Mahabharata · Chapter 8.58

evamuktaḥ pratyuvāca dhṛṣṭadyumnaḥ pratāpavān /
āśiṣaṃ tāṃ pravaktavyāṃ māmako dāsyate tava //

yenaiva te piturdattā yatamānasya saṃyuge / eṣa te prativākyaṃ vai asirdāsyati māmakaḥ /
yena kṛttaṃ tava pituryatamānasya tacchiraḥ //

yadi tāvanmayā droṇo nihato brāhmaṇabruvaḥ /
tvāmidānīṃ kathaṃ yuddhe na haniṣyāmi kilbiṣam //

evamuktvā mahātejāḥ senāpatirarindamaḥ /
sutīkṣṇenātha bhallena drauṇiṃ vivyādha pārṣataḥ //

tato drauṇiḥ susaṅkruddhaḥ śaraiḥ sannataparvabhiḥ /
ācchādayaddiśo rājandhṛṣṭadyumnasya saṃyuge //

naivāntarikṣaṃ na diśo nāpi yodhāḥ sahasraśaḥ / dṛśyante vai mahārāja śaraiśchannāḥ samantataḥ /
ekaḥ sanvārayāmāsa prekṣaṇīyaḥ samantataḥ //

tathaiva pārṣato rājandrauṇimāhavaśobhinam /
śaraiḥ sañchādayāmāsa sūtaputrasya paśyataḥ //

rādheyo'pi mahārāja pāñcālānsaha pāṇḍavaiḥ /
draupadeyā yudhāmanyumuttamaujasameva ca //

sātyakiśca mahārāja yodhāṃścānyānsahasraśaḥ /
ekastānvārayāmāsa prekṣaṇīyaḥ samantataḥ //

dhṛṣṭadyumnastu samare drauṇeściccheda kārmukam /
kṣurapreṇa sutīkṣṇena paśyatāṃ sarvayodhinām //

tadapāsya dhanuśchinnamanyadādatta kārmukam /
vegavatsamare ghoraṃ śarāṃścāśīviṣopamān //

sa pārṣatasya rājendra dhanuḥ śaktiṃ gadāṃ dhvajam /
hayānsūtaṃ rathaṃ caiva nimeṣādvyadhamaccharaiḥ //

sa cchinnadhanvā viratho hatāśvo hatasārathiḥ /
khaṅgamādatta vipulaṃ śatacandraṃ ca bhānumat //

drauṇistadapi rājendra bhallaiḥ kṣipraṃ mahārathaḥ /
ciccheda samare vīraḥ kṣiprahasto dṛḍhāyudhaḥ //

rathādanavarūḍhasya dhanvino bāhuśālinaḥ /
paśyatāṃ sarvasainyānāṃ tadadbhutamivābhavat //

dhṛṣṭadyumnaṃ tu virathaṃ hatāśvarathasārathim / śastraiśca bahudhā viddhamastraiśca śakalīkṛtam /
nātaradbharataśreṣṭha yadamāno mahārathaḥ //

tasyāntamiṣubhī rājanyadā drauṇirna gacchati / atha tyaktvā rathaṃ vīraḥ pārṣataṃ tvarito'nvagāt /
pragṛhya vipulaṃ khahgaṃ jātarūpapariṣkṛtam //

tasya sampatato rājanvapurāsīnmahātmanaḥ /
garuḍasyeva tato jighṛkṣoḥ pannagottamam //

etasminneva kāle tu keśavaḥ paravīrahā /
abravīdbharataśreṣṭhamarjunaṃ jayatāṃ varam //

paśya drauṇiṃ pārṣatasya yatamānaṃ vadhaṃ prati /
yatnaṃ karoti vipulaṃ hanyāccainaṃ na saṃśayaḥ //

trāyasvainaṃ mahābāho pārṣataṃ yuddhadurmadam /
drauṇerāsyagataṃ vīra mṛtyorāsyagataṃ yathā //

evamuktvā mahārāja vāsudevaḥ pratāpavān /
praiṣayatturagānyatra drauṇirvīro vyavasthitaḥ //

te hayāścandrasaṅkāśāḥ keśavena pracoditāḥ /
pibanta iva cākāśaṃ jagmudrauṇermahāratham //

dṛṣṭvā drauṇirmahārāja vāsudevadhanañjayau /
dhṛṣṭadyumnavadhe rājaṃścakre yatnaṃ mahābalaḥ //

vikṛṣyamāṇaṃ dṛṣṭvai dhṛṣṭadyumnaṃ janeśvara /
śarāṃścikṣepa vai pārtho drauṇiṃ prati mahārathaḥ //

te śarā hemavikṛtā gāṇḍīvapreṣitā bhṛśam /
drauṇimāsādya viviśurvalmīkamiva pannagāḥ //

viddhastu taiḥ śarairghoraidroṇaputraḥ pratāpavān /
utsṛjya samare rājanpāñcālamamitaujasam //

āruroha rathaṃ vīro dhanañjayaśarārditaḥ /
pragṛhya ca dhanuḥ śreṣṭhaṃ pārthaṃ vivyādha sāyakaiḥ //

etasminnantare śūraḥ sahadevo janādhipa /
apovāha rathenājau pārṣataṃ śatrutāpanam //

arjuno'pi mahārāja drauṇiṃ vivyādha patribhiḥ /
taṃ droṇaputraḥ saṃrabdho bāhvorurasi cārpayat //

krodhitastu raṇe pārtho nārācaṃ kālasannibham /
droṇaputrāya cikṣepa yamadaṇḍamivāparam //

sa brāhmaṇasyāṃsadeśe nipapāta mahādyuteḥ / sa vihvalo mahārāja śaravegena saṃyuge /
niṣasāda rathopasthe vaiklavyaṃ paramaṃ yayau //

taṃ tu matvā hataṃ vīraṃ sārathiḥ śatrukarśanam /
apovāha raṇenājau tvaramāṇo raṇājirāt //

athoddhṛṣṭaṃ mahārāja pāñcālairjitakāśibhiḥ /
mokṣitaṃ pārṣataṃ dṛṣṭvā droṇaputraṃ ca pīḍitam //

vāditrāṇi ca divyāni prāvādyanta sahasraśaḥ /
siṃhanādaśca sañjajñe dṛṣṭvā yuddhaṃ tadadbhutam //

tataḥ karṇo mahārāja vyākṣipadvijayaṃ dhanuḥ / dṛṣṭvārjunaṃ raṇe kruddhaḥ prekṣate ca muhurmuhuḥ /
dvairathaṃ cāpi pārthena gantukāmo mahādyutiḥ //

evaṃ kṛtvā'bravītpārtho vāsudevaṃ dhanañjayaḥ /
yāhi saṃśaptakānkṛṣṇa kāryametatparaṃ mama //

tataḥ prayāto govindaḥ śrutvā pāṇḍavabhāṣitam /
rathenātipatākena manomārutaraṃhasā //

evameṣa kṣayo vṛttaḥ pṛthivyāṃ pṛthivīpate /
tāvakānāṃ pareṣāṃ ca rājandurmantrite tava //