Mahabharata · Chapter 8.26

tejaso'rdhaṃ surā dattvā śaṅkarāya mahātmane /
paśutvamapi copetya viśvakarmāṇamavyayam //

ūcuḥ sarve samābhāṣya rathaḥ saṅkalpyatāmiti /
viśvakarmā'pi sañcintya rathaṃ divyamakalpayat //

sametāṃ pṛthivīṃ devī viśālāṃ puramālinīm /
saparvatavanadvīpāṃ cakre bhūtadharāṃ ratham //

īṣāṃ nakṣatravaṃśaṃ ca chatraṃ merumahāgirim /
anekadrusañchannaṃ ratnākaramanuttamam //

himavantaṃ ca vindhyaṃ ca nānādrumalatākulam /
avaskaraṃ pratiṣṭhānaṃ kalpayāmāsa vai tadā //

astangirimadhiṣṭhānaṃ nānādvijagaṇāyutam /
cakāra bhagavāṃstvaṣṭā udayaṃ rathakūbaram //

mīnanakrajhaṣāvāsaṃ dānavālayamuttamam /
samudramakṣaṃ vidadhe pattanākaraśobhitam //

cakraṃ cakre candramasaṃ tārakāgaṇamaṇḍitam /
divākaraṃ cāpyaparaṃ cakraṃ cakreṃ'śumālinam //

gaṅgāṃ sarasvatīṃ tūṇīṃ cakre viśvakṛdavyayaḥ /
alaṅkārā rathasyāsannāpagāḥ saritastathā //

trīnagnīnmantravaccakre rathasyātha triveṇukam /
anukarṣānrathe dīptānvarūthāṃścāpi tārakāḥ //

oṣadhīrvīrudhaścaiva ghaṇṭājālaṃ ca bhānumat /
alañcakāra ca rathaṃ māsapakṣartubhirvibhuḥ //

ahorātraiḥ kalābhiśca kāṣṭhābhirayanaistathā /
dyāṃ yugaṃ yugaparvāṇi saṃvartakabalāharakān //

śamyāṃ dhṛtiṃ ca medhāṃ ca sthitiṃ sannatimeva ca /
ṛghvedaṃ sāmavedaṃ ca dhuryāvaśvāvakalpayat //

pṛṣṭhāśvau tu yajurvedaḥ kalpito'tharvaṇastathā /
aśvānāṃ cāpyalaṅkāraṃ vidadhe padasañcayam //

sinīvālīmanumatiṃ kuhūṃ rākāṃ ca suprabhām / yoktāṇi cakre cāśvānāṃ kūśmāṇḍāṃścāpi pannagān /

tālapṛṣṭho'tha nahuṣaḥ kārkoṭakadhanañjayau /
itare cābhavannāgā hayānāṃ vāhabandhanam //

abhīśavaḥ ṣaḍaṅgāni kalpitāni mahīpate /
oṅkāraḥ kalpitastasya pratodo viśvakarmaṇā //

yajñāḥ sarve pṛthaklṛptā rathāṅgāni ca bhāgaśaḥ /
adhiṣṭhānaṃ manaścāsītparirathyā sarasvatī //

nānāvarṇāni śastrāṇi patākāḥ pavaneritāḥ /
vidyudindradhanuryuktaṃ rathaṃ dīptyā vyadīpayat //

varma yoddhuṃ ca vihitaṃ namo grahagaṇākulam /
abhedyaṃ bhānumaccitraṃ kālacakraparikṣatam //

evamasminmahārāja kalpite rathasattame /
tvaṣṭrā manujaśārdūla dviṣatāṃ bhayavardhane //

svānyāyudhāni divyāni nyadadhācchaṅkaro rathe /
dhvajayaṣṭiṃ viyatkṛtvā sthāpayāmāsa govṛṣam //

brahmadaṇ़ḍaḥ kāladamḍo rudradaṇḍaśca te jvarāḥ /
pariṣkārā rthasyāsansamantāddiśamuddhatāḥ //

vicitramṛtubhiḥ ṣaḍbhiḥ kṛtvā saṃvatsaraṃ dhanuḥ /
chāyāmevātmanaścakre dhanurjyāmakṣayāṃ dhruvām //

kālo hi bhagavānrudrastacca saṃvatsaraṃ dhanuḥ /
tasmādraudrī kālarātrī jyā kṛtā dhanuṣo jarā //

tato rathe rathāśvāṃstānṛṣayaḥ samayojayan /
ekaikaśaḥ susaṃhṛṣṭānādāya sudhṛtavratāḥ //

dakṣiṇasyāṃ dhuri kṛta ṛgvedo mantrapāragaiḥ /
savyataḥ sāmavedaśca yukto rājanmaharṣibhiḥ //

pārṣṭhidakṣiṇato yukto yajurvedaḥ suradvijaiḥ /
itarasyāṃ tathā pārṣṭhyāṃ yukto rājannatharvaṇaḥ //

evaṃ te vājino yuktā yajñavidbhistathā rathe /
aśobhanta tathā yuktā yathaivādhvaramadhyagāḥ //

kalpayitvā rathaṃ divyaṃ tato bāṇamakalpayat /
cintayitvā hariṃ viṣṇumavyayaṃ yajñavāhanam //

śaraṃ saṅkalpayāñcakre viśvakarmā mahāmanāḥ /
tasya vājāṃśca puṅkhaṃ ca kalpayāmāsa vai tadā //

puṇyagandhavahaṃ rājañśvasanaṃ rājasattama /
agnīṣomau śaramukhe kalpayāmāsa vai tadā //

agnīṣomātmakaṃ kṛtsnamucyate vaiṣṇavaṃ jagat /
viṣṇurātmā bhagavato bhavasyāmitatejasaḥ //

tasmāddhanurjyāsaṃsparśaṃ sa viṣehe śarasya vai /
tasmiñśare tīkṣṇamanyumamuñcadduḥsahaṃ prabhuḥ //

bhṛgvaṅgiromanyubhavaḥ krodhāgniratiduḥsahaḥ /
sa nīlalohito dhūmraḥ kṛttivāsā bhayānakaḥ //

ādityāyutasaṅkāśastejojvālāvṛto bhavaḥ /
duścaryacyāvako jetā hantā brahmadviṣāṃ varaḥ //

tasyāṅgāni samāśritya sthitaṃ viśvamidaṃ jagat /
jaṅgamājaṅgamaṃ rājañchuśubhe'dbhutadarśanam //

dṛṣṭā tu taṃ rathaṃ divyaṃ kavacī sa śarāsanī /
ādade sa śaraṃ divyaṃ somaviṣṇvagnivāyujam //

tamādāya mahādevastrāsayandaityadānavān /
āruroha tadā yattaḥ kampayanniva rodasī //

maharṣibhiḥ stūyamāno vandyamānaśca vandibhiḥ /
upanṛttaścāpsarasāṃ gaṇairnṛttaviśāradaiḥ //

sa śobhamāno varadaḥ khaṅgī bāṇī śarāsanī /
hasannivābravīddevaḥ sārathiḥ ko bhavediti //