhaṃ siddhāśca saha cāraṇaiḥ /
dvidhā bhūtā mahārāja vyāśrayanta narottamau //

vimānāni vicitrāṇi guṇavanti ca sarvaśaḥ / samāruhya samājagmurdvairathaṃ karṇapārthayoḥ /
antarikṣe mahārāja devagandharvarākṣasāḥ //

evaṃ sarveṣu bhūteṣu dvidhā bhūteṣu bhārata / āśaṃsamāneṣu jayaṃ rādheyasyārjunasya ca /
vimānāyutasambādhamākāśamabhavattadā //

īhāmṛgavyālamṛgairdipāśvarathapaṅktibhiḥ / ūhyamānāḥ pare meghairvāyunā ca manīṣiṇaḥ /
didṛkṣavaḥ samājagmuḥ karṇārjunasamāgamam //

devadānavagandharvā nāgayakṣapatatriṇaḥ /
maharṣayo devagaṇāḥ pitaraśca svadhābhujaḥ //

tapovidyauṣadhīsidadhā nānārūpāmbaratviṣaḥ /
antarikṣe mahārāja vivadanto'vatasthire //

brahmā brahmarṣibhiḥ sārdhaṃ prajāpatibhireva ca /
āsthito yānamākāśe divyaṃ tejaḥ samāgatāḥ //

tataḥ prajāpatistūrṇamājagāma mahāmate /
dvairathaṃ yudhi taṃ druṣṭaṃ karṇapāṇḍavayostadā //

vijitya karṇaḥ svidimāṃ vasundharā-- mathārjunaḥ svitpratipadyate'khilām /
itīśvarasyāpi babhūva saṃśayaḥ prajāpateḥ prekṣya tayormahadbalam //