Mahabharata · Chapter 8.32

prayatnena tadā karṇo harṣayanvāhinīṃ tava /
ekaikaṃ samare dṛṣṭvā pāṇḍavaṃ paryapṛcchata //

yo mamādya mahātmānaṃ darśayecchvetavāhanam /
tasmai dadyāmabhipretaṃ dhanaṃ yanmanasecchati //

na cettadabhimanyeta tasmai dadyāmahaṃ punaḥ /
śakaṭaṃ ratnasampūrṇaṃ yo me brūyādvanañjayam //

na cettadabhimanyeta puruṣo'rjunadarśivān /
śataṃ dadyāṃ gavāṃ tasmai naityakaṃ kāṃsyadohanam //

śataṃ grāmavarāṃścaiva dadyāmarjunadarśine / tathā tasmai punardadyāṃ śvetamaśvatarīratham /
yuktamañjanakeśībhiryo me brūyādvanañjayam //

na cettadabhimanyeta puruṣo'rjunadarśivān /
anyaṃ vā'smai punardadyāṃ sauvarṇaṃ hastiṣaṅgavam //

tathāpyasmai punardadyāṃ strīṇāṃ śatamalaṅkṛtam /
śyāmānāṃ niṣkakaṇṭhīnāṃ gītavādyavipaścitām //

na cettadabhimanyeta puruṣo'rjunadarśivān /
tasmai dadyāṃ śataṃ nāgāñśataṃ grāmāñśataṃ rathān //

suvarṇasya ca mukhyasya hayāgryāṇāṃ śataṃ śatān /
ṛdvyā guṇaiḥ sudāntāṃśca dhuryavāhānsuśikṣitān //

tathā suvarṇaśṛṅgīṇāṃ godhenūnāṃ catuḥśatam /
dadyāṃ tasmai savatsānāṃ yo me brūyādvanañjayam //

na cettadabhimanyeta puruṣo'rjunadarśivān /
anyadasmai varaṃ dadyāṃ śvetānpañcaśatānhayān //

hemabhāṇḍaparicchannānsumṛṣṭamaṇibhūṣaṇān /
sudāntānapi caivāhaṃ dadyāmaṣṭādaśāparān //

rathaṃ ca śubhraṃ sauvarṇaṃ dadyāṃ tasmai svalaṅkṛtam /
yuktaṃ paramakāmbhojairyo me brūyādvanañjayam //

na cettadabhimanyeta puruṣo'rjunadarśivān /
anyadasmai varaṃ dadyāṃ kuñjarāṇāṃ śatāni ṣaṭ //

kāñcanairvividhairbhāṇḍairācchannānhemamālinaḥ /
utpannānaparānteṣu vinītānhastiśikṣakaiḥ //

na cettadabhimanyeta puruṣo'rjunadarśivān /
anyadasmai varaṃ dadyāṃ vaiśyagrāmāṃścaturdaśa //

susphītāndhanasaṃyuktānpratyāsannavanodakān /
akutobhayānsusampannānrājabhojyāṃścaturdaśa //

dāsīnāṃ niṣkakaṇṭhīnāṃ māgadhīnāṃ śataṃ tathā /
pratyagravayasāṃ dadyāṃ yo me brūyāddhanañjayam //

na cettadabhimanyeta puruṣo'rjunadarśivān /
anyaṃ tasmai varaṃ dadyāṃ yamasau kāmayetsvayam //

putradārānvihāyaiva yadanyadvittamasti me /
tacca tasmai punardadyāṃ yadyacca manasecchati //

hatvā ca sahitau kṛṣṇau tayorvittāni sarvaśaḥ /
tasmai dadyāmahaṃ yo me prabrūyātkeśavārjunau //
sañjaya uvāca /

etā vācaḥ subahuśaḥ karṇa uccārayanyudhi /
dadhmau sāgarasambhūtaṃ susvaraṃ śaṅkhamuttamam //

tā vācaḥ sūtaputrasya tathā yuktā niśamya tu /
duryodhano mahārāja saṃhṛṣṭaḥ sānujo'bhavat //

tato dundubhinirghoṣo mṛdaṅgānāṃ ca sarvaśā /
siṃhanādaḥ savāditraḥ kuñcarāṇāṃ ca niḥsvanaḥ //

prādurāsīttadā rājaṃstvatsainye puruṣarṣabha /
yodhānāṃ samprahṛṣṭānāṃ tathā samabhavatsvanaḥ //

tathā prahṛṣṭe sainye taṃ pluvamānaṃ mahāratham / vikatthamānaṃ ca tadā rādheyamarikarśanam /
madrarājaḥ prahasyedaṃ vacanaṃ pratyabhāṣata //