Mahabharata · Chapter 8.40

duryodhanastataḥ karṇamupetya bharatarṣabha /
abravīnmadrarājaṃ ca tathaivānyānmahārathān //

yadṛcchayā'yamavyagro dharmaḥ paramakaḥ sakhā /
sukhinaḥ kṣatriyāḥ karṇa labhante yuddhamīdṛśam //

yādṛśaṃ kṣatriyaiḥ śūraiḥ śūrāṇāṃ dīvyatāṃ yudhi /
iṣṭaṃ bhavati rādheya tadidaṃ samupasthitam //

hatvā tu pāṇḍavānyuddhe sthirāmurvīṃ praśāsatha /
nihatā vā parairyuddhe vīralokānavāpsyatha //

duryodhanasya vacanaṃ śrutvā tatkṣatriyarṣabhāḥ /
siṃhanādānudakrośanvāditrāṇi ca jaghnire //

tasminpramudite sainye tvadīye bharatarṣabha /
harṣayaṃstāvakānyodhāndrauṇirvicanamabravīt //

pratyakṣaṃ sarvasainyānāṃ bhavatāṃ cāpi paśyatām /
nyastaśastro mama pitā dhṛṣṭadyumnena pātitaḥ //

sa tenāhamamarṣeṇa pitrarthe cāpi bhārata /
dhṛṣṭadyumnamahatvā'haṃ na vimokṣyāmi daṃśanam //

kṛtvā'nṛtāṃ pratijñāṃ vo nāsmi prāptā mahatphalam / arjunaṃ bhīmasenaṃ ca yaśca māṃ pratiyotsyati /
sarvāṃstānpramathiṣyāmi iti me niścitā matiḥ //
sañjaya uvāca /

evamukte tataḥ sarvā harṣitā bhāratī camūḥ /
abhyavartata kaunteyāṃstathā tāṃ cāpi pāṇḍavāḥ //

sa sannipāto rathayūthapānāṃ mahāhave bhārata lobhanīye /
janakṣayaḥ kālayugāntakalpaḥ prāvartatāgre kurusṛñjayānām //

tataḥ pravṛtte yudhi samprahāre bhūtāni sarvāṇi sadaivatāni /
āsansametāni sahāpsarobhi-- nirīkṣatībhiryudhi vīrasaṅghān //

divyaiśca gandhaiḥ paramaiśca puṣpai-- ranyaiśca ratnairvividhairnarāgryāḥ /
raṇeṣu karmodvahatāḥ prahṛṣṭā- nanandayannapsarasaḥ prahṛṣṭāḥ //

samīraṇastāṃstu niṣevya gandhā-- nniṣevate tānapi yodhamukhyān /
niṣevyamāṇāstvanilena yodhāḥ parasparaṃ cukruśurājimadhye //

tathā tu tasmiṃstumule pravṛtte duryodhanaḥ krodhamamṛṣyamāṇaḥ /
avebhya bhīmaṃ balamadhyasaṃsthaḥ samārpayatkṣudrakāṇāṃ śatena //

duḥśāsanaścitrasenaśca vīra-- statholūkaḥ kitavaḥ saubalaśca /
gajānīkaiḥ sarvato bhīmasenaṃ tathāviṣaktaṃ sahasaivābhyagacchan //

tamāpatantaṃ samprekṣya gajānīkaṃ vṛkodaraḥ /
duryodhanaṃ mahābāhuḥ śaravarṣairavākirat //

duryodhanaṃ tato bhīmaḥ sāyakairvajrasannibhaiḥ /
pāṇḍavo vimukhīkṛtya gajānabhyadravadbalī //

tataḥ pāvakasaṅkāśairbhīmabāṇairavakragaiḥ /
śalabhairiva nāgāṃstānardayāmāsa pāṇḍavaḥ //

tataḥ kuñjarayūthāni bhīmaseno mahābalaḥ /
vyadhamanniśitairbāṇairmahāvāto ghanāniva //

nityamattāśca mātaṅgāḥ śūrairmattairadhiṣṭhitāḥ /
ārohakairmahāmātraistomarāṅkurāpāṇibhiḥ //

suvarṇajālaiḥ pracchannā maṇijālaiśca kuñjarāḥ /
rūpyajāmbūnadābhāsaḥ kṣuramālābhyalaṅkṛtāḥ //

vadhyamānāḥ śarai rājanbhīmasenena te gajāḥ /
vibhinnahṛdayāḥ kecittatraivābhyapatanbhuvi //

nipatadbhirmahāvegairhemabhāṇḍavibhūṣitaiḥ /
aśobhata mahārāja dhātucitrairivācalaiḥ //

dīptābharaṇavadbhiśca gajapṛṣṭhanipātitaiḥ /
saṅgaraḥ śuśubhe rājankṣīṇapuṇyairivāmaraiḥ //

mahāparighasaṅkāśau candanāgarurūṣitau /
apaśyaṃ bhīmasenasya dhanurvikṣipato bhujau //

tasya jyātalanirghoṣamasyataḥ savyadakṣiṇam /
taṃ śrutvā'bhyadravannāgā bhīmasenabhayārditāḥ //

tasya bhīmasya tatkarma rājannekasya dhīmataḥ /
apaśyāma mahārāja tadbhūtamivābhavat //