Mahabharata · Chapter 8.56

proktastvayā pūrvameva pravīro lokaviśrutaḥ /
na tvasya karma saṅgrāme tvayā sañjaya kīrtitam //

tasya vistaraśo brūhi pravīrasyādya vikramam /
śikṣāṃ prabhāvaṃ vīryaṃ ca pramāṇaṃ darpameva ca //
sañjaya uvāca /

bhīṣmadroṇakṛpadrauṇikarṇārjunajanārdanān /
samāptavidyāndhanuṣi śreṣṭhānyānsapta manyase //

yo hyākṣipati vīryeṇa sarvānetānmahārathān /
na mene cātmanā tulyaṃ kañcideva nareśvaram //

tulyatāndroṇabhīṣmābhyāmātmano yo na mṛṣyate /
vāsudevārjunābhyāṃ ca nyūnatāṃ naicchatātmani //

sa pāṇḍyo'rthapatiśreṣṭhaḥ sarvaśastrabhṛtāṃ varaḥ /
karṇasyānīkamahanatpāśahasta ivāntakaḥ //

tadudīrṇarathāśvebhaṃ pattipravarasaṅkulam /
kulālacakravaddhāntaṃ pāṇḍyenābhyāhataṃ balāt //

vyaśvasūtadhvajarathānviprayuktayugānrathān /
samyagastaiḥ śaraiḥ pāṇḍyo vāyurmeghānivākṣipat //

dviradānpravarārohānvipatākāyudhadhvajān /
sa pādarakṣānahanadvajreṇādrīnivādrihā //

sa śaktiprāsatūṇīrānaśvārohānhayānapi /
pulindakhasabāhlīkaniṣādāndhrakakuntalān //

dākṣiṇātyāṃśca bhojāṃśca śūrānsaṅgrāmakarkaśān /
viśastrakavacānbāṇaiḥ kṛtvā pāṇḍyo'karodvyasūn //

caturaṅgaṃ balaṃ bāṇairnighnantaṃ pāṇḍayamāhave /
dṛṣṭvā drauṇirasambhrāntamasambhrāntastato'bhyayāt //

ābhāṣya cainaṃ madhuramabhītaṃ tamabhītavat /
prāha praharatāṃ śreṣṭhaḥ smitapūrvaṃ samāhvayat //

rājankamalapatrākṣa pradhānāyudhavāhana /
vajrasaṃhananaprakhya prakhyātabalapauruṣa //

muṣṭikliṣṭāṅgulibhyāṃ ca vyāyatābhyāṃ mahaddhanuḥ /
dorbhyāṃ visphārayanbhāsi mahājaladavadbhṛśam //

śaravarṣairmahāvegairamitrānabhivarṣataḥ /
madanyaṃ nānupaśyāmi prativīraṃ tavāhave //

rathadviradapattyaśvānekaḥ pramathase bahūn /
mṛgasaṅghānivāraṇye vibhīrbhīmabalo hariḥ //

mahatā rathaghoṣeṇa divaṃ bhūmiṃ ca nādayan /
varṣānte sasyāṃ sūryo bhābhirādīpayanniva //

saṃspṛśānaḥ śaraiḥ pūrṇau tūṇī cāśīviṣopamaiḥ /
mayaivaikena yudhyasva tryambakenāndhako yathā //

evamuktastathetyuktvā pramathyainaṃ sa pārthivaḥ /
karṇinā droṇatanayaṃ vivyādha malayadhvajaḥ //

marmabhedibhiratyugrairbāṇairagniśikhopamaiḥ /
marmasvabhyahanaddrauṇiḥ pāṇḍyamācāryanandanaḥ //

tato'parānnavāṃstūrṇaṃ nārācānkaṅkavāsasaḥ /
gatyā daśamyā saṃyuktānaśvatthāmā'pyavāsṛjat //

tānacchinattadā pāṇḍyaścaturbhiraparaiḥ śaraiḥ /
caturo'bhyāhanaccāśvānāśu te vyasavo'bhavan //

atha droṇasutasyeṣūṃstāñchittvā niśitaiḥ śaraiḥ /
dhanurjyāṃ vitatāṃ pāṇḍyaścicchedādityatejasaḥ //

divyaṃ dhanurathādhijyaṃ kṛtvā drauṇiramitrahā /
prekṣya cāśu rathe yuktānnarairanyānhayottamān //

tataḥ śarasahasrāṇi preṣayāmāsa vai dvijaḥ /
iṣusambādhamākāśamakaroddiśa eva ca //

tatastānasyataḥ sarvāndrauṇerbāṇānmahātmanaḥ /
jānānopyakṣayānpāṇḍyo śātayatpuruṣarṣabhaḥ //

prayuktāṃstānprayatnena chittvā drauṇeriṣūnariḥ /
cakrarakṣau raṇe tasya prāṇudanniśitaiḥ śaraiḥ //

atha tallāghavaṃ dṛṣṭvā maṇḍalīkṛtakārmukaḥ /
prāsyaddroṇasuto bāṇānvṛṣṭiṃ pūṣānujo yathā //

aṣṭāvaṣṭagavānyūhuḥ śakaṭāni yadāyudham /
ahnastadaṣṭabhāgena drauṇiścikṣepa māriṣa //

tamantakamiva kruddhamantakālāntakopamam /
ye ye dadṛśire rūpaṃ visañjñāḥ prāyaśo'bhavan //

ācāryaputrastāṃ senāṃ bāṇavṛṣṭyā vyavīvṛṣat /
parjanya iva gharmānte vṛṣṭyā sādridrumāṃ mahim //

drauṇiparjanyamuktāṃ tāṃ bāṇavṛṣṭiṃ suduḥsahām /
vāyavyāstreṇa sa kṣipraṃ viddhvā pāṇḍyātilo'nadat //

tasya nānadataḥ ketuṃ candanāgururūṣitam /
malayapratimaṃ drauṇiśchittvāśvāṃścaturo'hanat //

sūtamekeṣuṇā hatvā mahājaladaniḥsvanam /
dhanuśchittvā'rdhacandreṇa tilaśo vyadhamadratham //

astrairastrāṇi saṃvārya chittvā sarvāyudhāni ca /
prāptamapyahitaṃ drauṇirnāhanadyuddhatṛṣṇayā //

hateśvaro dantivaraḥ sukalpita-- satvarābhisṛṣṭaḥ pratiśabdago balī /
tamādravaddrauṇiśarāhatastvaran javena kṛtvā pratihastigarjitam //

taṃ vāraṇaṃ vāraṇayuddhakovido dvipottamaṃ parvatasānusannibham /
sambhyatiṣṭhanmalayadhvajastvara-- nyathā'driśṛṅgaṃ harirunnadaṃstathā //

sa tomaraṃ bhāskararaśmivarcasaṃ balāstrasargottamayatnamanyubhiḥ /
sasarja śīghraṃ paripīḍayangajaṃ guroḥ sutāya draviḍeśvaro nadan //

maṇipravekottamavajrahāṭakai-- ralaṅkṛtaṃ cāṃśukamālyamauktikaiḥ /
hato mayāsītyasakṛnmudā nada-- nparābhinaddrauṇivarāṅgabhūṣaṇam //

tadarkacandragrahapāvakatviṣaṃ bhṛśābhighātātpatitaṃ vighūrṇitam /
mahendravajrābhihataṃ mahāsvanaṃ yathā'driśṛṅgaṃ bharaṇītale tathā //

tataḥ prajajvāla pareṇa manyunā pādāhato nāgapatiryathā tathā /
samādade cāntakadaṇḍasannibhā-- niṣūnamitrāntakarāṃścaturdaśa //

dvipasya pādāgrakarānsa pañcabhi-- rnṛpasya bāhū ca śiro'tha ca tribhiḥ /
jaghāna paḍbhiḥ paḍṛtūpamatviṣaḥ sa pāṇḍyarājānucarānmahārathān //

sudīrghavṛttau varacandanokṣitau suvarṇamuktāmaṇivajrabhūṣaṇau /
bhujau dharāyāṃ patitau nṛpasya tau viceṣṭatustārkṣyahatāvivoragau //

śiraśca tatpūrṇaśaśiprabhānanaṃ saroṣatāmrāyatanetramunnasam /
kṣitāvapi bhrājati tatsakuṇḍalaṃ viśākhayormadhyagataḥ śaśī yathā //

[sa tu dvipaḥ pañcabhiruttameṣubhiḥ kṛtaḥ ṣaḍaṃśaścaturo nṛpastribhiḥ /
kṛto daśāṃśaḥ kuśalena yudhyatā yathā havistaddaśa daivataṃ tathā //

sa pādaśo rākṣasabhojanānbahūn pradāya pāṇḍyo'śvamanuṣyakuñjarān /
svadhāmivāpya jvalanaḥ pitṛpriya-- stataḥ praśāntaḥ salilapravāhataḥ] //

samāptavidyaṃ tu guroḥ sutaṃ nṛpaḥ samāptakarmāṇamupetya te sutaḥ /
suhṛdvṛto'tyarthamapūjayanmudā jite balau viṣṇumivāmareśvaraḥ //