Mahabharata · Chapter 8.74

etacchrutvā pāṇḍavo dharmarājo bhrāturvākyaṃ paruṣaṃ phalgunasya /
utthāya tasmācchayanāduvāca pārthaṃ tato duḥkhaparītacetāḥ //

kṛtaṃ mayā pārthaṃ na sādhukarma yena prāptaṃ vyasanaṃ vaḥ sughoram /
tasmācchiraśchindhi mamaitadadya kulāntakasyādhamapūruṣasya //

pāpasya pāpmohatasya vīra vimūḍhabuddheralasasya bhīroḥ /
vṛddhāvamansuḥ paruṣatya caiva kiṃ te ciraṃ māmanusṛjya rūkṣam //

gacchāmyahaṃ vanamadyaiva pāpaḥ sukhaṃ bhavānvartatāṃ madvihīnaḥ /
yogyo rājā bhīmaseno mahātmā klībasya kiṃ vā mama rājyakṛtyam //

na cāpi śaktaḥ paruṣāṇi soḍhuṃ punastavemāni ruṣānvitasya /
bhīmo'stu rājā mama jīvitena na kāryamadyāvamatasya vīra //

ityevamuktvā sahasotpapāta ruṣānvitastacchayanaṃ vihāya /
iyeṣa nirgantumatho vanāya taṃ vāsudevaḥ praṇato'bhyuvāca //

na rājanviditaṃ tatte yathā gāṇḍīvadhanvanaḥ /
pratijñā satyasandhasya gāṇḍīvaṃ prati viśrutā //

brūyādya enaṃ gāṇḍīvaṃ dehyanyasmai tvamityuta /
vadhyo'sya sa pumām̐lloke tvayā coktoyamīdṛśam //

tataḥ satyāṃ pratijñāṃ tāṃ pārthena pratirakṣatā /
macchandādavamāno'yaṃ kṛtastava mahīpate //

gurūṇāmavamāno hi vadha ityabhidhīyate /
tasmātkṣama mahābāho mama pārthasya cobhayoḥ //

vyatikramamimaṃ rājansatyasaṃrakṣaṇaṃ prati /
śaraṇaṃ tvāṃ mahārāja pratipannāvubhāvapi //

kṣantumarhasi me rājanpraṇatasyābhiyācataḥ /
rādheyasyādya pāpasya bhūmiḥ pāsyati śoṇitam //

satyaṃ te pratijānāmi hataṃ vidvyadya sūtajam /
yasyecchasi vadhaṃ tasya gatamevādya jivītam //

iti kṛṣṇavacaḥ śrutvā dharmarājo yudhiṣṭhiraḥ / sasambhramaṃ hṛṣīkeśamutthāpya praṇataṃ tadā /
kṛtāñjalimuvācedaṃ vākyaṃ yatsamanantaram //

evameva yathāttha tvamastyeṣo'tikramo mama /
anunīto'smi govinda tāritaścāsmi mādhava //

mocitā vyasanāddhorādvayamadya tvayācyuta / bhavantaṃ nāvamāsādya hyāvāṃ vyasanasāgarāt /
ghorādadya samuttīrṇāvubhāvajñānamohitau //

tvadbuddhiplavamāsādya duḥkhaśokārṇavādvayam /
samuttīrṇāḥ sahāmātyāḥ sanāthāḥ sma tvayācyuta //