Mahabharata · Chapter 8.25

pitṛdevarṣisaṅghebhyo'bhaye datte mahātmanā /
satkṛtya śankaraṃ prāha brahmā lokapitāmahaḥ //

imānyasuradurgāṇi lokāṃstrīnākramanti hi /
kaśca prajāpatirghorāṃstānsrarvāñjahi mā ciram //

varātisargāddeveśa prājāpatyamidaṃ param /
mayā'dhitiṣṭhatā datto dānavebhyo mahānvaraḥ //

nāstyanyo yudhi teṣāṃ vai nihantā iti naḥ śrutam / tānatikrāntamaryādānnānyaḥ saṃhartumarhati /
tvāmṛte sarvabhūteśa tvaṃ hyeṣāṃ pratyarirvadhe //

sa tvaṃ deva prapannānāṃ yācatāṃ ca divokasām /
kuru prasādaṃ varada dānavāñjahi saṃyuge //

tvatprasādājjagatsarvaṃ sukhamaidhata mānada /
śaraṇyastvaṃ hi devānāṃ vayaṃ tvāṃ śaraṇaṃ gatāḥ //
īśvara uvāca /

hantavyāḥ śatravaḥ sarve yuṣmākamiti me matiḥ /
na tvekaścotsahe hantuṃ balinaḥ suravidviṣaḥ //

te yūyaṃ sahitāḥ sarve madīyenāpi tejasā /
jayadhvaṃ yudhi tānsarvānsaṅghātena mahābalān //
devā ūcuḥ /

asmattejobalaṃ yāvattāvaddviguṇameva vā /
tatteṣāmiti manyāmo dṛṣṭatejobalā hi te //
īśvara uvāca /

vadhyāste sarvathā pāpā ye yuṣmāsvaparādhinaḥ /
mama tejobalārdhena sarve mṛdgatha śātravān //
devā ūcuḥ /

bibhartuṃ tava tejordhaṃ na śakṣyāma sureśvara /
sarveṣāṃ no balārdhena tvameva jahi śātravān //

vayaṃ ca sarvathā deva rakṣaṇīyāstathaiva ca /
sa no rakṣa mahādeva tvameva jahi śātravān //
īśvara uvāca /

mama tejo na śaktā hi sarve dhārayituṃ yadi /
ahamenānvadhiṣyāmi yuṣmattejordhasaṃyutaḥ //

balārdhaṃ yadi me devā na dhārayitumāhave /
śaktāḥ sarve hi saṅgamya yūyaṃ tatprabravīmi vaḥ //

samā bhavanti me sarve dānavāścāmarāśca ye /
śivo'smi sarvabhūtānāṃ śivatvaṃ tena me surāḥ //

kintvadharmeṇa vartante yasmātte suraśatravaḥ /
tasmādvadhyā mayāpyete yuṣmākaṃ ca hitepsayā //

śaraṇaṃ vaḥ prapannānāṃ dharmeṇa ca jigīṣatām /
sāhāyyaṃ vaḥ kariṣyāmi nihaniṣyāmi vo ripūn //

dīyatāṃ ca balārdhaṃ me sarvairapi pṛthakpṛthak /
paśutvaṃ caiva me lokāḥ sarve kalpantu pīḍitāḥ //

paśūnāṃ tu patitvaṃ me bhavatvadya divaukasaḥ /
evaṃ na pāpaṃ prāpsyāmi paśūnhatvā suradvipaḥ //

kalpayadhvaṃ rathaṃ divyaṃ rathāśvāṃścaiva pāragān /
dhanuḥ śaraṃ sārathiṃ ca tato jeṣyāmi vo ripūn //

iti śrutvā vaco devā devadevasya bhūpateḥ /
viṣādamagamansarve paśutvaṃ prati śaṅkitāḥ //

teṣāṃ bhāvaṃ bhavo jñātvā devastānabravīdidam /
mā vostu paśubhāve'sminbhayaṃ vibudhasattamāḥ //

śrūyatāṃ paśubhāvasya vimokṣaḥ kriyatāṃ ca saḥ //

yo vaḥ paśupateścaryāṃ cariṣyati sa mokṣyate /
paśutvāditi satyaṃ vaḥ pratijāne samāgame //

ye cāpyanye cariṣyanti vrataṃ mokṣyanti te'pi ca //

naiṣṭhikaṃ dvādaśābdaṃ vā ardhamabdamṛtutrayam /
māsaṃ dvādaśarātraṃ guhyaṃ vrataṃ divyaṃ cariṣyatha //

taṃ tathetyabruvandevā devadevanamaskṛtam /
ūcuścedaṃ gṛhāṇedaṃ tejaso'rdhamiti prabhum //

pratyuvāca tathetyeva śūladhṛdrājasattama /
tataste pradaduḥ sarve tejaso'rdhaṃ mahātmane //

sarvamādāya sarveṣāṃ tejaso'rdhaṃ divaukasām /
tejasāpyadhiko bhūtvā bhūyo'pyatibalo'bhavat //

tataḥ prabhṛti devānāṃ devadevo'bhavadbhavaḥ /
patiśca sarvabhūtānāṃ paśūnāṃ cābhavattadā //

tasmātpaśupatiścokto bhavatvācca bhaveti vai // ardhamādāya sarveṣāṃ tejasā prajvalanniva /

bhāsayāmāsa tānsarvāndevadevo mahādyutiḥ // tato'bhiṣiṣicyuḥ sarve surā rudraṃ purāriṇam /

mahādeva iti hyāsīddevadevo maheśvaraḥ //