Mahabharata · Chapter 8.78

sa keśavasya bībhatsuḥ śrutvā bhārata bhāṣitam /
viśokaḥ samprahṛṣṭaśca kṣaṇena samapadyata //

tato jyāmabhimṛjyāśu vyākṣipadgāṇḍivaṃ dhanuḥ /
dadhre karṇavināśāya keśavaṃ cābhyabhāṣata //

tvayā nāthena govinda dhruva eva jayo mama /
prasanno yasya bhagavānbhūtabhavyabhaviṣyakṛt //

tvatsahāyo hyahaṃ kṛṣṇa trīṃllokānvai samāgatān /
prāpayeyaṃ paraṃ lokaṃ kimu karṇaṃ mahāhave //

paśyāmi dravatīṃ senāṃ pāñcālānāṃ janārdana /
paśyāmi karṇaṃ samare vicarantamabhītavat //

bhārgavāstraṃ ca paśyāmi jvalantaṃ kṛṣṇa sarvaśaḥ /
sṛṣṭaṃ karṇena vārṣṇeya śakreṇeva mahāśanim //

anena khalu saṅgrāme yattu kṛṣṇa mayā kṛtam /
kathayiṣyanti bhūtāni yāvadbhūmirdhariṣyati //

adya kṛṣṇa vikarṇā me karṇaṃ neṣyanti mṛtyave /
gāṇḍīvamuktāḥ kṣiṇvanto mama hastapracoditāḥ //

adya rājā dhṛtarāṣṭraḥ svāṃ buddhimavamaṃsyate /
duryodhanamarājyārhaṃ yayā rājye'bhyaṣecayat //

adya rājyātsukhāccaiva śriyo rāṣṭrāttathā purāt /
putrebhyaśca mahābāho dhṛtarāṣṭro vimokṣyati //

guṇavantaṃ hi yo hitvā nirguṇaṃ kurute prabhum /
sa śocati ciraṃ kṛṣṇa kṣipramevāgate kṣaye //

yathā ca puruṣaḥ kaścicchittvā cāmravaṇaṃ mahat /
palāśasecane buddhiṃ kṛtvā śocati mandadhīḥ //

dṛṣṭvā puṣpaṃ pale gṛdhnuḥ phalaṃ dṛṣṭvā'nuśocati / tathedaṃ dhṛtarāṣṭrasya puṣpalupdhasya mānada /
phalaṃ dṛṣṭvā bhṛśaṃ duḥkhaṃ bhaviṣyati janārdana //

sūtaputre hate tvadya nirāśo bhavitā prabhuḥ //

adya duryodhano rājyājjīvitācca nirāśakaḥ /
bhaviṣyati hate karṇe kṛṣṇa satyaṃ bravīmi te //

adya dṛṣṭvā mayā karṇaṃ śarairviśakalīkṛtam /
smaratāṃ tava vākyāni śamaṃ prati janeśvaraḥ //

adyāsau saubalaḥ kṛṣṇa glahāñjānātu vai śarān /
durodaraṃ ca gāṇḍīvaṃ gaṇ़ḍavaṃ ca rathaṃ mama //

adya kuntīsutasyāhaṃ dṛḍhaṃ rājñaḥ prajāgaram /
vyapaneṣyāmi govinda hatvā karṇaṃ śitaiḥ śaraiḥ //

adya kuntīsuto rājā hate sūtasute mayā /
suprahṛṣṭamanāḥ prītaściraṃ sukhamavāpsyati //

adya vāhamanādhṛṣyaṃ keśavāpratimaṃ śaram /
utsrakṣyāmīhayaḥ karṇaṃ jīvitāddhaṃśayiṣyati //

yasya caitadvrataṃ mahyaṃ vadhe kila durātmanaḥ /
pādauna maxxxxxxnyāṃ na phalgunam //

xxxxxxxz pāpasya madhusūdana /
xxxxxxxxxxxxxx sannataparvabhiḥ //

xxxxxxxxxxxxxx nānyaṃ pṛthivyāmanumanyate /
xxxxxxxxx sūtaputrasya bhūmiḥ pāsyati śoṇitam //

xxxxxxx sūtaputro yadavravīt /
xxxxxxxxxxx ślāghamānaḥ svakānguṇān //

anṛtaṃ tatkariṣyanti māmakā niśitāḥ śarāḥ /
āśīviṣā iva kruddhāstasyapāsyanti śoṇitam //

mayā hastavatā muktā nārācā vaidyutatviṣaḥ /
gāṇḍīvasṛṣṭā dāsyanti karṇasya paramāṃ gatim //

adya tapsyati rādheyaḥ pāñcālīṃ yattadabravīt /
sabhāmadhye vacaḥ krūraṃ kutsayanpāṇḍavānprati //

ete ṣaṇḍatilāḥ kṛṣṇe nirvīryā hatavikramāḥ / ahaṃ vaḥ pāṇḍaveyebhyo bhayāttrāsyeti cābravīt /
hantā'haṃ pāṇḍavānsarvānsaputrāniha bhārata //

anṛtaṃ tatkariṣyanti māmakā niśitāḥ śarāḥ /
hate vaikartane karṇe sūtaputre durātmani //

yasya vīryaṃ samāśritya dhārtarāṣṭro bṛhanmanāḥ /
tamadya karṇaṃ hantāsmi samare madhusūdana //

adya karṇe hate kṛṣṇa dhārtarāṣṭrāḥ sarājakāḥ /
vidravanti diśo bhītāḥ siṃhaṃ dṛṣṭvā mṛgā iva //

adya duryodhano rājā pṛthivīṃ nānvavekṣate /
hate karṇe mayā saṅkhye saputre sasuhṛjjane //

adya karṇe hataṃ dṛṣṭvā dhārtarāṣṭro'tyamarṣaṇaḥ /
jānātu māṃ raṇe kṛṣṇa pravaraṃ sarvadhanvinām //

saputrapautraḥ sāmātyaḥ sasuhṛcca nirāśiṣaḥ /
pitrye rājye nirāśaśca dhārtarāṣṭro nirāśrayaḥ //

adya rājā dharmaputro hatāmitro bhaviṣyati /
adya duryodhano dīptāṃ śriyaṃ rājyaṃ ca hāsyati //

hate vaikartane karṇe bhīṣme droṇe ca saṃyuge /
kātaraṃ tadbalaṃ kṛṣṇa praviṣṭaṃ bhokṣyate tu yat //

adyaprabhṛti rājānaṃ dharmaputraṃ yudhiṣṭhiram /
anumodantu suhṛdo jñātapūrvāśca brāhmaṇāḥ //

adya taṃ nihataṃ śrutvā karṇaṃ vaikartanaṃ mayā /
karotu paṭahonmiśraṃ devatāsthānapūjanam //

adya kṛṣṇa hate karṇe kurutāṃ cirasambhṛtam /
yājanaṃ vai mahābāho devatānāṃ yathāvidhi //

adya tvambā ca kṛṣṇā ca tvaramāṇe parasparam /
sasvajetāṃ hṛṣīkeśa sampūrṇe'sminmanorathe //

adya tvaṃ pāṇḍavo jyeṣṭhastathā'ryaśca vṛkodaraḥ /
udīkṣetāṃ hate karṇe kṛṣṇa saumyena cakṣuṣā //

abhivādya gurūnadya kaniṣṭhaiścābhivāditaḥ /
sasvajāno hyahaṃ dorbhyāṃ prāpsyāmi vipūlaṃ yaśaḥ //

adya karṇe hate kṛṣṇa praśaṃsanto'rjunaṃ surāḥ /
tridivaṃ yāntu saṃhṛṣṭāḥ saṅgatāśca tapodhanāḥ //

adya lokāstrayaḥ kṛṣṇa jānantu mama pauruṣam /
dṛṣṭvā karṇaṃ hataṃ yuddhe dvairathe savyasācinā //

adyāhamanṛṇaḥ kṛṣṇa bhaviṣyāmi dhanuṣmatām /
rathasya ca śarāṇāṃ ca dhanuṣo gāṇḍivasya ca //

mokṣyāmyadya mahadduḥkhaṃ trayodaśasamārjitam /
hatvā karṇaṃ raṇe kṛṣṇa śambaraṃ maghavāniva //

adya karṇe hate yuddhe somakānāṃ mahārathāḥ /
kṛtakāryāḥ pramodantāṃ mitrakāryepsavo yudhi //

na jāne ca kathaṃ prītiḥ śaineyasyādya mādhava / ahaṃ hatvā raṇe karṇaṃ putrāṃścāsya jayādhikān /
prītiṃ dāsyāmi bhīmasya sātyakeryamayostathā //

dhṛṣṭadyumnasya vīrasya tathaiva ca śikhaṇḍinaḥ / adyānṛṇyaṃ gamiṣyāmi hatvā karṇaṃ mahāhave /
dharmarājasya saṃśrutya vārṣṇeyaśapathaṃ mithaḥ //

adya paśyantu saṅgrāme dhanañjayamamarṣaṇam /
yudhyantaṃ kauravaiḥ sārdhaṃ ghātayantaṃ ca sūtajam //

bhavatsamakṣamaṃ vakṣyāmi punarevātmasaṃstavam /
ityapyamitrapravaramadyāhaṃ hanmi sūtajam //

dhanurvede matsamaḥ ko nu loke parākrame vā mama ko'sti tulyaḥ /
ko vā'pyanyo matsamo'sti kṣamāyāṃ mamānṛśaṃsye sadṛśo'sti ko'nyaḥ //

ahaṃ dhanuṣmānsasurāsurāṃśca sarvāṇi bhūtāni ca saṅgatāni /
svabāhuvīryādgamaye parābhavaṃ matpauruṣaṃ vidvi paraṃ parebhyaḥ //

śarārciṣā gāṇḍivenāhamekaḥ sarvānkurūnbāhlikāṃścābhipannaḥ /
himātyaye kakṣagato yathā'gniḥ sa nirdaheyaṃ sahasā pragṛhya //

pāṇī pṛṣatkālikhitau mamaitau dhanuśca saṅkhye vitataṃ sabāṇam /
pādau cemau surathau sadhvajau ca na mādṛśaṃ yuddhagataṃ bhajanti //