Mahabharata · Chapter 8.7

hate droṇe maheṣvāse tasminnahani bhārata /
kṛte ca moghasankalpe droṇaputre mahārathe //

dravamāṇe mahārāja kauravāṇāṃ balārṇave /
vyūhya pārthaḥ svakaṃ sainyamatiṣṭhadvātṛbhirvṛtaḥ //

tamavasthitamājñāya putraste bharatarṣabha /
vidrutaṃ svabalaṃ dṛṣṭvā pauruṣeṇa nyavārayat //

svamanīkamavasthāpya bāhuvīryamupāśritaḥ /
yuddhā ca suciraṃ kālaṃ pāṇḍavaiḥ saha bhārata //

labdhalakṣaiḥ parairhaṣṭairvyāyacchadbhiściraṃ tadā /
sandhyākālaṃ samāsādya pratyāhāramakārayat //

niveśya balavadvoraṃ kṣutpipāsābalairyutam /
śrameṇa mahatā yuktaṃ tathā droṇavadhena ca //

dīnarūpā raṇe karma kṛtvā ghoraṃ ca śarvarīm /
viśaṃ prāpya sā senā viśramya muditā'bhavat //

kṛtvā'vahāraṃ sainyānāṃ praviśya śibiraṃ svakam /
kuravaḥ sahitā mantraṃ mantrayāñcakrire mithaḥ //

paryaṅkeṣu parārdhyeṣu spardhyāstaraṇavatsu ca /
varāsaneṣūpaviṣṭāḥ sukhaśayyāsvivāmarāḥ //

tato duryodhano rājā sāmnā paramavalgunā /
tānābhāṣya maheṣvāsānprāptakālamabhāṣata //

mataṃ matimatāṃ śreṣṭhāḥ sarve prabrūta mā ciram /
evaṅgatena yatkāryaṃ bhavetkāryataraṃ nṛpāḥ //
sañjaya uvāca /

evamukte narendreṇa narasiṃhā yuyutsavaḥ /
cakrurnānāvidhāśceṣṭāḥ siṃhāsanagatāstadā //

teṣāṃ niśāmyeṅgitāni yuddhe prāṇāñjuhūṣatām / samudvīkṣya mukhaṃ rājño bālārkasamavarcasam /
ācāryaputro medhāvī vākyajño vākyamādade //

rāgo yogastathā dākṣyāṃ nayaścetyarthasādhakāḥ /
upāyāḥ paṇḍitaiḥ proktāste tu daivamupāśritāḥ //

lokapravīrā ye'smākaṃ devakalpā mahārathāḥ /
nītimantastathā yuktā dakṣā raktāśca te hatāḥ //

na tveva kāryaṃ nairāśyamasmābhirvijayaṃ prati /
sunītairiha sarvārthairdaivamapyanulomyate //

te vayaṃ pravaraṃ nṝṇāṃ sarvairyodhaguṇairyutam /
karṇamevābhiṣebhyāmaḥ saināpatyena bhārata //

karṇaṃ senāpatiṃ kṛtvā pramathiṣyāmahe ripūn //

eṣa hyatibalaḥ śūraḥ kṛtāstro yuddhadurmadaḥ /
vaivasvata ivāsahyaḥ śakto jetuṃ raṇe nipūn //

etadācāryatanayācchrutvā rājaṃstavātmajaḥ /
duryodhano mahārāja bhṛśaṃ prītamanāstadā //

āśāṃ bahumatīṃ cakre varṇaṃ prati sa vai tadā /
hate bhīṣme ca droṇe ca karṇo jeṣyati pāṇḍavān //

tāmāśāṃ hṛdaye kṛtvā samāśvasya ca bhārata / [tato duryodhanaḥ prītaḥ priyaṃ śrutvā'sya tadvacaḥ /
prītisatkārasaṃyuktaṃ tathyamātmahitaṃ śūbham // ]

svaṃ manaḥ samavasthāpya bāhuvīryamupāśritaḥ //

priyasatkārasaṃyuktaṃ tathyamātmahite ratam /
duryodhano mahārāja rādheyamidamabravīt //

karṇa jānāmi te vīryaṃ sauhṛdaṃ paramaṃ mayi /
tathā'pi tvāṃ mahābāho pravakṣyāmi hitaṃ vacaḥ //

śrutvā yatheṣṭaṃ ca kuru vīra yattava rocate /
bhavānprājñatamo nityaṃ mama caiva parā gatiḥ //

bhīṣmadroṇāvatirathau hatau senāpatī mama /
senāpatirbhavānastu tābhyāṃ draviṇavattaraḥ //

vṛddho ca tau maheṣvāsau sāpekṣo ca dhanañjaye /
mānitau ca mayā vīrau rādheya vacanāttava //

pitāmahatvaṃ samprekṣya pāṇḍuputrā mahāraṇe /
rakṣitāstāta bhīṣmeṇa divasāni daśaiva tu //

nyastaśastre tu bhavati hato bhīṣmaḥ pitāmahaḥ /
śikhaṇḍinaṃ puruskṛtya phalgunena mahāhave //

hate tasminmaheṣvāse śaratalpagate tathā /
tvayokte puruṣavyāghra droṇo hyāsītpuraḥsaraḥ //

tenāpi rakṣitāḥ pārthāḥ śiṣyatvāditi me matiḥ /
sa cāpi nihato vṛddho dhṛṣṭadyumnena satvaram //

nihatābhyāṃ pradhānābhyāṃ tābhyāmatulavikrama /
tvatsamaṃ samare yodhaṃ nānyaṃ paśyāmi cintayan //

bhavāneva tu naḥ śakto vijayāya na saṃśayaḥ /
pūrvaṃ madhye ca paścāśca tathaiva vihitaṃ hitam //

sa bhavāndhuryavatsaṅkhye dhuramudvo'ḍhumarhati /
abhiṣecaya sainānye svayamātmānamātmanā //

devatānāṃ yathā skandaḥ senānīḥ prabhuravyayaḥ /
tathā bhavānimāṃ senāṃ dhārtarāṣṭrīṃ bibhartu vai //

jahi śatrugaṇānsarvānmahendro dānavāniva / avasthitaṃ rame dṛṣṭvā pāṇḍavāstvāṃ mahārathāḥ /
draviṣyanti ca pāñcālā viṣṇuṃ dṛṣṭveva dānavāḥ //

tasmāttvaṃ puruṣavyāghra prakarṣaitāṃ mahācamūm //

bhavatyavasthite yatte pāṇḍavā mandacetasaḥ / draviṣyanti sahāmātyāḥ pāñcālāḥ sṛñjayāśca ha /

yathā hyabhyuditaḥ sūryaḥ pratapansvena tejasā /
vyapohati tamastīvraṃ tathā śatrūnpratāpaya //
sañjaya uvāca /

evamuktastu rādheyo rājñā duryodhanena ha / rājñāṃ madhye mahābāhuḥ prītātmā sa mahābalaḥ /
harṣayannabravītkarṇo duryodhanamidaṃ vacaḥ //
karṇa uvāca /

uktametanmayā pūrvaṃ gāndhāre tava sannidhau /
jeṣyāmi pāṇḍavānsarvānsaputrānsajanārdanān //

senāpatirbhaviṣyāmi tavāhaṃ nātra saṃśayaḥ /
sthiro bhava mahārāja jitānvidvi ca pāṇḍavān //
sañjaya uvāca /

evamukto mahārāja tato duryādhano nṛpaḥ /
uttasthau rājabhiḥ sārdhaṃ devairiva śatakratuḥ //

saināpatyena satkartuṃ karṇaṃ skandamivāmarāḥ /
tato'bhiṣiṣicuḥ karṇaṃ vidhidṛṣṭena karmaṇā //

duryodhanamuktā rājanrājāno vijayaiṣiṇaḥ /
śātakumbhamayaiḥ kumbhermāheyaiścābhimantritaiḥ //

toyapūrṇairviṣāṇaiśca dvipakhaṅgamaharṣabhaiḥ /
maṇimuktāyutaiścānyaiḥ puṇyagandhaistathauṣadhaiḥ //

audumbare sukhāsīnamāsane kṣaumasaṃvṛte /
śāstradṛṣṭena vidhinā sambhāraiśca susambhṛtaiḥ //

brāhmaṇaḥ kṣatriyā vaiśyāstathā śūdrāśca sammatāḥ /
tuṣṭuvustaṃ mahātmānamabhiṣiktaṃ varāsane //

tato'bhiṣikte rājendra niṣkairgobhirdhanena ca /
vācayāmāsa viprāgryānrādheyaḥ paravīrahā //

sa vyarocata rādheyaḥ sūtamāgadhabandibhiḥ /
stūyamāno yathā bhānurudaye brahmavādibhiḥ //

tataḥ puṇyāhaghoṣeṇa vāditraninadena ca /
jayaśabdena śūrāṇāṃ tumulaḥ sarvato'bhavat //

jayetyūcurnṛpāḥ sarve rādheyaṃ tatra saṅgatāḥ //

jaya pārthānsagovindānsānugāṃstānmahāmṛdhe /
iti taṃ bandinaḥ prāhurdvijāśca puruṣarṣabham //

jahi pārthānsapāñcālānrādheya vijayāya naḥ /
udyanniva sadā bhānustamāṃsyugrairgabhastibhiḥ //

na hyalaṃ tvadvisṛṣṭānāṃ śarāṇāṃ vai sakeśavāḥ /
ulūkāḥ sūryaraśmīnāṃ jvalatāmiva darśane //

na hi pārthāḥ sapāñcālāḥ sthātuṃ śaktāstavāgrataḥ /
āttavajrasya samare mahendrasyeva dānavāḥ //
sañjaya uvāca /

sa satkṛtaḥ stūyamānaḥ suhṛdgaṇavṛto ruṣā /
karṇo duryodhanaṃ vākyamabravītprahasanpriyam //

duryodhanādya sagaṇaṃ pāṇḍūnāṃ pravaraiḥ saha /
phalgunaṃ sūdayiṣyāmi tvatpriyārthaṃ sabāndhavam //

saparvatārṇavadvīpāṃ śādhi gāṃ gatapāṇḍavām /
putrapautraprapautreṣu pratiṣṭhāṃ gamayiṣyami //

nāsahyaṃ vidyate mahyaṃ tvatpriyārthamarindama /
satyadharmānuraktasya siddhirātmavato yathā //

abhiṣiktastu rāgheyaḥ prabhayā so'mitaprabhaḥ /
atyaricyata rūpeṇa divākara ivāparaḥ //

saināpatye tu rādheyamabhiṣicya sutastava /
amanyata tadātmānaṃ kṛtārthaṃ kālacoditaḥ //

karṇo'pi rājñaḥ samprāpya saināpatyamarindamaḥ /
yogamājñāpayāmāsa sūryasyodayanaṃ prati //

tava putrairvṛtaḥ karṇaḥ śuśubhe tatra bhārata /
devairiva yathā skandaḥ saṅgrāme tārakāmaye //