Mahabharata · Chapter 8.55

pratyetyātha punarjiṣṇurjitvā saṃśaptakānbabhau /
vakrānuvakragamanādaṅgāraka iva grahaḥ //

pārthabāṇahatā rājannarāśvarathakuñjarāḥ /
vicelurbabhramurneśuḥ peturmamluśca bhārata //

dhuryāndhuryetarānsūtāndhvajāṃścapāsisāyakān /
pāṇīnpāṇigatāñśastrānbāhūnapi śirāṃsi ca //

bhallaiḥ kṣurairardhacandrairvatsadantaiśca pāṇḍavaḥ /
cicchedāmitravīrāṇāṃ samare pratiyudhyatām //

taṃ pravīrāstvadīyānāṃ nardamānā'bhidudruvuḥ / vāsitārthe yuyutsanto vṛṣabhā vṛṣabhaṃ yathā /
nipatantyarjunaṃ śūrāḥ śataśo'tha sahasraśaḥ //

teṣāṃ tasya ca tadyuddhamabhavadromaharṣaṇam /
trailokyavijaye yādṛgdaityānāṃ saha vajriṇā //

tamavidhyattribhirbāṇairdandaśūkairivāhibhiḥ /
ugrāyudhasya tasyāśu śiraḥ kāyādapāharat //

te'rjunaṃ sarvataḥ kruddhā nānāśastrairavīvṛṣan /
marudbhiḥ preritā meghā himavantamivoṣṇage //

astrairastrāṇiṃ saṃvārya dviṣatāṃ sarvato'rjunaḥ /
samyagastaiḥ śaraiḥ sarvānahitānahanadbahūn //

chinnatriveṇujaṅgheṣānhatāśvānhatasārathīn /
visrastahastatūṇīrānvicakrathaketanān //

sañchinnaraśmiyoktrākṣānvyanukarṣayugānrathān /
vidhvastasarvasannāhānbāṇaiścakre'rjunastvaran //

te rathāstatra vidhvastāḥ parārdvyā bhāntyanekaśaḥ /
dhanināmiva veśmāni hatānyagnyanilāmbubhiḥ //

dvipāḥ sambhinnamarmāṇo vajrāśanisamaiḥ śaraiḥ /
peturgiryagraveśmāni vajravātāgnibhiryathā //

anekaiśca śilādhautairvajrānalaviṣopamaiḥ /
śarairnijaghnivānpārtho mahendra iva dānavān //

sārohāsturagāḥ peturbahavo'rjunatāḍitāḥ /
nirjihvāntrāḥ kṣitau kṣīṇā rudhirārdrāḥ sudurdṛśaḥ //

narāśvanāgā nārācaiḥ saṃsyūtāḥ savyasācinā /
babhramuścaskhaluḥ peturnedurmamluśca māriṣa //

mahārhavarmābharaṇā nānārūpāmbarāyudhāḥ /
sarathāśvadvipā vīrā hatāḥ pārthena śerate //

nirbhayāḥ puṇyakarmāṇo viśiṣṭābhijanaśrutāḥ /
gatāḥ śarīrairvasudhāmūrjitaiḥ karmabhirdivam //

athārjunarathaṃ vīrāstvadīyāḥ samabhidravan /
nānājanapadādhyakṣāḥ sagaṇā jātamanyavaḥ //

uhyamanā rathāśvebhaiḥ pattayaśca jighāṃsavaḥ /
samabhyadhāvannasyanto vividhaṃ kṣipramāyudham //

tadāyudhamahāvarṣaṃ kṣiptaṃ yodhamahāmbudaiḥ /
vyadhamanniśitairbāṇaiḥ kṣipramarjunamārutaḥ //

sāśvapattidviparathaṃ mahāśastraughasamplavam //
sahasā santitīrṣantaṃ pārthaṃ śastrāstrasetunā //

athābravīdvāsudevaḥ pārtha kiṃ krīḍase'nagha /
saṃśaptakānpramathyaināṃstataḥ karṇavadhe tvara //

tathetyuktvā'rjunaḥ kṛṣṇaṃ śiṣṭānsaṃśaptakāṃstadā /
kṣapayiṣyaṃstadā bāṇairdaityānindra ivāvadhīt //

ādadatsandadhanneṣṛndṛṣṭaḥ kaiścidraṇe'rjunaḥ /
vimuñcanvā śarāñśīghraṃ dṛśyante vai narā hatāḥ //

āścaryamiti govindo bruvannaśvānacodayat /
haṃsāṃśugaurāste senāṃ haṃsāḥ sara ivāviśan //

tataḥ saṅgrāmabhūmiṃ tāṃ vartamāne janakṣaye /
avekṣamāṇo govindaḥ savyasācinamabravīt //

eṣa pārtha mahāraudro vartate bharatakṣayaḥ /
pṛthivyāṃ pārthivānāṃ vai duryodhanakṛte mahān //

paśya bhārata cāpāni rukmapṛṣṭhāni dhanvinām /
hatānāmapaviddhāni kalāpāniṣudhīṃstathā //

jātarūpamayaiḥ puṅkhaiḥ śarāṃśca nataparvaṇaḥ /
tailadhautāṃśca nārācānnirmuktāniva pannagān //

ākīrṇāṃstomarānvāhāṃśchatrānhemavibhūṣitān /
carmāṇi cāpaviddhāni rukmapṛṣṭhāni bhārata //

suvarṇavikṛtānprāsāñśaktīḥ kanakabhūṣitāḥ /
jāmbūnadamayaiḥ paṭṭairbaddhāśca vipulā gadāḥ //

jātarūpamayīścarṣṭīḥ paṭṭasānhemabhūṣitān /
daṇḍaiḥ kanakacitraiśca vipraviddhānparaśvathān //

parighānbhiṇḍipālāṃśca bhuśuṇḍīḥ kaṇapānapi /
ayaskuntāṃśca patitānmusalāni gurūṇi ca //

nānāvidhāni śastrāṇi pragṛhya jayagṛddhinaḥ /
jīvanta iva dṛśyante gatasatvāstarasvinaḥ //

gadāvimathitairgātrairmusalairbhinnamastakān /
gajavājirathaiḥ kṣuṇṇānpaśya yodhānsahasraśaḥ //

manuṣyagajavājīnāṃ śaraśaktyṛṣṭitomaraiḥ /
nistriṃśaiḥ paṭṭasaiḥ prāsairnakharairlaguḍairapi //

śarīrairbahughā chinnaiḥ śoṇitaughapariplutaiḥ /
gatāsubhiramitraghna saṃvṛtā raṇabhūmayaḥ //

bāhubhiścandanādigdhaiḥ sāṅgadaiḥ śubhabhūṣaṇaiḥ /
satalatraiḥ sakeyūrairbhāti bhārata medinī //

sāṅgulitrairbhujāgraiśca vipravidvairalaṅkṛtaiḥ /
hastihastopamaiśchinnairūrubhiśca tarasvinām //

baddhacūḍāmaṇivaraiḥ śirobhiśca sakuṇḍalaiḥ /
nikṛttairvṛṣabhākṣāṇāṃ śarīraiścāpi saṅghaśaḥ //

gajavājimanuṣyāṇāṃ śaraśaktyṛṣṭitomaraiḥ / kabandhaiḥ śoṇitādigdhaiśchinnagātraśirodharaiḥ /
bhūrbhāti bharataśreṣṭha śāntāgnibhirivādhvare //

rathāṃśca bahudhā bhagnānhemakiṅkiṇinaḥ śubhān /
aśvāṃśca buhadhā paśya śoṇitena pariplutān //

anukarṣānupāsaṅgānpatākā vividhāndhvajān / yodhānāṃ ca mahāśaṅkhānpāṇḍurāṃśca prakīrṇakān /
nirastajihvānmātaṅgāñśayānānparvatopamān //

vaijayantīrvicitrāśca hatāṃśca gajayodhinaḥ /
vāraṇānāṃ paristomānsaṃyuktānekakambalān //

vipāṭitavicitrāśca rūpacitrāḥ kuthāstathā /
bhinnāśca bahudhā ghaṇṭāḥ patadbhiścūrṇitā gajaiḥ //

vaidūryamaṇidaṇḍāṃśca patitāṃścāṅkuśānbhuvi /
aśvānāṃ ca yugāpīḍānratnacitrānuraśchadān //

viddhāḥ sādidhvajāgreṣu suvarṇavikṛtāḥ kuthāḥ /
vicitrānmaṇicitrāṃśca jātarūpapariṣkṛtān //

aśvāstaraparistomānrāṅkavānpatitānbhuvi / cūḍāmaṇīnnarendrāṇāṃ vicitrāḥ kāñcanasrajaḥ /
chatrāṇi cāpaviddhāni cāmaravyajanāni ca //

candranakṣatrabhāsaiśca vadanaiścārukuṇḍalaiḥ / klṛptaśmaśrubhiratyarthaṃ vīrāṇāṃ samalaṅkṛtaiḥ /
vadanaiḥ paśya sañchannāṃ mahīṃ śoṇitakardamām //

sajīvāṃśca narānpaśya kūjamānānsamantataḥ / upāsyamānāṃśca bahūnnyastaśastraiśca bhūpate /
jñātibhiśca jalaklinnānrodamānairmuhurmuhuḥ //

utkrāntānaparānyodhāñchādayitvā tarasvinaḥ /
punaryuddhāya gacchanti jaye lubdhāḥ pramanyavaḥ //

apare tatratatraiva paridhāvanti mānavāḥ /
sannivṛttāśca te śūrā dṛṣṭā caitānvicetasaḥ //

jalaṃ tyaktvā pradhāvanti krośamānāḥ parasparam /
jalaṃ pītvā mṛtānpaśya pibato'nyāṃśca bhārata //

pariṣvajya priyānanye bāndhavānbandhuvatsalāḥ /
visañjñānsamare yodhāṃstatratatra mahāraṇe //

paśyāparānnaraśreṣṭha sandaṣṭoṣṭhapuṭānpunaḥ /
bhṛkuṭīkuṭilairvaktraiḥ prekṣamāṇānmahāraṇam //

etattavaivānurūpaṃ karmārjuna mahāhave /
divi vā devarājasya tvayā yatkṛtamāhave //
sañjaya uvāca /

evaṃ tāṃ darśayankṛṣṇo yuddhabhūmiṃ kirīṭine /
gacchannevāśṛṇocchabdaṃ duryodhanabale mahat //

śaṅkhadundubhinirghoṣaṃ bherīpaṇavaniḥsvanam /
rathāśvanaranāgānāṃ pādaśabdāṃśca dāruṇān //

praviśya tadbalaṃ kṛṣṇasturagairvātavegitaiḥ /
pāṇḍyenābhyarditaṃ sainyaṃ tvadīyaṃ vīkṣya vismitaḥ //

sa hi nānāvidhairbāṇairiṣvastrapravaro yudhi /
nyahanaddviṣatāṃ pūgāngatāsūnantako yathā //

gajavājimanuṣyāṇāṃ śarīrāṇi śitaiḥ śaraiḥ /
bhittvā praharatāṃ śreṣṭho videhāsūnapātayat //

śatrupravīrairastrāṇi nānāśastrāṇi sāyakaiḥ /
chittvā tānavadhīcchatrūnpāṇḍyaḥ śakra ivāsurān //