Mahabharata · Chapter 8.63

nivṛtte bhīmasene ca pāṇḍave ca yudhiṣṭhire /
vadhyamāne bale cāpi māmake pāṇḍusṛñjayaiḥ //

dravamāṇe balaughe ca nirākrande muhurmuhuḥ /
avaśeṣaṃ na paśyāmi mama sainyeṣu sañjaya //

aho bata daśāṃ prāpto na hi śakṣyāmi jīvitum /
jayakāṅkṣī kathaṃ sūta putrāṇāmanivartinām //

kathaṃ jīvāmi nihatāñśrutvā ca mama sainikān /
bahunā'dya kimuktena daivaṃ teṣāṃ parāyaṇam //

māmakāḥ kimakurvanta tanmamācakṣva sañjaya //
sañjaya uvāca /

dṛṣṭvā bhīmaṃ mahābāhuṃ tava putraḥ pratāpavān /
krodharaktekṣaṇo rājanbhīmasenamabhidravat //

tiṣṭhatiṣṭha pṛthāputra paśya me'dya parākramam / adya tvāṃ preṣāyaṣyāmi yamasya sadanaṃ prāte /
ityuktvā prayayau karṇo yatra bhīmo vyavasthitaḥ //

tāvakaṃ tu balaṃ dṛṣṭvā bhīmasenātparāṅmukham /
yatnena mahatā karṇaḥ paryavasthāpayadbalī //

vyavasthāpya mahābāhustava putrasya vāhinīm /
pratyudyayau tadā karṇaḥ pāṇḍavānyuddhadurmadān //

pratyudyayuśca rādheyaṃ pāṇḍavānāṃ mahārathāḥ /
dhunvānāḥ kārmukāṇyājau vikṣipantaśca sāyakān //

bhīmasenaḥ śinernaptā śikhaṇḍī janamejayaḥ /
dhṛṣṭadyumnaśca balavānsarve cāpi prabhadrakāḥ //

pāñcālānāṃ naravyāghrāḥ samantāttva vāhinīm /
abhyadravanta saṅkruddhāḥ samare jitakāśinaḥ //

tathaiva tāvakā rājanpāṇḍavānāmanīkinīm /
abhyadravanta tvaritā jighāṃsanto mahārathān //

rathanāgāśvakalilaṃ pattidhvajasamākulam /
babhūva puruṣavyāghra sainyamadbhutadarśanam //

śikhaṇḍī tu yayau karṇaṃ dhṛṣṭadyumnaḥ sutaṃ tava /
duḥśāsanaṃ mahārāja mahāsenaḥ samabhyayāt //

nakulo vṛṣasenaṃ tu citrasenaṃ yudhiṣṭhiraḥ /
ulūkaṃ samare rājansahadevaḥ samabhyayāt //

sātyakiḥ śakuniṃ cāpi draupadeyāśca kauravān /
arjunaṃ ca raṇe yatto droṇaputro mahārathaḥ //

yudhāmanyuṃ maheṣvāsaṃ gautamo'bhyapatadraṇe /
kṛtavarmā ca balavānuttamaujasamādravat //

bhīmasenaḥ kurūnsarvānputrāṃśca tava māriṣa /
sahānīkānmahābāhureka eva nyavārayat //

śikhaṇḍī tu tataḥ karṇaṃ vicarantamabhītavat /
bhīṣmahantā mahārāja vārayāmāsa patribhiḥ //

pratiruddhastataḥ karṇo ropātprasphuritādharaḥ /
śikhaṇḍinaṃ tribhirbāṇairbhruvormadhye'bhyatāḍayat //

dhārayaṃstu sa tānvāṇāñśikhaṇḍī bahvaśobhata /
rājataḥ parvato yadvattribhiḥ śṛṅgaiḥ samanvitaḥ //

so'tividdho maheṣvāsaḥ sūtaputreṇa saṃyuge /
karṇaṃ vivyādha samare navatyā niśitaiḥ śaraiḥ //

tasya karṇo hayānhatvā sārathiṃ ca śaraiḥ /
unmamātha dhvajaṃ cāsya kṣurapreṇa mahārathaḥ //

hatāśvāttu tato yānādavaplutya mahārathaḥ /
śaktiṃ cikṣepa karṇāya saṅkruddhaḥ śatrutāpanaḥ //

tāṃ chittvā samare karṇastribhirbhārata sāyakaiḥ /
śikhaṇḍinamathāvidhyannavabhirniśitaiḥ śaraiḥ //

karṇacāpacyutānbāṇānvarjayaṃstu narottamaḥ /
apayātastatastūrṇaṃ śikhaṇḍī bhṛśavikṣataḥ //

tataḥ karṇo mahārāja pāṇḍusainyānyaśātayat /
tūlarāśiṃ samāsādya yathā vāyurmahābalaḥ //

dhṛṣṭadyumno mahārāja tava putreṇa pīḍitaḥ /
duḥśāsanaṃ tribhirbāṇaiḥ pratyavidhyatstanāntare //

tasya duḥśāsano bāhuṃ savyaṃ vivyādha māriṣa /
sa tena rukmapuṅkhena bhallena nataparvaṇā //

dhṛṣṭadyumnastu nirviddhaḥ śaraṃ ghoramamarṣaṇaḥ /
duḥśāsanāya saṅkruddhaḥ preṣayāmāsa bhārata //

āpatantaṃ mahāvegaṃ dhṛṣṭadyumnasamīritam /
śaraiściccheda putraste tribhireva viśāmpate //

athāparaiḥ ṣoḍaśabhirbhallaiḥ kanakabhūṣaṇaiḥ /
dhṛṣṭadyumnaṃ samāsādya bāhvorurasi cārpayat //

tataḥ sa pārṣataḥ kruddho dhanuściccheda māriṣa /
kṣurapreṇa sutīkṣṇena tata uccukruśurjanāḥ //

athānyaddhanurādāya putraste prahasanniva /
dhṛṣṭadyumnaṃ śaravrātaiḥ samantātparyavārayat //

tava putrasya te dṛṣṭvā vikramaṃ sumahātmanaḥ /
vyasmayanta raṇe yodhāḥ siddhāścāpsarasastathā //

dhṛṣṭadyumnaṃ tu paśyāma ghaṭamānaṃ mahābalam /
duḥśāsanena saṃruddhaṃ siṃheneva mahāgajam //