Mahabharata · Chapter 8.29

evaṃ sa bhagavāndevaḥ sarvalokapitāmahaḥ /
sārathyamakarottatra brahmā rudro'bhavadrathī //

rathino'bhyadhiko vīra kartavyo rathasārathiḥ /
tasmāttvaṃ puruṣavyāghra niyaccha turagānyudhi //

yathā devagaṇaistatra vṛto yatnātpitāmahaḥ /
tathā'smābhirbhavānyatnātkarṇādabhyadhiko vṛtaḥ //

yathā devairmahārāja īśvarādadhiko vṛtaḥ / tathā devairmahārāja kṣipraṃ rudrasyava pitāmahaḥ /
niyaccha turagānyudve rādheyasya mahādyute //
śalya uvāca /

mayāpyetannaraśreṣṭha bahuśo narasiṃhayoḥ /
kathyamānaṃ śrutaṃ divyamākhyānamatimānuṣam //

yathā ca cakre sārathyaṃ bhavasya prapitāmahaḥ /
yathā'surāśca nihatā iṣuṇaikena bhārata //

kṛṣṇasya cāpi viditaṃ sarvametatpurā hyabhūt //

yathā pitāmaho jajñe bhagavānsārathistadā /
anāgatamatikrāntaṃ veda kṛṣṇo'pi tattvataḥ //

etadarthaṃ viditvā'pi sārathyamupajagmivān /
svayambhūriva rudrasya kṛṣṇaḥ pārthasya bhārata //

yadi hanyācca kaunteyaṃ sūtaputraḥ kathañcanaḥ /
dṛṣṭvā pārthaṃ hi nihataṃ svayaṃ yotsyati keśavaḥ //

śaṅkhacakragadāpāṇirdhakṣyate tava vāhinīm / na cāpi tasya kruddhasya vārṣṇeyasya mahātmanaḥ /
sthāsyate pratyanīkeṣu kaścidatra nṛpastava //

sañjaya uvāca /

taṃ tathā bhāṣamāṇaṃ tu madrarājamarindamaḥ /
pratyuvāca mahābāhuradīnātmā sutastava //

māvamaṃsthā mahābāho karṇaṃ vaikartanaṃ raṇe /
sarvaśastrabhṛtāṃ śreṣṭhaṃ sarvaśāstrārthaparāgam //

yasya jyātalanirghoṣaṃ śrutvā bhayakaraṃ mahat /
pāṇḍaveyāni sainyāni vidravanti diśo daśa //

pratyakṣa te mahābāho yathā rātrau ghaṭotkacaḥ /
māyāśatāni kurvāṇo hato māyāpuraskṛtaḥ //

na cātiṣṭhata bībhatsuḥ pratyanīke kathañcana /
etāṃśca divasānsarvānbhayena mahatā vṛtaḥ //

bhīmasenaśca balavāndhanuṣkoṭyābhicoditaḥ /
uktaśca sañjñayā rājanmūḍha audariko yathā //

mādrīputrau tathā śūrau yena jitvā mahāraṇe /
kamapyarthaṃ puraskṛtya na hatau yudhi māriṣa //

yena vṛṣṇipravīrastu sātyakiḥ sātvatāṃ varaḥ /
nirjitya samare śūro visthaśca balātkṛtaḥ //

sṛñjayāścetare sarve dhṛṣṭadyumnapurogamāḥ /
asakṛnnirjitāḥ saṅkhye smayamānena saṃyuge //

taṃ kathaṃ pāṇḍavā yudve vijeṣyanti mahāratham /
yo hanyātsamare krudvo vajrahastaṃ purandaram //

tvaṃ ca sarvāstravidvīraḥ sarvavidyāstrapāragaḥ /
bāhuvīryeṇa te tulyaḥ pṛthivyāṃ nāsti kaścana //

tvaṃ śalyabhūtaḥ śatrūṇāmaviṣahyaḥ parākrame /
tatastvamucyase rājañśalya ityarisūdana //

tava bāhubalaṃ prāpya na śekuḥ sarvasātvatāḥ /
tava bāhubalādrājankiṃ nu kṛṣṇo balādhikaḥ //

yathā hi kṛṣṇena balaṃ dhāryaṃ vai phalgune hate /
tathā karṇātyayībhāve tvayā dhāryaṃ mahadbalam //

kimarthaṃ samare sainyaṃ vāsudevo nyavārayat /
kimarthaṃ ca bhavānsainyaṃ na haniṣyati māriṣa //

tvatkṛte padavīṃ gantumiccheyaṃ yudhi māriṣa /
sodarāṇāṃ ca vīrāṇāṃ sarveṣāṃ ca mahīkṣitām //
śalya uvāca /

yanmāṃ bravīṣi gāndhāre agre sainyasya mānada /
viśiṣṭaṃ devakīputrātprītimānasmyahaṃ tvayi //

eṣa sārathyamātiṣṭhe rādheyasya yaśasvinaḥ /
yudhyataḥ pāṇḍavāgryeṇa yathā tvaṃ vīra manyase //

samayaśca hi me vīra kaścidvaikartanaṃ prati /
utsṛjeyaṃ yathāśradvamahaṃ vāco'sya sannidhau //
sañjaya uvāca /

tatheti rājanputraste saha karṇena māriṣa /
abravītmadrarājānaṃ sarvakṣatrasya sannidhau //

sārathyasyābhyupagamācchalyenāśvāsitastadā /
duryodhanastadā hṛṣṭaḥ karṇaṃ tamabhiṣasvaje //

abravīcca punaḥ karṇaṃ stūyamānaḥ sutastava /
jahi pārthānraṇe sarvānmahendro dānavāniva //

sa śalyenābhyupagate hayānāṃ sanniyacchane /
karṇo hṛṣṭamanā bhūyo duryodhanabhāṣata //

nātihṛṣṭamanā hyeṣa madrarājo'bhibhāṣate /
rājanmadhurayā vācā punarenaṃ bravīhi vai //

tato rājā mahāprājñaḥ sarvāstrakuśalo balī /
duryodhano'bravīcchalyaṃ madrarājaṃ mahīpatim //

pūrayanniva ghoṣeṇa meghagambhīrayā girā /
śalya karṇo'rjunenādya yodvavyamiti manyate //

tasya tvaṃ puruṣavyāghra niyaccha turagānyudhi / karṇo hatvetarānsarvānphalgunaṃ hantumicchati /
tasyābhīṣugrahe rājanprayāce tvāṃ punaḥ punaḥ //

pārthasya sacivaḥ kṛṣṇo yathā'bhīṣugraho varaḥ /
tathā tvamapi rādheyaṃ sarvataḥ paripālaya //
sañjaya uvāca /

tataḥ śalyaḥ pariṣvajya sutaṃ te vākyamabravīt /
duryodhanamamitraghnaṃ prīto madrādhipastadā //
śalya uvāca /

evaṃ cenmanyase rājangāndhāre priyadarśana /
tasmātte yatpriyaṃ kiñcittatsarvaṃ karavāṇyaham //

yatrāsmi bharataśreṣṭha yogyaḥ karmaṇi karhicit /
tatra sarvātmanā yukto vakṣye kāryaṃ parantapa //

yattu karṇamahaṃ brūyāṃ hitakāmaḥ priyāpriye /
mama tatkṣamatāṃ sarvaṃ bhavānkarṇaśca sarvaśaḥ //
karṇa uvāca /

īśānasya yathā brahmā yathā pārthasya keśavaḥ /
tathā nityaṃ hite yukto madrarāja bhavasva naḥ //
śalya uvāca /

ātmanindātmapūjā ca paranindā parastavaḥ /
anācaritamāryāṇāṃ vṛttametaccaturvidham //

yattu vidvanpravakṣyāmi praxxxxyārthamahaṃ tava /
ātmanaḥ stavasaṃyuktaṃ tannibodha yathātatham //

ahaṃ śakrasya sārathye yogyo mātalivatprabho /
apramādātprayogācca jñānavidyācikitsanaiḥ //

tataḥ pārthena saṅgrāme yudhyamānasya te'nagha /
vāhayiṣyāmi turagānvijvaro bhava sūtaja //