Mahabharata · Chapter 8.8

saināpatyaṃ tu samprāpya karṇo vaikartanastadā /
tathoktaśca svayaṃ rājñā snigdhaṃ bhrātṛsamaṃ vacaḥ //

hitaśca priyakāmaśca mama putrasya nityaśaḥ /
akarotkiṃ mahāprājñastanmamācakṣva s̤añjaya //
sañjaya uvāca /

karṇasya matamājñāya putrāste bharatarṣabha /
yogamājñāpayāmāsurnanditūryapuraḥsaram //

mahatyapararātre ca tava sainyasya māriṣa /
yogo yoga iti hyāśu prādurāsīnmahāsvanaḥ //

kalpatāṃ nāgamukhyānāṃ rathānāṃ ca varuthinām /
sannahyatāṃ narāṇāṃ ca vājināṃ ca viśāmpate //

krośatāṃ caiva yodhānāṃ tvaritānāṃ parasparam् /
babhūva tumulaḥ śabdo divaspṛksumahāṃstataḥ //

tataḥ śvetapatākena balākāvarṇavājinā /
hemapṛṣṭhena dhanuṣā nāgakakṣeṇa ketunā //

tūṇīraśatapūrṇena sagadena varūthinā /
śataghnīkiṅkiṇīśaktiśūlatomaradhāriṇā //

kārmukairupapannena vimalādityavarcasā /
rathenābhipatākena sutaputro hyadṛśyata //

dhmāpayanvārijaṃ rājanhemajālavibhūṣintam /
vidhrunvāno mahaccāpaṃ kārtasvaravibhūṣitam //

dṛṣṭvā karṇaṃ maheṣvāsaṃ rathasthaṃ rathināṃ varam /
bhānumantamivodyantaṃ tamo ghnantaṃ durāsadam //

na bhīṣmavyasanaṃ kecinnāpi droṇasya māriṣa /
nānyeṣāṃ puruṣavyāghra menire tatra kauravāḥ //

tatastu tvarayanyodhāñśaṅkhaśabdena māriṣa /
karṇo niṣkarṣayāmāsa kauravāṇāṃ mahadbalam //

vyūhaṃ vyūhya maheṣvāso makaraṃ śatrutāpanaḥ /
pratyudyayau tathā karṇaḥ pāṇḍavānvijigīṣayā //

makarasya tu tuṇḍe vai karṇo rājanvyavasthitaḥ /
netrābhyāṃ śakuniḥ śūra ulūkaśca mahārathaḥ //

droṇaputrastu śirasi grīvāyāṃ sarvasodarāḥ /
madhyeduryodhano rājā balena mahatā vṛtaḥ //

vāmapāde tu rājendra kṛtavarmā vyavasthitaḥ /
nārāyaṇabalairyukto gopālairyuddhadurmadaiḥ //

pāde tu dakṣiṇe rājangautamaḥ satyavikramaḥ /
trigartaiḥ sumaheṣvāsairdākṣiṇātyaiśca saṃvṛtaḥ //

anupāde tu yo vāmastatra śalyo vyavasthitaḥ /
mahatyā senayā sārdhaṃ madradeśasamutthayā //

dakṣiṇe tu mahārāja suṣeṇaḥ satyasaṅgaraḥ /
vṛto rathamahasreṇa dantināṃ ca tribhiḥ śataiḥ //

pucche hyāstāṃ mahāvīryau bhrātarau pārthivau tadā /
citraśca citrasenaśca mahatyā senayā vṛtau //

tathā prayāte rājendra karṇe naravarottame /
dhanañjayamabhipekṣya dharmarājo'bravīdidam //

paśya pārtha yathā senā dhārtarāṣṭrīha saṃyuge /
karṇena vihitā vīra guptā vīrairmahārathaiḥ //

hatavīratamā hyeṣā dhārtarāṣṭrī mahācamūḥ /
phalguśeṣā mahābāho tṛṇaistulyā matā mama //

eko hyatra maheṣvāsaḥ sūtaputro virājate / sadevāsuragandharvaiḥ sakinnaramahoragaiḥ /
carācaraistribhirlokairajeyo yo mahārathaḥ //

taṃ hatvā'dya mahābāho vijayastava phalguna /
uddhṛtaśca bhavecchalyo mama dvādaśavārṣikaḥ //

evaṃ jñātvā mahābāho vyūhaṃ vyūha yathecchasi //
sañjaya uvāca /

bhrāturetadvacaḥ śrutvā pāṇḍavaḥ śvetavāhanaḥ /
ardhacandreṇa vyūhena pratyavyūhata tāṃ camūm //

vāmapārśve tu tasyātha bhīmaseno vyavasthitaḥ /
dakṣiṇe ca maheṣvāso dhṛṣṭadyumno vyavasthitaḥ //

madhye vyūhasya rājā tu pāṇḍavaśca dhanañjayaḥ /
nakulaḥ sahadevaśca dharmarājasya pṛṣṭhataḥ //

cakrarakṣau tu pāñcālyau yudhāmanyūttamaujasau /
pārthaṃ na jahaturyudve pālyamānau kirīṭinā //

śeṣāṃ nṛpatayo vīrāḥ sthitā vyūhasya daṃśitāḥ /
yathābhāgaṃ yathotsāhaṃ yathāyatnaṃ ca bhārata //

evametanmahāvyūhaṃ vyūhya bhārata pāṇḍavāḥ /
tāvakāśca maheṣvāsā yuddhāyaiva mano dadhuḥ //

dṛṣṭvā vyūḍhāṃ tava camūṃ sūtaputreṇa saṃyuge /
nihatānpāṇḍavānmene dhārtarāṣṭraḥ sabāndhavaḥ //

tathaiva pāṇḍavīṃ senāṃ vyūḍhāṃ dṛṣṭvā yudhiṣṭhiraḥ /
dhārtarāṣṭrānhatānmene sakarṇānvai janādhipaḥ //

tataḥ śaṅkhāśca bheryaśca paṇavānakagomukhāḥ /
ḍiṇḍimāścāpyahanyanta jharjharāśca samantataḥ //

senayorubhayo rājanprāvādyanta mahāsvanāḥ /
siṃhanādaśca sañjajñe śūrāṇāṃ jayagṛddhinām //

hayaheṣitaśabdāśca vāraṇānāṃ ca bṛṃhitāḥ /
rathanemisvanāścogrāḥ sambabhūvurjanādhipa //

na droṇavyasanaṃ kaścijjānīte tatra bhārata /
dṛṣṭvā karṇaṃ maheṣvāsaṃ mukhe vyūhasya daṃśitam //

ubhe sainye mahārāja prahṛṣṭanarasaṅkule /
yodvukāme sthite rājanhantumanyonyamojasā //

vijaye jātasaṃrambhe dṛṣṭvā'nyonyaṃ vyavasthite /
anīkamadhye rājendra ceratuḥ karṇapāṇḍavau //

nṛtyantyāviva te sene sameyātāṃ parasparam /
tayoḥ pakṣaprapakṣebhyo niryayuryudvalipsavaḥ //

tataḥ pravavṛte yuddhaṃ naravāraṇavājinām /
rathānāṃ ca mahārāja anyonyamabhinighnatām //