Mahabharata · Chapter 8.64

tataḥ sarathanāgāśvāḥ pāñcālāḥ pāṇḍusṛñjayāḥ /
senāpatiṃ parīpsanto rurudhustanayaṃ tava //

tataḥ pravavṛte yudvaṃ tāvakānāṃ paraiḥ saha /
ghoraṃ prāṇabhṛtāṃ kāle bhīmarūpaṃ parantapa //

nakulo vṛṣasenaṃ tu viddhvā pañcabhirāyasaiḥ /
pituḥ samīpe tiṣṭhantaṃ tribhirantyairavidhyata //

nakulaṃ tu tataḥ śūro vṛṣaseno hasanniva /
nārācena sutīkṣṇena vivyādha hṛdaye bhṛśam //

so'tividdho balavatā śatruṇā śatrukarśana /
śatruṃ vivyādha viṃśatyā sūtaṃ caivāsya saptabhiḥ //

tataḥ śarasahasreṇa tāvubhau puruṣarṣabhau /
anyonyamācchādayatāṃ tavābhajyata vāhinī //

sa dṛṣṭvā pradrutāṃ senāṃ dhārtarāṣṭrasya sūtajaḥ /
nivārayāmāsa balādanupatya viśāmpate //

etasminnantare yuddhaṃ kaṣṭamāsīdviśāmpate /
nivṛtte tu tataḥ sainye nakulaḥ kauravānyayau //

karṇaputrastu samare hitvā nakulameva tu /
jugopa cakraṃ tvarito rādheyasyaiva māriṣa //

ulūkastu raṇe kruddhaḥ sahadevena māriṣa /
nivāritaḥ śaraśataiḥ kruddhena raṇamūrdhani //

tasyāśvāṃścaturo hatvā sahadevaḥ pratāpavān /
sārathiṃ preṣayāmāsa yamasya sadanaṃ prati //

ulūkastu tato yānādavaplutya viśāmpate /
trigartānāṃ balaṃ tūrṇaṃ jagāma pitṛnandanaḥ //

sātyakiḥ śakuniṃ viddhvā viṃśatyā niśitaiḥ śaraiḥ /
dhvajaṃ ciccheda bhallena saubalasya hasanniva //

saubalastasya samare kruddho rājanpratāpavān /
vidārya kavacaṃ bhūyo dhvajaṃ ciccheda kāñcanam //

tathainaṃ niśitairbāṇaiḥ sātyakiḥ pratyavidhyata /
sārathiṃ ca mahārāja tribhireva samārpayat //

athāsya vāhāṃstvaritaḥ śarairnitye yamakṣayam /
tato'vaplutya sahasā śakunirbharatarṣabha //

āruroha rathaṃ tūrṇamulūkasya mahātmanaḥ /
apovāhātha śīghraṃ sa śaineyādyuddhaśālinaḥ //

sātyakistu raṇa rājaṃstāvakānāmanīkinīm /
abhidudrāva vegena tato'nīkamabhajvata //

śaineyaśarasañchannaṃ tava sainyaṃ viśāmpate /
bheje daśā diśastūrṇaṃ nyapatacca gatāsuvat //

bhīmasenaṃ tava suto vārayāmāsa saṃyuge //

taṃ tu bhīmo muhūrtena vyaśvasūtarathadhvajam /
cakre lokeśvaraṃ tatra tenātuṣyanta vai janāḥ //

tato'pāyānnṛpastasmādbhīmasenabhayārditaḥ / kurusainyaṃ tataḥ sarvaṃ bhīmasenamupādravat /
tatra nādo mahānāsīddhīmasenaṃ jighāṃsatām //

yudhāmanyuḥ kṛpaṃ viddhvā dhanurasyāśu cicchade / athānyaddhanurādāya kṛpaḥ śastrabhṛtāṃ varaḥ /
yudhāmanyordhvajaṃ sūtaṃ chatraṃ cāpātayatkṣitau //

tato'pāyādrathenaiva yudhāmanyurmahārathaḥ //

uttamaujāśca hārdikyaṃ bhīmaṃ bhīmaparākramam /
chādayāmāsa sahasā megho vṛṣṭyeva parvatam //

tadyuddhamāsītsumahaddhorarūpaṃ parantapa /
tādṛśaṃ na mayā yuddhaṃ dṛṣṭapūrvaṃ viśāmpate //

kṛtavarmā tato rājannuttamaujasamāhave /
hṛdi vivyādha sahasā rathopastha upāviśat //

sārathistamapovāha rathena rathināṃ varam /
tatastu sātvato rājanpāṇḍusainyamabhidravat //

[duḥśāsanaḥ saubalaśca gajānīkena pāṇḍavam /
mahatā parivāryaiva kṣudrakairabhyatāḍayat //

tato bhīmaḥ śaraśatairduryodhanamamarṣaṇam /
vimukhīkṛtya tarasā gajānīkamupādravat //

tamāpatantaṃ sahasā gajānīkaṃ vṛkodaraḥ /
dṛṣṭvaiva subhṛśaṃ kruddho divyamastramudairayat //

gajairgajānabhyahanadvajreṇendra ivāsurān //

tato'ntarikṣaṃ bāṇaughaiḥ śalabhairiva pādapam /
chādayāmāsa samare gajānnighnanvṛkodaraḥ //

tataḥ kuñjarayūthāni sametāni sahasraśaḥ /
vyadhamattarasā bhīmo meghasaṅghānivānilaḥ //

suvarṇajālāpihitā maṇijālaiśca kuñjarāḥ /
rejurabhyadhikaṃ saṃkhye vidyutvanta ivāmbudāḥ //

te vadhyamānā bhīmena gajā rājanvidudruvuḥ /
kecidvibhinnahṛdayāḥ kuñjarā nyapatanbhuvi //

patitairnipatadbhiśca gajairhemavibhūṣitaiḥ /
aśobhata mahī tatra viśīrṇairiva parvataiḥ //

dīptābhai ratnavadbhiśca patitairgajayodhibhiḥ /
rarāja bhūmiḥ patitaiḥ kṣīṇapuṇyairiva grahaiḥ //

tato bhinnakaṭā nāgā bhinnakumbhakarāstathā /
dudruvuḥ śataśaḥ saṃkhye bhīmasenaśarāhatāḥ //

kecidvamanto rudhiraṃ bhayārtāḥ parvatopamāḥ /
vyadravañcharaviddhāṅgā dhātucitrā ivācalāḥ //

mahābhujagasaṅkāśau candanāgururūṣitau /
apaśyaṃ bhīmasenasya dhanurvikṣipato bhujau //

tasya jyātalanirghoṣaṃ śrutvāśanisamasvanam /
vimuñcantaḥ śakṛnmūtraṃ gajāḥ prādudruvurbhṛśam //

bhīmasenasya tatkarma rājannekasya dhīmataḥ / nighnataḥ sarvabhūtāni rudrasyeva ca nirbabhau // ] //