Mahabharata · Chapter 8.30

ayaṃ te karṇa sārathyaṃ madrarājaḥ kariṣyati /
kṛṣṇādabhyadhiko yantā deveśasyeva mātaliḥ //

yathā harihayairyuktaṃ saṅgṛhṇāti sa mātaliḥ /
śalyastathā tavādyāyaṃ saṃyantā rathavājinām //

yodhe tvayi rathasthe ca madrarāje ca sārathau /
rathaśreṣṭho dhruvaṃ saṅkhye pārthānabhibhaviṣyati //
sañjaya uvāca /

tato duryodhano bhūyo madrarājaṃ tarasvinam /
uvāca rājansaṅgrāme'dhyuṣite paryupasthite //

karṇasya yaccha saṅgrāme madrarāja hayottamān /
tvayā'bhigupto rādheyo vijeṣyati dhanañjayam //

ityukto rathamāsthāya tatheti prāha bhārata /
śalye'bhyupagate karṇaḥ sārathiṃ sumanā'bravīt //

tvaṃ sūta syandanaṃ mahyaṃ kalpayetyasakṛttvaran //

tato jaitraṃ rathavaraṃ gandharvanagaropamam /
vidhivatkalpitaṃ bhadraṃ jayetyuktvā nyavedayat //

taṃ rathaṃ rathināṃ śreṣṭhaḥ karṇo'bhyarcya yathāvidhi /
sampāditaṃ brahmavidā pūrvameva purodhasā //

kṛtvā pradakṣiṇaṃ yatnādupasthāya ca bhāskaram /
samīpasthaṃ madrarājamāroha tvamathābravīt //

tataḥ karṇasya durdharṣaṃ syandanapravaraṃ mahat /
āruroha mahātejāḥ śalyaḥ siṃha ivācalam //

tataḥ śalyāśritaṃ dṛṣṭvā karṇaḥ svaṃ rathamuttamam /
adhyatiṣṭhadyathā'mbhodaṃ vidyutvantaṃ divākaraḥ //

tāvekarathamārūḍhāvādityāgnisamatviṣau /
abhrājetāṃ yathā meghaṃ sūryāgnī sahitau divi //

saṃstūyamānau tau vīrau tadāstāṃ dyutimattamau /
ṛtviksadasyairindrāgnī stūyamānāvivādhyare //

sa śalyasaṅgṛhītāśve rathe karṇaḥ sthito babhau /
dhanurviṣphārayanghoraṃ pariveṣīva bhāskaraḥ //

āsthitaḥ sa rathaśreṣṭhaṃ karṇaḥ śaragabhastimān /
prababhau puruṣavyāghro mandarastha ivāṃśumān //

taṃ rathasthaṃ mahābāhuṃ yudvāyāmitatejasam /
duryodhanastu rādheyamidaṃ vacanamabravīt //

akṛtaṃ droṇabhīṣmābhyāṃ duṣkaraṃ karma saṃyuge /
kuruṣvādhirathe vīra miṣatāṃ sarvadhanvinām //

manogataṃ mama hyāsīdbhīṣmadroṇau mahārathau /
arjunaṃ bhīmasenaṃ ca nihantārāviti dhruvam //

tābhyāṃ yadakṛtaṃ vīra vīrakarma mahāmṛdhe /
tatkarma kuru rādheya vajrapāṇirivāparaḥ //

gṛhāṇa dharmarājaṃ vā jahi vā tvaṃ dhanañjayam /
bhīmasenaṃ ca rādheya mādrīputrau yamāvapi //

jayaśca te'stu bhadraṃ te prayāhi puruṣarṣabha /
pāṇḍuputrasya sainyāni kuru sarvāṇi bhasmasāt //

tatastūryasahasrāṇi bherīṇāmayutāni ca /
vādyamānānyarocanta meghaśabdo yathā divi //

pratigṛhya tu tadvākyaṃ rathastho ratharuttamaḥ /
abhyabhāṣata rādheyaḥ śalyaṃ yuddhaviśāradam //

codayāśvānmahābāho yāvadvanmi dhanañjayam /
bhīmasenaṃ yamau cobhau rājānaṃ ca yudhiṣṭhiram //

adya paśyatu me śalya bāhuvīryaṃ dhanañjayaḥ /
asyataḥ kaṅkapatrāṇāṃ sahasrāṇi śatāni ca //

adya kṣepsyāmyahaṃ śalya śarānparamatejanān /
pāṇḍavānāṃ vināśāya duryodhanajayāya ca //
sañjaya uvāca /

etacchrutvā vacastasya śalyaḥ karṇaṃ vaco'bravīt /
kathaṃ nu tānmahāvīryānpāṇḍavānavamanyase //

sarvāstrajñānmaheṣvāsānsarvānena mahābalān / anivartino mahābhāgānajayyānsatyavikramān /
api sañjanayeyurye bhayaṃ sākṣācchatakratoḥ //

yadā śroṣyasi nirghoṣaṃ visphūrjitamivāśaneḥ /
rādheya pārthadhanuṣastadā naivaṃ vadiṣyasi //

yadā drakṣyasi bhīmena kuñjarānīkamāhave /
viśīrṇadantaṃ nihataṃ tadā naivaṃ vadiṣyasi //

yadā drakṣyasi saṅgrāme dharmaputraṃ yamau tathā /
śitaiḥ pṛṣatkaiḥ kurvāṇānabhracchāyāmivāmbare //

asyataḥ kṣiṇvataścārīm̐llaghuhastāndurāsadān /
pārthivāgapi cānyāṃstvaṃ tadā naivaṃ vadiṣyasi //
sañjaya uvāca /

anādṛtya tu tadvākyaṃ madrarāje bhāṣitam /
drakṣyasyadyetyavocattaṃ śalyaṃ karṇo janeśvara //