Mahabharata · Chapter 8.60

hastibhistu mahāmātrāstava putreṇa coditāḥ /
dhṛṣṭadyumnaṃ ghnatetyāśu kruddhāḥ pārṣatamabhyayuḥ //

prācyāśca dākṣiṇātyāśca pravarā gajayodhinaḥ /
aṅgā vaṅgāśca puṇḍrāśca māgadhāstāmraliptakāḥ //

mekalāḥ kośalā madrā daśārṇā niṣadhāstathā /
gajayuddheṣu kuśalāḥ kaliṅgaiḥ saha bhārata //

śaratomaranārācairvṛṣṭimanta ivāmbudāḥ /
siṣicuste tataḥ sarve pāñcālabalamāhave //

tānabhidravato nāgānmadavegasamuddhatān /
vipāṭhakṣuranārācairdhṛṣṭadyumno hyavīvṛṣat //

ekaikaṃ daśabhiḥ ṣa़ḍbhiraṣṭābhirapi pārṣataḥ /
dviradānabhivivyādha kṣipraṃ girinibhāñśaraiḥ //

pracchādyamānaṃ dviradairmeghairiva divākaram /
paryayuḥ pāṇḍupāñcālā nadanto hyāttakārmukāḥ //

tānnāgānabhivarṣanto jyātalatravinādinaḥ / vīranṛtyaṃ pranṛtyantaḥ śūratālapracoditaiḥ /
nakulaḥ sahadevaśca draupadeyāḥ prabhadrakāḥ //

sātyakiśca śikhaṇḍī ca cekitānaśca vīryavān /
samantātsiṣicurvīrā meghāstoyairivācalān //

te mlecchaiḥ preṣitā nāgā narānaśvānrathānapi /
hastairākṣipya mamṛduḥ padbhiścāpyatimanyavaḥ //

bibhiduśca viṣāṇāgraiḥ samākṣipya ca cikṣipuḥ /
viṣāṇalagnāścāpyanye paripeturvibhīṣaṇāḥ //

pramukhe vartamānaṃ tu dvipamaṅgasya sātyakiḥ /
nārācenogravegena bhittvā marmāṇyatāḍayat //

tasyāvarjitakāyasya dviradādutpatiṣyataḥ /
nārācenāhanadvakṣaḥ sātyakiḥ so'patadbhuvi //

puṇḍrasyāpatato nāgaṃ calantamiva parvatam /
sahadevaḥ prasannāgrairnārācairahanattribhiḥ //

vipatākaṃ viyantāraṃ vivarmadhvajajīvitam /
taṃ kṛtvā dviradaṃ bhūyaḥ sahadevo'ṅgamabhyayāt //

sahadevaṃ tu nakulo vārayitvāṅgamārdayat /
nārācairyamadaṇḍābhaistribhirnāgaṃ śatena tam //

divākarakaprakhyānaṅgaścikṣepa tomarān /
nakulāya śatānyaṣṭau tridhaikaikaṃ tu so'cchinat //

tathā'rdhacandreṇa śirastasya ciccheda pāṇḍavaḥ /
sa papāta hato mlecchastenaiva saha dantinā //

athāṅgaputre nihate hastiśikṣāviśārade /
aṅgāḥ kruddhā mahāmātrā nāgairnakulamabhyayuḥ //

calatpatākaiḥ sumukhairhemakakṣyātanucchadaiḥ /
mimardiṣantastvaritāḥ pradīptairiva parvataiḥ //

mekalotkalakāliṅgā niṣadhāstāmraliptakāḥ /
śaratomaravarṣāṇi vimuñcanto jighāṃsavaḥ //

taiśchādyamānaṃ nakulaṃ niśākaramivāmbudaiḥ /
paripetuḥ susaṃrabdhāḥ pāṇḍupāñcālasātyakāḥ //

tatastadabhavadyuddhaṃ rathināṃ hastibhiḥ saha /
sṛjatāṃ śaravarṣāṇi tomarāṃśca sahasraśaḥ //

nāgānāṃ prāsphuṭankumbhā marmāṇi ca nakhāni ca /
dantāścaivātividdhānāṃ nārācairhemabhūṣaṇaiḥ //

teṣāmaṣṭau mahānāgāṃścatuḥṣaṣṭyā sutejanaiḥ /
nārācaiḥ sahadevastānpātayāmāsa sādibhiḥ //

añjogatibhirāyamya prayatnāddhanuruttamam /
nārācairahanannāgānnakulaḥ kulanandanaḥ //

tataḥ pāñcālaśaineyau draupadeyāḥ prabhadrakāḥ /
śikhaṇḍī ca mahānāgānsiṣicuḥ śaravṛṣṭibhiḥ //

te pāṇḍuyodhāmbudharaiḥ śatrudviradaparvatāḥ /
bāṇavarṣairhatāḥ peturvajravarṣairivācalāḥ //

evaṃ hatvā tava gajāṃste pāṇḍurathakuñjarāḥ /
drutaṃ senāṃ ca varṣanto bhinnakūlāmivāpagām //

tāṃ te senāṃ samāloḍya pāṇḍuputrasya sainikāḥ /
vikṣobhayitvā ca punaḥ karṇaṃ samabhidudruvuḥ //