Mahabharata · Chapter 8.38

iti śalya vijānīhi hanta bhūyo bravīmi te /
unyamānaṃ mayā samyaktvamekāgramanāḥ śṛṇu //

brāhmaṇaḥ kila no gehamadhyagacchatpurā'tithiḥ /
ācāraṃ tatra samprekṣya prīto vacanamabravīt //

mayā himavataḥ śṛṅgamekenādhyuṣitaṃ ciram /
dṛṣṭāśca bahavo deśā nānādharmasamāvṛtāḥ //

na ca kena ca dharmeṇa virudhyante prajā imāḥ /
sarvāścāpyācarandharmaṃ yaduktaṃ vedapāragaiḥ //

aṭatā tu mayā deśānnānādharmasamākulān /
āgacchatā mahārāja bāhlīkeṣu niśāmitam //

tatra vai brāhmaṇo bhūtvā punarbhavati kṣatriyaḥ /
vaiśyaḥ śūdraśca bāhlīkastato bhavati nāpitaḥ //

nāpitaśca tato bhūtvā punarbhavati brāhmaṇaḥ /
dvijo bhūtvā ca tatraiva punardāso'bhijāyate //

bhavantyekakule viprāḥ śiṣṭā ye kāmacāriṇaḥ /
gāndhārā madrakāścaiva bāhlīkāścāpyatejasaḥ //

etanmayā śrutaṃ tatra dharmasaṅkarakārakam /
kṛtsnāmaṭitvā pṛthivīṃ bāhlīkeṣu viparyayaḥ //

iti śalya vijānīhi hanta bhūyo bravīmi te /
yadapyanyo'bravīdvākyaṃ bāhlīkānāṃ vikutsitaṃ //

ānīyehākṣatā kācidāraṭṭātkila dasyubhiḥ /
adharmataścopayātā sā tānabhyaśapattataḥ //

bālāṃ bandhumatīṃ yanmāmadharmeṇopagacchatha /
tasmātkumāryaḥ svairiṇyo bhaviṣyanti kuleṣu vaḥ //

na caivāsmātpramokṣadhvaṃ ghorācchāpānnarādhamāḥ /
tasmātteṣāṃ bhāgaharaḥ kathaṃ dharmānvadiṣyasi //

kuravaḥ sahapāñcālāḥ sālvā mātsyāḥ sanaimiśāḥ /
kosalāḥ kāśapauṇḍrāśca kāliṅgā māgadhāstathā //

cedayaśca mahābhāgā dharmaṃ jānanti śāśvatam /
nānādeśeṣvasantaśca prāyo bāhyālayānṛte //

āmatsyebhyaḥ kurupāñcālasālvā ānaimiśāccedayo ye viśiṣṭāḥ /
dharmaṃ purāṇamupajīvanti santo madrānṛte pāñcanadāṃśca jihmān //

evaṃ vidvāndharmakathāsu rājaṃ-- stūṣṇīmbhūtaḥ śalya bhaveḥ sadā tvam /
tvaṃ tasya goptā ca janasya rājā ṣaḍbhāgahartā śubhaduṣkṛtasya //

athavā duṣkṛtasya tvaṃ hartā teṣāmarakṣitā /
rakṣitā puṇyabhāgrājā prajānāṃ tvaṃ hyapuṇyabhāk //

pūjyamāne purā dharme sarvadeśeṣu śāśvate /
dharmaṃ pāñcanadaṃ dṛṣṭvā dhigityāha pitāmahaḥ //

vrātyānāṃ dāśakīyānāṃ kṛte'pyaśubhakarmaṇām /
brahmaṇā ninditāndharmānkaścitsiddhātmako'bravīt //

iti pāñcanadaṃ dharmavamene pitāmahaḥ /
svadharmastheṣu varṇeṣu so'pyetānnābhyapūjayat //

iti śalya vijānīhi hanta bhūyo bravīmi te /
kalmāṣapādaḥ sarasi nima़jjanrākṣaso'bravīt //

kṣatriyasya malaṃ bhaikṣyaṃ brāhmaṇasyāśrutaṃ malam /
malaṃ pṛthivyā bāhlīkāḥ strīṇāṃ kautūhalaṃ malam //

nimajjamānamuddhṛtya kaścidrājā niśācaram /
apṛcchattena cākhyātaṃ tacchṛṇuṣva narādhipa //

mānuṣāṇāṃ malaṃ mlecchā mlecchānāṃ muṣṭikā malam /
muṣṭikānāṃ malaṃ ṣaṇḍhāḥ ṣaṇḍhānāṃ rājayājakāḥ //

rājayājakayājyānāṃ madrakāṇāṃ ca yanmalam /
tadbhavedvai tava malaṃ yadyasmānna vimuñcasi //

iti rakṣopasṛṣṭeṣu viṣavīryahateṣu ca /
vidvadbhirbheṣajaṃ dṛṣṭaṃ saṃsiddhavacanottaram //

brāhayāḥ pañcālāḥ kauraveyāstu dharmyāḥ satyā matsyāḥ śūrasenāśca yājyāḥ /
prācyā dāsā vṛṣalā dākṣiṇātyāḥ stenā bāhlīkāḥ saṅkāra vai surāṣṭrāḥ //

kṛtaghnatā paravittāpahāro madyapānaṃ gurudārāvamardaḥ /
vākpāruṣyaṃ govadho rātricaryā bahirgehaṃ paravastropabhogaḥ //

yeṣāṃ dharmastānprati nāstyadharmo hyāraṭṭajānpāñcanadāndhigastu /
āpāñcālāḥ kuravo naimiśāśca matsyāścaivāpyanujānanti dharmam / athodīcyāścodayo bhāgadhāśca śiṣṭāndharmānupajīvanti vṛddhāḥ //

prācīṃ diśaṃ śritā devā jātavedaḥpurogamāḥ /
dakṣiṇā pitṛbhirguptā yamena śubhakarmaṇā //

pratīcīṃ varuṇaḥ pāti pālayannasurānbahūn /
udīcīṃ bhagavānsoma brahmā ca brāhmaṇaiḥ saha //

rakṣaḥpiśācānhimavānguhyakāngandhamādanaḥ /
dhruvaṃ sarvāṇi bhūtāni viṣṇuḥ pāti surottamaḥ //

iṅgita5āśca magadhāḥ prekṣitajñāśca kosalāḥ /
ardhoktāḥ kurupāñcālāḥ sarvoktā dākṣiṇāpathāḥ //

pārvatīyāśca viṣayā yathaiva girayastathā / sarvajñā yavanā rājañśūrāścaiva viśeṣataḥ /
mlecchāḥ svasañjñāniyatā nānuktamitare janāḥ //

pratirabdhāstu bāhlīkā na ca kecana madrakāḥ /
sa tvametādṛśaḥ śalya nottaraṃ vaktumarhasi //

evaṃ jñātvā joṣamāssva pratīpaṃ mā sma kruddhaḥ pāpabhṛtāṃ variṣṭha /
pūrvaṃ hatvā tvāṃ saputraṃ balaiśca paścāddhaṃsye vāsudevārjunau ca //
śalya uvāca /

āturāṇāṃ parityāgaḥ svadārasutavikrayaḥ /
aṅge pravartate karṇa yeṣāmadhipatirbhavān //

rathātirathasaṅkhyāyāṃ yattvāṃ bhīṣmastadābravīt /
tānviditvā'tmano doṣānnirmanyurbhava mā krudhaḥ //

sarvatra brāhmaṇāḥ santi santi sarvatra kṣatriyāḥ /
vaiśyāḥ śūdrāstathā karṇa striyaḥ sādhvyaśca suvratāḥ //

ramante copahāsena puruṣāḥ puruṣaiḥ saha /
anyonyena ratāḥ kṣībā deśedeśe ca maithunam //

paravācyeṣu nipuṇaḥ sarvo bhavati sarvadā /
ātmavācyaṃ na jānīte jānannapi ca muhyati //

sarvatra santi rājanaḥ svaṃsvaṃ dharmamanuvratāḥ /
durmanuṣyānnigṛhṇanti santi sarvatra dhārmikāḥ //

na karṇa deśasāmānyātsarvaḥ pāpaṃ niṣevate /
yādṛśāḥ svasvabhāvena deśāṃstāṃstādṛśānviduḥ //
sañjaya uvāca /

tatato duryodhano rājā karṇaśalyāvavārayat /
sakhibhāvena rādheyaṃ śalyaṃ saujanyakena ca //

tato nivāritaḥ karṇo dhārtarāṣṭreṇa māriṣa /
phahasya tatra rājendraṃ yādi śalyetyacodayat //