Mahabharata · Chapter 8.75

iti sma kṛṣṇavacanātpratyuccārya yudhiṣṭhiram /
babhūva vimanāḥ pārthaḥ kiñcitkṛtveva pātakam //

tato'bravīdvāsudevaḥ prahasanniva pāṇḍavam /
kathaṃ nāma bhavedetadyadi tvaṃ pārtha dharmajam //

asinā tīkṣṇadhāraṇe hanyā dharme vyasthitam /
tvamityuktvātha rājānamevaṃ kaśmalamāviśaḥ //

hatvā tu nṛpatiṃ pārtha kariṣyasi kimuttaram /
evaṃ hi durvido dharmo mandaprajñairviśeṣataḥ //

sa bhavāndharmabhīrutvāddhavaṃ yāyānmahattamaḥ /
narakaṃ ghorarūpaṃ ca bhrāturjyetusya vai vathāt //

sa tvaṃ dharmabhṛtāṃ śreṣṭhaṃ rājānaṃ dharmasaṃhitam /
prasādaya kuruśreṣṭhametadatra mataṃ mama //

prasādya bhaktyā rājānaṃ prīte caiva yudhiṣṭhire /
prayāvastvaritau yoddhuṃ sūtaputrarathaṃ prati //

hatvā tu samare karṇaṃ tvamadya niśitaiḥ śaraiḥ /
vipulāṃ prītimādhatsva dharmaputrasya mānada //

etadatra mahābāho prāptakālaṃ mataṃ mama /
evaṃ kṛte kṛtaṃ caiva tava kāryaṃ bhaviṣyati //
sañjaya uvāca /

tato'rjuno mahārāja lajjapā vai samanvitaḥ /
dhartarājasya caraṇau prapadya śirasā nataḥ //

uvāca bharataśreṣṭhaṃ prasīdeti punaḥ punaḥ /
kṣamasva rājanyatproktastvaṃ mayā dharmabhīruṇā //

pādayoḥ patitaṃ dṛṣṭvā dharmarājo yudhiṣṭhiraḥ /
dhanañjayamamitraghnaṃ rudantaṃ bharatarṣabham //

utthāpya bhrātaraṃ rājā dharmarājo dhanañjayam /
samāśliṣya ca sasnehaṃ praruroda mahīpatiḥ //

ruditvā suciraṃ kālaṃ bhrātarau sumahādyutī /
kṛtaśaucau mahārāja prītimantau babhūvatuḥ //

tata āśliṣya taṃ premṇā mūrdhni cāghrāya pāṇḍavaḥ / prītyā paramayā yukto vismayaṃśca punaḥpunaḥ /
abravīttaṃ maheṣvāsaṃ dharmarājo dhanañjayam //

karṇena me mahābāho sarvasainyasya paśyataḥ / kavacaṃ ca dhvajaṃ caiva dhanuḥ śaktirhayāḥ śarāḥ /
śaraiḥ kṛttā maheṣvāsa yatamānasya saṃyuge //

so'haṃ dṛṣṭvā raṇe tasya karṇa karṇasya phalguna /
vyavasīdāmi duḥkhena na tu me jīvitaṃ priyam //

na cedadya hi taṃ vīraṃ nihaniṣyasi saṃyuge /
prāṇāneva parityakṣye jīvitārtho hi ko mama //

evamuktaḥ pratyuvāca vijayo bharatarṣabha //

satyena te śape rājaṃstvatpādena tathaiva ca /
bhīmena ca naraśreṣṭha yamābhyāṃ ca mahīpate //

ahamenaṃ naraśreṣṭha sāmātyaṃ ca mahīpate / yathādya samare karṇaṃ haniṣyāmi hatopi vā /
mahītale patiṣyāmi satyenāyudhamālabhe //

evamābhāṣya rājānamabravīnmādhavaṃ vacaḥ / adya karṇaṃ raṇe kṛṣṇa sūdayiṣye na saṃśayaḥ /
tvamanudhyāhi bhadraṃ te vadhaṃ tasya durātmanaḥ //

evamukto'bravītpārthaṃ keśavo rājasattama /
śakto'si bharataśreṣṭha yatnaṃ kartuṃ yadāttha mām //

eṣa cāpi hi me kāmo nityameva mahāratha /
kathaṃ bhavānraṇe karṇaṃ nihanyāditi sattama //

evamuktastato rājanpārtho vacanamabravīt /
hanyate dvairathe bhūyo yujyantāṃ vai rathottame //

upāvṛttāśca turagāḥ śikṣitāścāśvasādibhiḥ /
rathopakaraṇaiḥ sarvaiḥ satvaraṃ yātu me rathaḥ //

evamukto mahārāja phalgunena mahātmanā / uvāca dārukaṃ kṛṣṇaḥ kuru sarvaṃ yadabravīt /
arjuno bhārataśreṣṭhaḥ śreṣṭhaḥ sarvadhanuṣmatām //

ājñaptastvatha kṛṣṇena dāruko rājasattama / yojayāmāsa ca rathaṃ vaiyāghnaṃ śatrutāpanam /
sajjaṃ nivedayāmāsa pāṇḍavasya mahātmanaḥ //

yuktaṃ tu rathamāsthāya dārukeṇa mahātmanā / upasthitaṃ rathaṃ dṛṣṭvā padmanābho raṇāntakṛt /
bhūyaścovāca matimānmādhavo dharmanandanam //

yudhiṣṭhiremaṃ bībhatsuṃ tvaṃ sāntvayitumarhasi /
anujñātuṃ ca karṇasya vadhāyādya durātmanaḥ //

śrutvā hyāvāṃ mahāsaṃkhye tvāṃ karṇaśarapīḍitam /
pravṛttiṃ jñātumāyātāvihāvāṃ pāṇḍunandana //

diṣṭyāsi rājanvirujo diṣṭyā na grahaṇaṃ gataḥ /
parisāntvaya bībhatsuṃ jayamāśādhi cānagha //
yudhiṣṭhira uvāca /

ehyehi pārtha bībhatso māṃ pariṣvaja pāṇḍava /
vaktavyamuktosmyahitaṃ tvayā kṣāntaṃ ca tanmayā //

ahaṃ tvāmanujānāmi jahi karṇaṃ dhanañjaya /
manyuṃ ca mā kṛthāḥ pārtha yanmayokto'si dāruṇaṃ //
sañjaya uvāca /

tato dhanañjayo rājañśirasā praṇatastadā /
pādau jagrāha pāṇibhyāṃ bhrāturjyeṣṭhasya māriṣa //

tamutthāpya tato rājā pariṣvajya ca pīḍitam /
mūrdhnupāghrāya caivainamidaṃ punaruvāca ha //

dhanañjaya mahābāho mānito'smi dṛḍhaṃ tvayā /
māhātmyaṃ vijayaṃ caivaṃ bhūyaḥ prāpnuhi śāśvatam //
arjuna uvāca /

adya taṃ pāpakarmāṇaṃ sānubandhaṃ raṇe śaraiḥ /
nayāmyantaṃ samāsādya rādheyaṃ balagarvitam //

yena tvaṃ pīḍito bāṇairdṛḍhamāyamya kārmukam /
tasyādya karmaṇaḥ karṇaḥ phalamāpsyati dāruṇam //

adya tvāmupayāsyāmi karṇaṃ hatvā mahīpate /
sabhājaye tvāmākrandāditi satyaṃ bravīmi te //

nāhatvā viniṣartiṣye karṇamadya raṇājirāt /
iti satyena te pādau spṛśāmi jagatīpate //
sañjaya uvāca /

iti bruvāṇaṃ sumanāḥ kirīṭinaṃ yudhiṣṭhiraḥ prāha vaco bṛhattaram /
yaśo'kṣayaṃ jīvitamīpsitaṃ te jayaṃ sadā vīryamarikṣayaṃ tadā //

prayāhi vṛddhiṃ ca diśantu devatā yathāhamicchāmi tavāstu tattathā /
prayāhi śīghraṃ jahi karṇamāhave purandaro vṛtramivātmavṛdvaye //