Mahabharata · Chapter 8.53

tataḥ samabhavadyuddhaṃ śukrāṅgirasavarcasoḥ /
nakṣatramabhito vyomni śukrāṅgirasayoriva //

santāpayantāvanyonyaṃ dīptaiḥ śaragabhastibhiḥ /
lokatrāsakarāvāstāṃ vimārgasthau grahāviva //

tato'vidhyaddhuvormadhye nārācairarjuno bhṛśam /
sa tena vibabhau drauṇirūrdhvaraśmiryathā raviḥ //

atha kṛṣṇau śaraśatairaśvatthāmnā'rditau bhṛśam /
svaraśmijālavikacau yugāntārkāvivāsutaḥ //

tato'rjunaḥ sarvatodhāramastra-- mavāsṛjadvāsudeve'bhibhūte /
drauṇāyaniścābhyahanatpṛṣatkai-- rvajrāgnivaivasvatadaṇḍakalpaiḥ //

sa keśavaṃ cārjunaṃ cātitejā vivyādha marmasvatiraudrakarmā /
bāṇaiḥ sumuktairatitīvravegai-- ryairāhato mṛtyurapi vyatheta //

drauṇeriṣūniṣubhiḥ sannivārya vyāyacchatastaddviguṇaiḥ supuṅkhaiḥ /
taṃ sāśvasūtadhvajamekavīra-- māvṛtya saṃśaptakasainyamārcchat //

dhanūṃṣi bāṇāniṣudhīrdhanurjyāḥ pāṇīnbhujānpāṇigataṃ ca śastram /
chatrāṇi ketūṃsturagānratheṣāṃ vastrāṇi mālyānyathā bhūṣaṇāni //

carmāṇi varmāṇi manoramāṇi prasahya caiṣāṃ sa śirāṃsi caiva /
sriccheda pārtho dviṣatāṃ sumuktai-- rbāṇaiḥ sthitānāmaparāṅmukhānām //

sukalpitāḥ smandanavājināgāḥ samāsthitāḥ kṛtayatnairnṛvīraiḥ /
pārtheritairbāṇaśatairnirastā-- staireva sārdhaṃ nṛvarairvineśuḥ //

padmārkapūrṇendunibhānanāni kirīṭamālyābharaṇojjvalāni /
bhallārdhacandrakṣurasannikṛttā-- nyapātayacchatruśirāṃsyajasram //

atha dvipairdaityaripudvipābhai-- rdevārikalpā balamanyukalpaiḥ /
kaliṅgavaṅgāṅganiṣādavīrā jighāṃsavaḥ pāṇḍavamabhyadhāvan //

teṣāṃ dvipānāṃ nicakarta pārtho varmāṇi carmāṇi karānniyantṝn /
dhvajāḥ patākāśca tataḥ prapetu-- rvajrāhatānīva gireḥ śirāṃsi //

teṣu prabhagneṣu gurostanūjaṃ bāṇaiḥ kirīṭi navasūryavarṇaiḥ /
pracchādayāmāsa mahābhrajālai-- rvāyuḥ samudyantamivāṃśumantam //

tato'rjuneṣūniṣubhirnirasya drauṇiḥ śitairarjunavāsudevau /
pracchādayitvā divi candrasūryau nanāda so'mbhoda ivātapānte //

tamarjunastāṃśca punastvadīyā-- nabhyarditastairabhisṛtya śastraiḥ /
vāṇāndhakāraṃ sahasaiva kṛttvā vivyādha pārtho varahemapuṅkhaiḥ //

nāpyādadatsandadhannaiva muñca-- nbāṇānrathe'dṛśyata savyasācī /
rathāṃśca nāgāṃsturagānpadātīn saṃsyūtadehāndadṛśurhatāṃśca //

sandhāya nārācavarāndaśāśu drauṇistvarannekamivotsasarja /
teṣāṃ ca pañcārjunamabhyavidhya-- npañcācyutaṃ nirbibhuduḥ supuṅkhāḥ //

tairāhatau sarvamanuṣyamukhyā-- vasṛksravantau dhanadendrakalpau /
samāptavidyena tathā'bhibhūtau hatau raṇe tāviti menire'nye //

athārjunaṃ prāha daśārhanāthaḥ pramādyase kiṃ jahi yodhametam /
kuryāddhi doṣaṃ samupekṣito'yaṃ kaṣṭo bhavedvyādhirivākriyāvān //

tatheti coktvā'cyutamapramādī drauṇeḥ prahasyāśu kirīṭamālī /
bhujau varau candanasāradigdhau vakṣaḥ śiro'thāpratimau tathorū //

gāṇḍīvamuktaiḥ kupitāhikalpai-- drauṇiṃ śaraiḥ saṃyati nirbibheda /
chittvā tu raśmīṃsturagānavidhya-- tte taṃ raṇādūhuratīva dūram //

sa tairhṛto vātajavaisturaṅgai- rdrauṇirdṛḍhaṃ pārthaśarābhibhūtaḥ /
āvṛtya naiva vyaṣahatsa yoddhuṃ pārthena sārdhaṃ matimānvimṛśya /

jānañjayaṃ niyataṃ vṛṣṇivīre dhanañjaye cāṅgirasāṃ variṣṭhaḥ //
viveśa karṇasya balaṃ tarasvī bhagnotsāhaḥ kṣīṇavāṇāstrayogaḥ //

pratīpakāme tu raṇādaśvatthāmni hṛte hayaiḥ /
mantrauṣadhikriyāyogairvyādhau dehādivāhṛte //

saṃśaptakānabhimukhau prayātau keśavārjunau /
vātodvūtapatākena syandanenaughanādinā //