Mahabharata · Chapter 8.79

samāgame pāṇḍavasṛñjayānāṃ mahābhaye māmakānāmagādhe /
dhanañjaye tāta raṇāya yāte karṇena tadyudvamatho'tra kīdṛk // ]
sañjaya uvāca /

teṣāmanīkāni mahādhvajāni raṇe samṛddhāni susaṅgatāni /
bherīnirādonmukharāṇyangarja-- nmeghā iva prāvṛṣi mārutāstāḥ //

mahāgajābhrākulamastratoyaṃ vāditranemītalaśabdavacca /
hiraṇyacitrāyudhavidyutaṃ ca śarāsinārācamahāstradhāram //

tadbhīmavegaṃ rudhiraughavāhi khaṅgākulaṃ kṣatriyajīvaghāti /
anārtavaṃ krūramaniṣṭavarṣaṃ babhūva saṃrambhakaraṃ prajānām //

ekaṃ rathaṃ samparivārya mṛtyuṃ nayantyaneke ca rathāḥ sametāḥ /
ekastathaikaṃ rathinaṃ rathāgryāṃ-- stathā rathaścāpi rathānanekān //

rathaṃ sasūtaṃ sahayaṃ ca kañci-- tkaścidratī mṛtyuvaśaṃ nināya /
nināya cāpyekagajena kaści-- drathānbahūnmṛtyuvaśe tathāśvān //

rathānsasūtānsahayāngajāṃśca sarvānarīnmṛtyuvaśaṃ śaraughaiḥ /
ninye hayāṃścaiva tathā sasādī-- npadātisaṅghāṃśca tathaiva pārthaḥ //

kṛpaḥ śikhaṇḍī ca raṇe sametau duryodhanaṃ sātyakiradhyagacchat /
śrutaśravā droṇaputreṇa sārdhaṃ yudhāmanyuścitrasenena sārdham //

karṇasya putraṃ tu rathī suṣeṇaṃ samāgataṃ sṛñjayaścottamaujāḥ /
gāndhārarājaṃ sahadevo'kṣadhūrtaṃ maharṣabhaṃ siṃha ivābhyadhāvat //

śatānīko nākuliḥ karṇaputraṃ yuvā yuvānaṃ vṛṣasenaṃ śaraughaiḥ /
samārpayatkarṇaputraśca śūraḥ pāñcāleyaṃ śaravarṣairanekaiḥ //

ratharṣabhaḥ kṛtavarmāṇabhārccha-- nmādrīputro nakulaścitrayodhī /
pāñcālānāmadhipo yājñaseniḥ senāpatiḥ karṇamārcchatsasainyam //

duḥśāsano bhārata bhārataṃ tu vyāttānanaṃ krūramivāntakābham /
bhīmaṃ raṇe śastrabhṛtāṃ variṣṭhaṃ bhīmaṃ samārcchattamasahyavegam //

karṇātmajaṃ tatra jaghāna vīra-- stathācchinaccottamaujāḥ prasahya /
tasyottamāṅgaṃ nipapāta bhūmau ninādayadgāṃ ninadena khaṃ ca //

suṣeṇaśīrṣaṃ patitaṃ pṛthivyāṃ vilokya karṇo'tha tadārtarūpaḥ /
krodhāddhayāṃstasya rathaṃ dhvajaṃ ca bāṇaiḥ sudhārairniśitairakṛntat //

sa tūttamaujā niśitaiḥ pṛṣatkai-- rvivyādha khaṅgena ca bhāsvareṇa /
pārṣṇigrahāṃścaiva kṛpasya hatvā śikhaṇḍivāhaṃ sa tato'dhyarohat //

kṛpaṃ tu dṛṣṭvā virathaṃ rathastho naicchaccharaistāḍayituṃ śikhaṇḍī /
taṃ drauṇirāvārya rathaṃ kṛpasya samujjahe paṅkagatāṃ yathā gām //

hiraṇyavarmā niśitaiḥ pṛṣatkai-- stavātmajānāmanilātmajo vai /
atāpayatsainyamatīva bhīmaḥ kāle śucau madhyagato yathā'rkaḥ //