Mahabharata · Chapter 8.59

tataḥ pravavṛte bhūyaḥ saṅgrāmo rājasattama /
karṇasya pāṇḍavānāṃ ca yamarāṣṭravivardhanaḥ //

dhanūṃṣi bāṇānparighānasipaṭṭasatomarān /
musalāni bhuśuṇḍīśca śaktiriṣṭiparaśvathān //

gadāḥ prāsāñśitānkuntānbhiṇḍipālānmahāṅkuśān /
pragṛhya kṣipramāpetuḥ parasparajighāṃsayā //

bāṇajyātalaśabdena dyāṃ diśaḥ pradiśo viyat /
pṛthivīṃ nemighoṣeṇa nādayanto'bhyayuḥ parān //

tena śabdena mahatā saṃhṛṣṭāścakrurāhavam /
vīrā vīrairmahāptorakalahāntaṃ titīrṣavaḥ //

jyātalatradhanuḥśabdāñśastrāṇāṃ ca nipātyatām /
tāḍitānāṃ ca patatā ninādāṃśca padātinām //

bāṇaśabdāṃśca vividhāñśūrāṇāṃ cābhigarjatām /
śrutvā gajā bhṛśaṃ tresuḥ peturmamluśca sainikāḥ //

teṣāṃ ninadatāṃ caiva śastravarṣaṃ ca muñcatām /
bahūnādhirathirvīraḥ pramamātheṣubhiḥ parān //

pañca pāñcālavīrāṇāṃ rathāndaśa ca pañca ca /
sāśvasūtadhvajānkarṇaḥ śarairninye yamakṣayam //

yodhamukhyā mahāvīryāḥ pāṇḍūnāṃ karṇamāhave /
śikṣitāstamabhidrutya parivavruḥ samantataḥ //

tataḥ karṇo dviṣatsenāṃ śaravarṣairviloḍayan /
vijagāhāṇḍajākīrṇāṃ padminīmiva yūthapaḥ //

dviṣatsainyamavaskandya rādheyo dhanuruttamam /
vidhunvānaḥ śitairbāṇaiḥ śirāṃsyunmathya pātayat //

hastinaḥ samahāmātrānsāśvārohānhayānapi /
rathino'pyekabāṇena bhramataścāvapātayat //

varma vā carma vā'śritya nipātamapi dehinaḥ /
viṣehurnāsya saṃsparśaṃ dvitīyasya patattriṇaḥ //

varmayukteṣu deheṣu dhanuṣo'syañśitāñśarān /
maurvyā talatre nyahanatkaśayā vājino yathā //

pāṇḍusṛñjayapāñcālāñśaragocaramāgatān /
mamarda tarasā karṇaḥ siṃho mṛgagaṇāniva //

tataḥ pāñcālaputraśca draupadeyāśca māriṣa /
yamau ca yuyudhānaśca tvaritāḥ karṇamabhyayuḥ //

teṣu vyāyacchamāneṣu kurupāñcālapāṇḍuṣu /
priyānasūnraṇe tyaktvā yodhā jaghnuḥ parasparam //

susannaddhāḥ kavacinaḥ saśirastrāṇabhūṣaṇāḥ /
gadābhirmusalaiścānye parighaiśca mahābālāḥ //

samabhyadhāvanta bhṛśaṃ kāladaṇḍairivodyataiḥ /
nardantaścāhvayantaśca pravalgantaśca māriṣa //

tato nijaghnuranyonyaṃ petuścānyonyatāḍitāḥ /
vamanto rudhiraṃ gātrairvimastiṣkekṣamāyudhāḥ //

dantapūrṇaiḥ sarudhirairvakrairdāḍimasannibhaiḥ /
jīvanta iva cāpyeke tasthuḥ śastraughabṛṃhitāḥ //

paraśvathaiścāpyapare paṭṭasairasibhistathā /
śaktibhirbhiṇḍipālaiśca nakharaprāsatomaraiḥ //

tatakṣuścicchiduścānye bibhiduścikṣipustathā /
sañcakartuśca jaghnuśca rājanyodhā mahāraṇe //

peturanyonyanihatā vyasavo rudhirokṣitāḥ /
kṣarantaḥ svarasaṃ raktaṃ prakṛttāścandanā iva //

rathai rathā vinihatā hastibhiścāpi hastinaḥ /
narairnarā hatāḥ peturaśvāścāśvaiḥ sahasraśaḥ //

dhvajāḥ śirāṃsi cchinnāḥ peturmahītale // vadhyatāṃ dāruṇāḥ śabdāḥ patatāṃ stanatāmapi /

kṣurairbhallārdhacandraiśca cchinnāḥ peturmahītale //
narāśvebharathānāṃ hinarāśvebharathaistathā //

narāṃśca nāgāṃśca rathānhayānmamṛdurāhave //

aśvārohairhatāḥ śūrāśchinnahastāśca dantinaḥ /
sapatākādhvajāḥ peturviśīrṇā iva parvatāḥ //

pattibhiśca samāplutya dviradāḥ syandanāstathā /
hatāśca hanyamānāśca patitāścaiva sarvaśaḥ //

aśvārohāḥ samāsādya tvaritāḥ pattibhirhatāḥ /
sādibhiḥ pattisaṅghāśca nihatā yudhi śerate //

mṛditānīva padmāni pramlānā iva ca srajaḥ /
hatānāṃ vadanānyāsangātrāṇi ca mahāhave //

rūpāṇyatyarthakāntāni dviradāśvanṛṇāṃ nṛpa /
samunnānīva vastrāṇi yayurdurdurśatāṃ parām //