Mahabharata · Chapter 8.5

śrutvā karṇaṃ hataṃ yudve putrāṃścaiva palāyinaḥ /
narendraḥ kiñcidāśvasto dvijaśreṣṭha kimabravīt //

prāptavānparamaṃ duḥkhaṃ putravyasanajaṃ mahat /
tasminyaduktavānkāle tanmamācakṣva pṛcchataḥ //
vaiśampāyana uvāca /

śrutvā karṇasya nidhanamaśradveyamivādbhutam /
bhūtasammohanaṃ bhīmaṃ meroḥ saṃsarpaṇaṃ yathā //

cittamohamivāyuktaṃ bhārgavasya mahāmateḥ /
parājayamivendrasya dviṣaddhyo bhīmakarmaṇaḥ //

divaḥ prapatanaṃ bhānoruravyāmiva mahādyuteḥ /
saṃśoṣaṇamivācintyaṃ samudrasyākṣayāmbhasaḥ //

mahīviyaddigambūnāṃ sarvanāśamivādbhutam /
karmaṇoriva vaiphalyamubhayoḥ puṇyapāpayoḥ //

sañcintya nipuṇaṃ buddhyā dhṛtarāṣṭro janeśvaraḥ /
nedamastīti sañcintya karṇasya samare vadham //

prāṇināmevamātmatvātsyādapīti vicārya ca /
śokāgninā dahyamāno dhamyamāna ivāśaye //

visrastāṅgaḥ śvasandīno hāhetyuktvā suduḥkhitaḥ /
vilalāpa mahārāja dhṛtarāṣṭro'mbikāsutaḥ //
dhṛtarāṣṭra uvāca /

sañjayādhirathirvīraḥ siṃhadviradavikramaḥ /
vṛṣabhapratimaskandho vṛṣabhākṣagatisvaraḥ //

vṛṣabho vṛṣabhasyeva yo yuddhe na nivartate /
śatrorapi mahendrasya vajrasaṃhanano yuvā //

yasya jyātalaśabdena śaravṛṣṭiraveṇa ca /
rathāśvanaramātaṅgā nāvatiṣṭhanti saṃyuge //

yamāśritya mahābāhuṃ dviṣatsaṅghaghnamacyutam /
duryodhano'karodvairaṃ pāṇḍuputrairmahārathaiḥ //

sa kathaṃ rathināṃ śreṣṭhaḥ karṇaḥ pārthena saṃyuge /
nihataḥ puruṣavyāghraḥ prasahyāsahyavikramaḥ //

yo nāmanyata vai nityamacyutaṃ ca dhanañjayam /
na vṛṣmīnsahitānanyānsvabāhubaladarpitaḥ //

śārṅgagāṇḍīvadhanvānau sahitāvaparājitau /
ahaṃ divyādrathādekaḥ pātayiṣyāmi saṃyuge //

iti yaḥ satataṃ mandamavocallobhamohitam /
duryodhanamavācīnaṃ rājyakāmukamāturam //

yo'jayatsarvakāmbhojānāvantyānkekayaiḥ saha / gāndhārānmadrakānmātsyāṃstrigartāṃstaṅkaṇāñśakān /

pāñcālāṃśca videhāṃśca kulindānkāśikosalān sūhmānaṅgāṃśca vaṅgāṃśca niṣādānpuṇḍrakīkaṭān //

vatsānkaliṅgāndaradānaśmakānṛṣikānapi /
śabarānhārahūṇāṃśca praghūṇānsaralānapi //

mleccharāṣṭrādhipāṃścaiva durgānāṭavikāṃstathā /
jitvaitānsamare vīraḥ pradīptaiḥ kaṅkapatribhiḥ //

karamāhārayāmāsa jitvā sarvānarīṃstathā / duryodhanasya vṛddhyarthaṃ rādheyo rathināṃ varaḥ /
divyāstravimanhātejāḥ karṇo vaikartano vṛṣaḥ //

senāgopaśca sa kathaṃ śatrubhiḥ paramāstravit /
ghātitaḥ pāṇḍavaiḥ śūraiḥ samare vīryaśālibhiḥ //

vṛṣo mahendro deveṣu vṛṣaḥ karṇo nareṣvapi /
tṛtīyamanyaṃ lokeṣu vṛṣaṃ naivānuśuśruma //

uccaiḥ śravā varo'śvānāṃ rājñāṃ vaiśravaṇo varaḥ /
varo mahendro devānāṃ karṇaḥ praharatāṃ varaḥ //

yo'jitaḥ pārthivaiḥ śūraiḥ samarthairvīryaśālibhiḥ /
duryodhanasya vṛddhyarthaṃ kṛtsnāmurvīmathājayat //

yaṃ labdhvā māgadho rājā sāntvamāno'tha sauhṛdaiḥ /
arautsītpārthivaṃ kṣatramṛte yādavakauravān //

taṃ śrutvā nihataṃ karṇaṃ dvairathe savyasācinā /
śokārṇave nimagno'haṃ bhinnā nauriva sāgare //

taṃ vṛṣaṃ nihataṃ śrutvā dvairathe rathināṃ varam /
śokārṇave nimagno'hamapluvaḥ sāgare yathā //

īdṛśairyadyahaṃ duḥkhairna vinaśyāmi sañjaya /
vajrāddṛḍhataraṃ manye hṛdayaṃ mama durbhidam //

jñātisambandhimitrāṇāmimaṃ śrutvā parābhavam /
ko madanyaḥ pumām̐lloke na jahyātsūta jīvitam //

viṣamagniṃ prapātaṃ ca parvatāgrādahaṃ vṛṇe / mahāprasthānagamanaṃ jalaṃ prāyopaveśanam /
na hi śakṣyāmi duḥkhāni soḍhuṃ kaṣṭāni sañjaya //