Mahabharata · Chapter 8.76

prasādya dharmarājānaṃ prahṛṣṭenāntarātmanā / sampūjya devatāḥ sarva brāhmaṇānsvasti vācya ca /
sumaṅgalaṃ svastyayanamāruroha rathottamam //

tasya rājā mahāprājño dharmarājo yudhiṣṭhiraḥ /
āśiṣo'yuṅkta paramāḥ yuktaṃ karṇarathaṃ prati //

tamāyāntaṃ maheṣvāsaṃ dṛṣṭvā bhūtāni bhārata /
nihataṃ menire karṇaṃ pāṇḍavena mahātmanā //

babhūvurvimalāḥ sarvā diśo rājansamantataḥ / cāṣāśca śatapatrāśca krauñcāścaiva janeśvara /
pradakṣiṇamakurvanta tadā vai pāṇḍunandanam //

bahavaḥ pakṣiṇo rājanpunnāmānaḥ śubhāḥ śivāḥ /
tvarayanto'rjunaṃ yuddhe hṛṣṭarūpā vavāśire //

kaṅkā gṛdhrā bakāḥ śyenā vāyasāśca viśāmpate /
agratastasya gacchanti bhakṣyahetorbhayānakāḥ //

nimittāni ca dhanyāni pāṇḍavasya śaśaṃsire /
vināśamarisainyānāṃ karṇasya ca vadhaṃ tathā //

prayātasyātha pārthasya mahānsvedo vyajāyata /
cintā ca vipulā jajñe kathaṃ cedaṃ bhaviṣyati //

viṣaṇṇaṃ tu tato jñātvā savyasācinamacyutaḥ /
sañcodayati tejasvī madhuhā vānaradhvajam //

tato gāṇḍīvadhanvānamabravīnmadhusūdanaḥ /
dṛṣṭvā pārthaṃ tathāyāntaṃ cintāparigataṃ tadā //

gāṇḍīvadhanvansaṅgrāme ye tvayā dhanuṣā jitāḥ /
na teṣāṃ mānuṣo jetā tvadanya iha vidyate //

ete hi bahavaḥ śūrāḥ śakratulyaparākramāḥ /
tvāṃ prāpya samare śūraṃ prayātāḥ paramāṃ gatim //

ko hi droṇaṃ ca bhīṣmaṃ ca bhagadattaṃ ca māriṣa /
vindānuvindāvāvantyau kāmbhojaṃ ca sudakṣiṇam //

śrutāyuṃ cāśrutāyuṃ ca śatāyuṃ ca mahāratham /
pratyudgamya bhavetkṣemī yo na syāttvadvidhaḥ prabhuḥ //

tava hyastrāṇi divyāni lāghavaṃ balameva ca / asammohaśca yuddheṣu vijñānasya ca sannatiḥ /
vedhaḥ pātaśca lakṣeṣu yogaścaiva tathārjuna //

bhavāndevānsagandharvānhanyātsarvāṃśca rākṣasān /
pṛthivyāṃ tu raṇe pārtha na yoddhā tvatsamaḥ pumān //

dhanurgṛhmanti ye kecitkṣatriyā yuddhadurmadāḥ /
ātmanastu samaṃ teṣāṃ na paśyāmi śṛṇomi ca //

brahmaṇā hi prajāḥ sṛṣṭā gāṇḍīvaṃ ca mahaddhanuḥ /
yena tvaṃ yudhyase pārtha tasmānnāsti tvayā samaḥ //

avaśyaṃ tu mayā vācyaṃ yatpathyaṃ tava pāṇḍava /
māvamaṃsthā mahābāho karṇamāhavaśobhinam //

karṇo hi balavāndṛptaḥ kṛtāstraśca mahārathaḥ /
kṛtī ca citrayodhī ca deśakālasya kovidaḥ //

bahunātra kimuktena sankṣepācchṛṇu pāṇḍava / tvatsamaṃ tvadviśiṣṭaṃ vā karṇaṃ manye mahāratham /
paramaṃ yatnamāsthāya tvayā vadhyo mahāhave //

tejasā vahnisadṛśo vāyuvegasamo jave /
antakapratimaḥ krodhe siṃhasaṃhanano balī //

aṣṭaratnirmahābāhurvyūḍhoraskaḥ sudurjayaḥ /
abhimānī ca śūraśca pravīraḥ priyadarśanaḥ //

sarvayodhaguṇairyukto mitrāṇāmabhayaṅkaraḥ /
satataṃ pāṇḍavadveṣī dhārtarāṣṭrahite rataḥ //

sarvairavadhyo rādheyo devairapi savāsavaiḥ /
ṛte tvāmiti me buddhistadadya jahi sūtajam //
devairapi hi saṃyattairbibhradbhirmāṃsaśoṇitam / aśakyaḥ sa ratho jetuṃ sarvairapi yuyutsubhiḥ //

durātmānaṃ pāpavṛttaṃ nṛśaṃsaṃ duṣṭaprajñaṃ pāṇḍaveyeṣu nityam /
hīnasvārthaṃ pāṇḍaveyairvirodhe hatvā karṇaṃ niścitārtho bhavādya //

taṃ sūtaputraṃ rathināṃ variṣṭhaṃ niṣkālikaṃ kālavaśaṃ nayādya /
taṃ sūtaputraṃ rathināṃ variṣṭhaṃ hatvā prītiṃ dharmarāje kuruṣva //

jānāmi te pārthaṃ vīryaṃ yathāva-- ddurvāraṇīyaṃ ca surāsuraiśca /
sadāvajānāti hi pāṇḍuputrā-- nasau darpātsūtaputro durātmā //

ātmānaṃ manyate vīraṃ yena pāpaḥ suyodhanaḥ /
tamadya mūlaṃ pāpānāṃ jahi sautiṃ dhanañjaya //

khaṅgajihvaṃ dhanurāsyaṃ śaradaṃṣṭraṃ tarasvinam /
dṛptaṃ puruṣaśārdūlaṃ jahi karṇaṃ dhanañjaya //

ahaṃ tvāmanujānāmi vīryeṇa ca balena ca /
jahi karṇaṃ raṇe śūraṃ mātaṅgamiva kesarī //

yasya vīryeṇa vīryaṃ te dhārtarāṣṭro'vamanyate /
tamadya pārtha saṅgrāme karṇaṃ vaikartanaṃ jahi //