Mahabharata · Chapter 8.54

athottareṇa pāṇḍūnāṃ senāyāṃ dhvanirutthitaḥ /
rathanāgāśvapattīnāṃ daṇḍadhāreṇa vadhyatām //

nivartayitvā tu rathaṃ keśavo'rjunamabravīt /
vāhayanneva turagāngaruḍānilaraṃhasaḥ //

māgadho'sāvatikrānto dviradena pramāthinā /
bhagadattādanavamaḥ śikṣayā ca balena ca //

enaṃ hatvā nihantā'si punaḥ saṃśaptakāniti /
vākyānte prāpayatpārthaṃ daṇḍadhāragajaṃ prati //

sa māgadhānāṃ pravaro mahābalo-- śubhagraho yodhagaṇaiḥ samanvitaḥ /
sapatnasenāṃ pramamātha dāruṇo bhīmaṃ samagrāṃ balavāniva graham //

sukalpitaṃ dānavanāgasannibhaṃ mahābhranirhādasamasvanaṃ raṇe /
samāsthito nāgavaraṃ nareśvaro rathāśvamātaṅganarapramāthinam //

sa nāgayantṝnsamare mahārathā-- nsapattisaṅghāṃsturagānsasādinaḥ /
dvipāṃśca bāṇairnijaghāna vīryavā-- nsamantato ghnanniva kālacakravat //

narāṃstu kāṃsyāyasavarmabhūṣaṇā-- nnipātya sāśvānapi pattibhiḥ saha /
vyapothayaddantivareṇa śuṣmiṇā saśabdavatsthūlanalaṃ yathā tathā //

athārjuno jyātalaneminiḥsvane mṛdaṅgabherībahuśaṅkhanādite /
rathāśvamātaṅgasahasranādite rathottamenābhyapataddvipottamam //

tato'rjunaṃ dvādaśabhiḥ śarottamai-- rjanārdanaṃ ṣoḍaśabhiḥ samārpayat /
sa daṇ़ḍadhārasturagāṃstribhistribhi--- stato nanāda prajahāsa cāsakṛt //

tato'sya pārthaḥ saguṇeṣukārmukaṃ cakarta bhallairdhvajamapyalaṅkṛtam /
punarniyantṝnsahapādagoptṛbhi-- stataḥ sa cukrodha girivrajeśvaraḥ //

tato'rjunaṃ bhinnakaṭena dantinā ghanāghanenānilatulyaraṃhasā /
atīva cukrodhayiṣurjanārdanaṃ ghanañjayaṃ cābhijaghāna tomaraiḥ //

athāsya bāhū dvipahastasannibhau śiraśca pūrṇendunibhānanaṃ tribhiḥ /
kṣuraiḥ praciccheda sahaiva pāṇḍava-- stato dvipaṃ bāṇaśataiḥ samarpayat //

sa pārthabāṇaistapanīyabhūṣaṇaiḥ samāvṛtaḥ kāñcanavarmabhṛddvipaḥ /
bhṛśaṃ cakāśe niśi parvato yathā dāvāgninā prajvalitauṣadhidrumaḥ //

sa vedanārto'mbudanisvano nadaṃ-- ścaranbhramanprassvalitāntaro'dravat /
papāta rugṇaḥ saniyantṛkastathā // yathā girirvajravidāritastathā //

himāvadānena suvarṇamālinā himādrikūṭapratimena dantinā /
hate raṇe bhrātari daṇḍa āvraja-- jjighāṃsurindrāvarajaṃ dhanañjayam //

satomarairarkaraprabhaistribhi-- rjanārdanaṃ pañcabhirarjunaṃ śitaiḥ /
samarpayitvā vinanāda cārdayaṃ-- stato'sya bāhū nicakarta pāṇḍavaḥ //

kṣuraprakṛttau vipulau satomarau śubhāṅgadau candanarūṣitau bhujau /
gajātpatantau yugapadvirejatu-- ryathoragau parvataśṛṅgavanmahīm //

athā'rdhacandreṇa hataṃ kirīṭinā papāta daṇḍasya śiraḥ kṣitiṃ dvipāt /
sa śoṇitārdro nipatanvireje divākaro'stādiva paścimāṃ diśam //

atha dvipaṃ śvetanagāgrasannibhaṃ divākarāṃśupratimaiḥ śarottamaiḥ /
bibheda pārthaḥ sa papāta nādayan himādrikūṭaṃ kuliśāhataṃ yathā //

tato'paraṃ tatpratimā gajottamā jigīṣavaḥ saṃyati savyasācinā /
tathā kṛtāste'pi yathaiva tau dvipau tataḥ prabhagnaṃ sumahadriporbalam //

gajā rathāśvāḥ puruṣāśca saṅghaśaḥ parasparaghnāḥ paripeturāhave /
parasparaṃ praskhalitāḥ samāhatā bhṛśaṃ ca tattadbahubhāṣiṇo hatāḥ //

athārjunaṃ sve parivārya sainikāḥ purandaraṃ devagaṇā ivābruvan /
abhaiṣma yasmānmaraṇādiva prajāḥ sa vīra diṣṭyā nihatastvayā ripuḥ //

na cetparitrāsyadimāñjanānbhayā-- ddviṣadbhirevaṃ balibhiḥ prapīḍitān /
tathā'bhaviṣyaddviṣatāṃ pramodanaṃ yathā hateṣveṣviha no'risūdana //

itīva bhūyaśca suhṛdbhirīḍitā niśamya vācaḥ sumanāstadā'rjunaḥ /
yathā'nurūpaṃ pratipūjya taṃ janaṃ jagāma saṃśaptakasaṅghahā punaḥ //