Mahabharata · Chapter 8.31

dṛṣṭvā karṇaṃ mahāvīryaṃ yuyutsaṃ samavasthitam /
cukruśuḥ kuravaḥ sarve hṛṣṭarūpāḥ samantataḥ //

tato dundubhinirghoṣairbherīṇāṃ ninadena ca / koṇaśabdaiśca vividhairgarjitaiśca tarasvinām /
niryayustāvakāḥ sarve mṛtyuṃ kṛtvā nivartanam //

prayāte tu tataḥ karṇe ratheṣu maditeṣu ca /
cacāla ca mahī sarvā rarāsa ca suvisvaram //

niḥsaranto vyadṛśyanta sūryātsapta mahāgrahāḥ //

ulkāpātāśca sañjajñurdigdāhāścaiva dāruṇāḥ /
tathā'śanyaśca sampeturvavurvātāśca bhairavāḥ //

mṛgapakṣigaṇāścaiva pṛtanāṃ bahuśastava /
apasavyaṃ tadā cakrurvedayanto mahābhayam //

prasthitasya ca karṇasya nipetusturagā bhuvi /
asthivarṣaṃ ca patitamantarikṣādbhayānakam //

jajvaluścaiva śastrāṇi dhvajāścaiva cakampire /
aśrūṇi ca vyamuñcanta vāhanāni viśāmpate //

ete cānye ca bahava utpātāstatra māriṣa /
samutpeturvināśāya kauravāṇāṃ sudāruṇāḥ //

na ca tāngaṇayāmāsuḥ sarve daivena mohitāḥ /
prasthitaṃ sūtaputraṃ ca jayetsūcurnarādhipāḥ //

śalyena sahitaṃ dṛṣṭvā karṇamāhavaśobhinam /
nirjitānpāṇḍavāṃścaiva menire tatra kauravāḥ //

tato rathasthaḥ paravīrahantā bhīṣmadroṇavativīryau samīkṣya /
samujjvalanbhāskarapāvakābho vaikartano'sau rathakuñjaro vṛṣā //

alaṃ manuṣyasya sukhāya vartituṃ tathāhi yudve nihataḥ parairguruḥ //

hutāśanādityasamānatejasaṃ parākrame viṣṇupurandaropamam //
naye ba-haspatyuśanaḥsamaṃ sadā na cainamastraṃ tadupāsta duḥsaham //

samprākruṣṭe ruditastrīkumāre parābhūte pauruṣe dhārtarāṣṭre /
kṛtyaṃ mayā nādya jānāmi śalya prayāhi tasmāddviṣatāmanīkam //

sa yatra rājā pāṇḍavaḥ satyasandho vyavasthito bhīmasenārjunau ca /
sa vāsudevaḥ sātyakiḥ sṛñjayāśca yamau ca kastānviṣahenmadanyaḥ //

tasmātkṣipraṃ madrapate prayāhi raṇe pāñcālānpāṇḍavānsṛñjayāṃśca /
tānvā haniṣyāmi sametya saṅkhye yāsyāmi vā droṇamukho yamāya //

na tvevāhaṃ na gamiṣyāmi madhye teṣāṃ śūrāṇāmiti śalyādya vidvi /
mitradroho marṣaṇīyo na me'yaṃ tyaktvā prāṇānanuyāsyāmi droṇam //

prājñasya mūḍhasya ca jīvitānte nāsti pramokṣo'ntakasannibhasya /
ato vidvannabhiyotsyāmi pārthaṃ diṣṭaṃ na śakyaṃ vyativartituṃ vai //

kalyāṇavṛttaḥ satataṃ hi rājā vaicitravīryasya suto mamāsīt /
tasyārthasidvyarthamahaṃ tyajāmi priyānbhogāndustyajaṃ jīvitaṃ ca //

vaiyāghracarmāṇamakūjanākṣaṃ haimaṃ trikośaṃ rajatatriveṇum /
rathaprabarhaṃ turagaprabārhai-- ryuktaṃ prādānmahyamimaṃ hi rāmaḥ //

dhanūṃṣi citrāṇi nirīkṣya śalya dhvajāngadāḥ sāyakāṃścograrūpān /
asiṃ ca dīptaṃ paramāyudhaṃ ca śaṅkhaṃ ca śubhraṃ svanavantamugram //

patākinaṃ vajranipātaniḥ svanaṃ sitāśvayuktaṃ śubhatūṇaśobhitam /
imaṃ samāsthāya ratharṣabhaṃ raṇe dṛḍhaṃ haniṣyāmyahamarjunaṃ balāt //

taṃ cenmṛtyuḥ sarvaharo'bhirakṣe-- tsadā'pramattaḥ samare pāṇḍuputram /
taṃ vā haniṣyāmi raṇe sametya yāsyāmi vā droṇamukho yamāya //

yamavaruṇakuberavāsavā vā yadi yugapatsagaṇā mahāhave /
jugupuriha sametya phalgunaṃ kimu bahunā saha tairjayāmi tam //
sañjaya uvāca /

iti raṇarabhasasya katthata-- stadupaniśamya vacaḥ sa madrarāṭ /
avahasadavamanya vīryavān pratiṣiṣidhe ca jagāda cottaram //
śalya uvāca /

virama virama karṇa katthanā-- datirabhaso'pyativācamuktavān /
kva ca hi naravaro dhanañjayaḥ kva punariha tvamaho narādhamaḥ //

yadusadanamupendrapālitaṃ tridivamivāmararājarakṣitam /
prasabhamativiloḍya ko hare-- tpuruṣavarāvarajāmṛte'rjunāt //

tribhuvanasṛjamīśvareśvaraṃ ka iha pumānbhavamāhvayedyudhi /
mṛgavadhakalahe ṛte'rjunāt surapativīryasamaprabhāvataḥ //

asurasuramahoragānnarān garuḍapiśācasayakṣarākṣasān /
iṣubhirajayadagnigauravāt svabhilaṣitaṃ ca havirdadau jayaḥ //

smarasi nanu yadā parairhṛtaḥ sahadhṛtarāṣṭrasuto vimokṣitaḥ /
adhirathaja narottamairyutān kuruṣu bahūnvinihatya tānarīn //

prathamamapi palāyite tvayi priyakalahā dhṛtarāṣṭrasūnavaḥ /
smarasi nanu yadā pramocitāḥ khacaragaṇānavajitya pāṇḍavaiḥ //

samuditabalavāhanāḥ punaḥ puruṣavareṇa jitāḥ stha gograhe /
sagurugurusutāḥ sabhīṣmakāḥ kimu na jitaḥ sa tadā tvayā'rjunaḥ //

idamaparamupasthitaṃ puna-- stava nidhanāya suyudvamadya vai /
yadi na ripubhayātpalāyase samaragato'dya hato'si sūtaja //
sañjaya uvāca /

iti bahuparuṣaṃ prabhāṣati pramanasi madrapatau ripustavam /
bhṛśamabhiruṣitaḥ sarantapaḥ kurupṛtanāpatirāha madrapam //
karṇa uvāca /

bhavatu bhavatu kiṃ vikatthase nanu marma tasya hi yuddhamudyatam /
yadi sa jayati māmihāhave tata idamastu sukatthitaṃ tava //
sañjaya uvāca /

evamastviti madreśa uktvā nottaramuktavān /
yāhi śalyeti cāpyenaṃ kaṃrṇaḥ prāha yuyutsayā //

sa rathaḥ prayayau śatrūnnighnataḥ śalyasārathiḥ /
nighnannamitrānsamare tamoghnaḥ savitā yathā //

tataḥ prāyātprītimānvai rathena vaiyāghreṇa śvetayujā'tha karṇaḥ /
sa cālokya dhvajinīṃ pāṇḍavānāṃ dhanañjayaṃ tvarayā paryapṛcchat //