Mahabharata · Chapter 8.37

tataḥ punarmahārāja madrarājamarindamaḥ /
abhyabhāṣata rādheyaḥ sannivāryottaraṃ vacaḥ //

nirbhartsanārthaṃ śalya tvaṃ yattu jalpitavānasi /
nāhaṃ śakyastvayā vācā vibhīṣayitumāhave //

yadi māṃ devatāḥ sarvā yodhayeyuḥ savāsavāḥ /
tathāpi me bhayaṃ na syātkimu pārthātsakeśavāt //

nāhaṃ bhīṣayituṃ śakyaḥ śuddhakarṇā mahāhave /
abhijānīhi śaktastvamanyaṃ bhīṣayituṃ raṇe //

nīcasya balametāvatpāruṣyaṃ yatattvamāttha mām /
aśakto hi guṇānvaktuṃ valgase bahu durmate //

na hi karṇaḥ samudbhūto bhayārthamiha madraka /
vikramārthamahaṃ jāto yaśorthaṃ ca tathā'tmanaḥ //

sakhibhāvena sauhārdānmitatrabhāvena caiva hi /
kāraṇaistribhiretaistvaṃ śalya jīvasi sāmpratam //

rājñaśca dhārtarāṣṭrasya kāryaṃ sumahadudyatam /
mayi taccāhitaṃ śalya tena jīvasi me kṣaṇam //

kṛtaśca samayaḥ pūrvaṃ kṣantavyaṃ vipriyaṃ tava /
samayaḥ paripālyo me tena jīvasi sāmpratam //

ṛte śalyasahasreṇa vijayeyamahaṃ parān /
mitradrohastu pāpīyāniti jīvasi sāmpratam //
śalya uvāca /

ārtapralāpāṃstvaṃ karṇa yānbravīṣi parānprati /
na te karṇasahasreṇa śakyā jetuṃ pare yudhi //
sañjaya uvāca /

tathā bruvantaṃ paruṣaṃ karṇo madrādhipaṃ tadā /
paruṣaṃ dviguṇaṃ bhūyaḥ provācāpriyadarśanam //

idaṃ tvamekāgramanāḥ śṛṇu madrajanādhipa /
sannidhau dhṛtarāṣṭrasya procyamānaṃ mayā śrutam //

deśāṃśca vividhāṃścitrānpūrvavṛttāṃśca pārthivān /
brāhmaṇāḥ kathayanti sma dhṛtarāṣṭraniveśane //

tatra vṛddhaḥ purāvṛttāḥ kathāḥ kaściddvijottamaḥ /
bāhlīkadeśaṃ madrāṃśca kutsayanvākyamabravīt //

bahiṣkṛtā himavatatā gaṅgayā ca tiraskṛtāḥ /
sarasvatyā yamunayā kurukṣetreṇa cāpi ye //

pañcānāṃ sindhuṣaṣṭhānāṃ nadīnāṃ ye'ntarāśritāḥ /
tāndharmabāhyānaśucīnbāhlīkānapi varjayet //

govardhano nāma vaṭaḥ subhāṇḍaṃ nāma pattanam /
etadrājankalidvāramākumārātsmarāmyaham //

kāryeṇātyarthagūḍhena bāhlīkeṣūṣitaṃ mayā /
tata eṣāṃ samācāraḥ saṃvāsādvidito mayā //

śākalaṃ nāma nagaramāpagānāmanimnagā /
caṇḍālā nāma bāhlīkāsteṣāṃ vṛttaṃ suninditam //

pānaṃ guḍāsavaṃ pītvā gomāṃsaṃ laśunaiḥ saha /
apūpasaktumadyānāmāśitāḥ śīlavarjitāḥ //

gāyantyatha ca nṛtyanti striyo mattā vivāsasaḥ /
nagarāpaṇaveśeṣu bahirmālyānulepanāḥ //

mattāḥ pragītavirutaiḥ kharoṣṭraninadopamaiḥ /
anāvṛtā maithune tāḥ kāmacārāśca sarvaśaḥ //

āhuranyonyasūktāni prabruvāṇā madotkaxxxḥ /
hehatehehatetyevaṃ svāmibhartṛhateti ca //

ākrośantyaḥ pranṛtyanti vrātyāḥ parvasvasaṃyatāḥ /
tāsāṃ kilāvaliptānāṃ nivasankurujāṅgale //

kaścidbāhlīkaduṣṭānāṃ nātihṛṣṭamanā jagau /
sā nūnaṃ bṛhatī gaurī sūkṣmakambalavāsinī //

māmanusmaratī śete bāhlīkaṃ kuruvāsinam / śatadruṃ nu kadā tīrtvā tāṃ ca ramyāmirāvatīm /
gatvā svadeśaṃ drakṣyāmi sthūlajaṅghāḥ śubhāḥ striyaḥ //

manaḥśilojjvalāpāṅgyo gauryastāḥ kākukūjitāḥ /
kambalājinasaṃvītā rudantyaḥ priyadarśanāḥ //

mṛdaṅgānakaśaṅkhānāṃ mardalānāṃ ca niḥsvanaiḥ /
kharoṣṭrāśvataraiścaiva mattā yāsyāmahe sukham //

śamīpīlukarīrāṇāṃ vaneṣu sukhavartmasu /
apūpānsaktupiṇḍāṃśca prāśnanto mathitānvitān //

pathiṣu prabalo bhūtvā tathā sampatato'dhvagān /
celāpahāraṃ kurvāṇāstāḍayiṣyāma bhūyasaḥ //

evaṃśīleṣu vrātyeṣu bāhlīkeṣu durātmasu /
kaścetayāno nivasenmuhūrtamapi mānavaḥ //
karṇa uvāca /

īdṛśā brāhmaṇenoktā bāhlīkā moghacāriṇaḥ /
yeṣāṃ ṣaḍbhāgahartā tvamubhayoḥ puṇyapāpayoḥ //

ityuktvā brāhmaṇaḥ sādhuruttaraṃ punaruktavān /
bāhlīkeṣvavinīteṣu procyamānaṃ nibodha tat //

tatatra sma rākṣasī gāti kṛṣṇacaturdaśīm /
nagare śākale sphīte āhatya niśi dundubhim //

kathaṃ vastādṛśo gāthāḥ punargāsyāmi śākale /
gavyasya tṛptā māṃsasya pītvā gauḍaṃ surāsavam //

gaurībhiḥ saha nārībhirbṛhatībhiḥ svalaṅkṛtā /
palāṇḍugaṇḍūṣayutāḥ khādantaśceśikānbahūn //

vārāhaṃ kaukkuṭaṃ māṃsaṃ gavyaṃ gārdabhamauṣṭrakam /
dhānāśca ye na khādanti teṣāṃ janma nirarthakam //

evaṃ gāyanti ye mattāḥ śīdhunā pīlukāvane /
sabālavṛddhāḥ krandanti teṣāṃ dharmaḥ kathaṃ bhavet //

yatra lokeśvaraḥ kṛṣṇo devadevo janārdanaḥ /
vismṛtaḥ puruṣairugraisteṣāṃ dharmaḥ kathaṃ bhavet //

iti śalya vijānīhi hanta bhūyo bravīmi te /
yadanyopyuktavānasmānbrāhmaṇaḥ kurusaṃsadi //

pañcanadyo vahantyetā yatra pīluvanānyuta /
śatadruśca vipāśā ca tṛtīyairāvatī tathā //

candrabhāgā vitastā ca sindhuṣaṣṭhā mahānadī /
āraṭṭā nāma bahlīkā eteṣvāryo hi no vaset //

vrātyānāṃ dāsamīyānāṃ videhānāmayajvanām /
na devāḥ pratigṛhṇanti pitaro brāhmaṇāstathā //

teṣāṃ pranaṣṭadharmāṇāṃ bāhlīkānāmiti śrutiḥ /
brāhmaṇena yathā proktaṃ viduṣā sādhusaṃsadi //

kāṣṭhakuṇḍeṣu bāhlīkā mṛṇmayeṣu ca bhuñjate /
saktumadyāvalipteṣu śvāvalīḍheṣu nirghṛṇāḥ //

āvikaṃ cauṣṭrikaṃ caiva kṣīraṃ gārdabhameva ca /
tadvikārāṃśca bāhlīkāḥ khādanti ca pibanti ca //

pātrasaṅkariṇo jālmāḥ sarvānnakṣīrabhojanāḥ /
āraṭṭā nāma bāhlīkā varjanīyā vipaścitā //

iti śalya vijānīhi hanta bhūyo bravīmi te /
yadanyo'pyuktavānmahyaṃ brāhmaṇaḥ kurusaṃsadi //

yugandhare payaḥ pītvā proṣya cāpyacyutasthale /
tadvadbhūtilaye snātvā kathaṃ svargaṃ gamiṣyati //

pañcanadyo vahantyetā yatra niḥsṛtya parvatāt /
āraṭṭā nāma bāhlīkā na teṣvāryo dvyahaṃ vaset //

bāhlīkā nāma hīkaśca vipāśāyāṃ piśācakau /
tayorapatyaṃ bāhlīkā naiṣā sṛṣṭiḥ prajāpateḥ //

te kathaṃ vividhāndharmāñjñāsyante hīnayonayaḥ //

kāraskarānmāhiṣakānkarambhānkaṭakālikān /
karkarānvīrakānvīrā unmattāṃśca vivarjayet //

iti tīrthānusañcārī rākṣasī kācidabravīt /
ekarātramuṣitveha maholūkhalamekhalā //

āraṭṭā nāma te deśā bāhlīkaṃ nāma tadvanam /
vasātisindhusauvīrā iti prāyo'tikutsitāḥ //