Mahabharata · Chapter 8.39

tataḥ parānīkabhidaṃ vyūhamapratimaṃ kṛtam /
samīkṣya karṇaḥ pārthānāṃ dhṛṣṭadhumnābhirakṣitam //

prayayau rathaghoṣeṇa siṃhanādaraveṇa ca /
vāditrāṇāṃ ca ninadaiḥ kampayanniva medinīm //
sañjaya uvāca /

tataḥ prayāntaṃ rādheyaṃ madrarājaḥ smayanniva /
avadhūya idaṃ vākyamabravītkurusannidhau //

camūṃ tavemāṃ vipulāṃ samṛdvā-- masaṅkheyāmaśvanarākulāṃ ca /
tathā praveṣṭā samare dhanañjayaḥ kakṣaṃ dahandīpta ivāśrayāśī //

rathe stitau vīravarau vareṇyau siṃhaskandhau lohitapadmanetrau /
draṣṭā bhavānadya vinā prayatnā-- ttathāhi me śakunā vedayanti //

adya draṣṭā'si taṃ vīraṃ śvetāśvaṃ kṛṣṇasārathim /
nighnantaṃ śātravānsaṅkhye yaṃ karṇa paripṛcchasi //

adya tau puruṣavyāghrau lohitākṣau parantapau /
vāsudevārjunau karṇa draṣṭā'syamitavikramau //

sārathiryasya govindo gāṇḍīvaṃ yasya kārmukam /
taṃ cedvantā'si rādheya tvaṃ no rājā bhaviṣyasi //

pravātyeṣa mahāvāyurabhitastava vāhinīm /
kravyādā vyāharantyete mṛgāḥ kurvanti bhairavam //

paśya karṇa mahāghoraṃ bhayaṃ vai romaharṣaṇam /
arkaṃ jīmūtasaṅkāśaḥ kabandho vārya tiṣṭhati //

paśya yūthaṃ mṛgaśataṃ mṛgāṇāṃ sarvatodiśam /
rarāsa dīptalāṅgūlamādityāmabhi saṃsthitam //

paśya kākāṃśca gṛdhrāṃśca samavetānsahasraśaḥ /
ādityamabhivīkṣante hyaśivāḥ karṇa sasvarāḥ //

śvetavājisamāyukte tava karṇa mahārathe /
patākāḥ prajvalantyetā dhvajaścātīva kampate //

udīryato hayānpaśya mahākāyānmahājavān /
plavamānānmahāvīryānākāśe garuḍāniva //

dhruvameṣu nimitteṣu bhūmimāvṛtya pārthivāḥ /
svapsyanti nihatāḥ karṇa śataśo'tha sahasraśaḥ //

śaṅkhānāṃ tumulaḥ śabdaḥ śrūyate romaharṣaṇaḥ /
ānakānāṃ ca rādheya mṛdaṅgānāṃ ca hanyatām //

śṛṇu śabdānbahuvidhānnarāśvarathavājinām /
jyātalatreṣuśabdāṃśca śṛṇu karṇa mahātmanām //

hemarūpyapramṛṣṭānāṃ vāsasāṃ śilpinirmitāḥ /
sahemacandratārābhāḥ patākāḥ kiṅgiṇīyutāḥ //

nānāvarṇā raṇe bhānti śvasanena prakampitāḥ /
paśya karṇārjunasyaitāḥ saudāminya ivāmbude //

dhvajāḥ kaṇakaṇāyante vātenātisamīritāḥ /
sapatākarathāścāpi pāñcālānāṃ mahātmanām //

eṣa reṇuḥ samudbhūto divamāvṛtya tiṣṭhati /
gajavājipraṇunnā ca kampate karṇa medinī //

śrūyate meghasaṅkāśo rathanemisvanastathā / paśya kuntīsutaṃ vīraṃ bībhatsumaparājitam /
prahariṣyantamāyāntaṃ kapipravaraketanam //

gajāśvarathapattyoghāṃstāvakānyudhi nighnataḥ /
dhvajāgraṃ dṛśyate tasya jyāśabdaścaiva śrūyate //

eṣa saṃśaptakānbhūyastānevābhimukho gataḥ /
karoti kadanaṃ caiṣa saṅgāme dviṣatāṃ balī //
sañjaya uvāca /

iti bruvāṇaṃ madreśaṃ karṇaḥ provāca manyumān //

paśya saṃśaptakaiḥ kruddhaiḥ samantātsamabhidrutaḥ / eṣa sūrya ivāmbhodaiśchannaḥ pārtho na dṛśyate /
eṣa dānto'rjunaḥ śalya nimagnaḥ śokasāgare //
śalya uvāca /

varuṇaṃ ko'mbhasā hanyādindhanena ca ko'nalam /
kovā'nilaṃ nigṛhṇīyātpibedvā ko mahārṇavam //

īdṛgrūpamahaṃ manye pārthasya yudhi nirjayam /
na hi śakyo'rjuno jetuṃ yudhi devāsurairapi //

athaighaṃ paritoṣaste vāgbhistvaṃ sumānā bhava /
na hi śakyo yudhā jetumanyaṃ kuru manoratham //

bāhubhyāmuddharedbhūmiṃ dahetkruddha imāḥ prajāḥ /
pātayettridivāddevānnārjunaṃ samare jayet //

paśya kuntīsutaṃ bhīmaṃ vīramakliṣṭakāriṇam /
praharantaṃ mahābāhuṃ sthitaṃ merumivācalam //

amarṣī puruṣavyāghraḥ sadā vairamanusmaran /
eṣa bhīmo jayaprepsuryudhi tiṣṭhati vīryavān //

eṣa dharmabhṛtāṃ śreṣṭho dharmarājo yudhiṣṭhiraḥ /
tiṣṭhatyasukaraḥ saṅkhye paraiḥ parapurañjayaḥ //

etau ca puruṣavyāghrāvāśvineyau mahārathau /
nakulaḥ sahadevaśca tiṣṭhato yudhi durjayau //

ete tiṣṭhanti kārṣṇeyāḥ pañca pañcācalā iva /
yotsyamānā mahāvīryā bhīmārjunasamā yudhi //

ete drupadaputrāśca dhṛṣṭadyumnapurogamāḥ /
hīnāḥ satyajitā vīrāstiṣṭhanti paramaujasaḥ //

yatra kṛṣṇārjunau vīrau yatra rājā yudhiṣṭhiraḥ /
tatra dharmaśca satyaṃ ca yato dharmastato jayaḥ //

iti saṃvadatoreva tayoḥ puruṣasiṃhayoḥ /
te sene samasajjetāṃ ṅgāyamunavadbhṛśam //