Mahabharata · Chapter 8.27

tamabruvandevagaṇā yaṃ bhavānsanniyokṣyate /
sa bhaviṣyati deveśa sārathiste na saṃśayaḥ //

tānabravīnmahādevo mattaḥ śreṣṭhataro hi yaḥ /
taṃ sārathiṃ kurudhvaṃ vai svayaṃ sañcintya mā ciram //

etacchrutvā vaco devāḥ sarve gatvā pitāmaham /
praṇipatyocurekāgrāḥ prasādyainaṃ maharṣibhiḥ //

tvayā yatkathitaṃ deva tridaśārinibarhaṇe /
tathā tatkṛtamasmābhiḥ prasannaśca vṛṣadhvajaḥ //

rathaśca vihito'smābhirvicitrāyudhasaṃvṛtaḥ /
sārathiṃ ca na jānīmaḥ kaḥ syāttasminrathottame //

tasmādvidhīyatāṃ kaścitsārathirdevasattama / saphalāṃ tāṃ giraṃ deva kartumarhasi no vibho /
evamasmāsu hi purā bhagavannuktavānasi //

sadaiva yukto rathasattamo vai durādharṣo drāvaṇaḥ śātravāṇām /
pinākadhanvā vihito'tra yoddhā vibhīṣayandānavānudyato'sau //

tathaiva vedāśca hayā rathāgrya dharā saśailā ca ratho mahātmanaḥ /
nakṣatravaṃśānugato varūthī yasminyoddhā sārathinā'bhirakṣyaḥ //

tatra sārathireṣṭavyaḥ sarvairetairviśeṣavān //

taṃ praviṣṭā rathaṃ devā rathayodvārameva ca /
kavacāni ca śastrāṇi kārmukaṃ ca pitāmaha //

tvāmṛte sārathiṃ tatra nānyaṃ paśyāmahe vayam /
tvaṃ hi sarvairgaṇairyuktodevatābhyo'dhikaḥ prabho //

tvaṃ deva śakto lokeśa niyantuṃ pradrutānimān /
vedāṃśca sopaniṣadaḥ sārathirbhava naḥ svayam //

yodvuṃ balena vīryeṇa satvena vinayena ca /
adhikaḥsārathiḥkāryo nāsti cānyo'dhiko bhavāt //

sa bhavāṃstārayatvasmānkuru sārathyamavyaya /
bhavānabhyadhikastvatto nānyosti bhavitā tviha //

tvaṃ hi deveśa sarvaistu viśiṣṭo vadatāṃ vara /
taṃ rathaṃ tvaṃ samāruhya saṃyaccha paramānhayān //

tava prasādādvadhyeyurdeva daivatakaṇṭakāḥ /
sa no rakṣa mahābāho daityebhyo mahato bhayāt //

tvaṃ hi no gatiravyagra tavaṃ ntre goptā mahāvrata /
tvatprasādātsurāḥ sarve pūjyante tridive prabho //

iti te śirasā'gacchaṃstrilokeśaṃ pitāmaham /
devāḥ prasādayāmāsuḥ sārathyāyeti naḥ śrutam //
brahmovāca /

evametatsurāstathyaṃ nānyastvabhyadhiko bhavāt /
sārathitvaṃ kariṣyāmi śaṅkarasya mahātmanaḥ //

sarvathā rathinaḥ śreyānkartavyo rathasārathiḥ / tasmādetadyathātattvaṃ jñātvā yuṣmāṃśca saṅgatān /
saṃyacchāmi hayāneṣa vibudhāya kapardine //
duryodhana uvāca /

evamuktvā jaṭābhāraṃ saṃyamya prapitāmahaḥ / paridhāyājinaṃ gāḍhaṃ sannyasya ca kamaṇḍalum /
pratodapāṇirbhagavānāruroha rathaṃ tadā //

sārathau kalpite devairīśānasya mahātmanaḥ / tasminnārohati rathaṃ kalpitaṃ lokasambhṛtam /
śirobhiḥ patitā bhūmau turagā vedasambhṛtāḥ //

ubhābhyāṃ lokanāthābhyāmāsthitaṃ rathasattamam /
oḍhuṃ na śaktā vedāśvā jānubhyāmapatanmahīm //

abhīśubhistu bhagavānudyamya ca hayānvibhuḥ / astu vīryaṃ ca śauryaṃ ca vedāśvānāmiti prabhuḥ /
rathaṃ sañcodayāmāsa devānāṃ prabhuravyayaḥ //

tato'dhirūḍhe varade rathaṃ paśupatistadā /
sādhusādhviti deveśaṃ smayamāno'bhyabhāṣata //

yāhi deva yato daityāścodayāśvānarindama /
paśya bāhvorbalaṃ me'dya nighnataḥ śātravānraṇe //

tato'śvāṃścodayāmāsa manomārutaraṃhasaḥ /
purāṇyuddiśya khasthāni dānavānāṃ tarasvinām //

tataste sahasotpatya vedākhyā rathavājinaḥ /
kṣaṇena tena daityānāṃ purāṇi prāpayanharam //

atharvāṅgirasau cāstāṃ cakrarakṣau mahātmanaḥ / athādhijyaṃ dhanuḥ kṛtvā śarvaḥ sandhāya taṃ śaram /
yuktvā pāśupatāstreṇa tripuraṃ samacintayat //

tasminsthite tato rājanrudre sajjitakārmuke /
purāṇi tena kālena jagmurekatvamāśu vai //

ekībhāvaṃ gate caiva tripuratvamupāgate /
babhūva tumulo harṣo devatānāṃ mahātmanām //

tato devaguṇāḥ sarve siddhāśca paramarṣayaḥ /
jayeti vāco mumucuḥ saṃstuvanto maheśvaram //

tato'grataḥ prādurabhūttripuraṃ jaghnuṣo'surān /
anirdeśyāgryavapuṣo devasyāsahyatejasaḥ //

trīṇi dṛṣṭvaiva saṃsthāni purāṇyatha pinākadhṛt / sa tadvikṛṣya bhagavāndivyaṃ lokeśvaro dhanuḥ /
trailokyasāraṃ tamiṣuṃ mumoca tripuraṃ prati //

ekabāṇena taṃ devastripuraṃ parameśvaraḥ /
nijaghne sāsuragaṇaṃ devadevo maheśvaraḥ //

bāṇatejognidagdhaṃ tadviprakīrṇaṃ sahasradhā / mahadārtasvaraṃ kṛtvā nāvaśeṣamupāgatam /
madreśa sāsuragaṇaṃ prāpatatpaścimārṇave //

evaṃ hi tripuraṃ dagdhaṃ dānavāścāpyaśeṣataḥ /
maheśvareṇa kruddhena trailokyasya hitaiṣiṇā //

sa cātmakrodhajo vihnirdahetyukto nivāritaḥ /
trailokyamaviśeṣeṇa punardagdhuṃ pracakrame //

kālāgnimiva nirdagdhumutthitaṃ taṃ punaḥ punaḥ /
mākārṣīrbhasmāsāllokāniti tryakṣo'bravīdvacaḥ //

tataḥ prakṛtimāpannā delokāstatharṣayaḥ /
tuṣṭuvurvāgbhiragryābhiḥ sthāṇuṃ tripuravairiṇam //

te'nujñātā bhagavatā sarve jagmuryathāgatam /
kṛtakāmāḥ prasannena prajāpatimukhāḥ surāḥ //

evaṃ rudrasya kṛtavānsārathyaṃ tu pitāmahaḥ /
saṃyaccha turagānasya rādheyasya mahātmanaḥ //

tvaṃ hi kṛṣṇācca karṇācca phalgunācca guṇādhikaḥ /
balato rūpato yogādastrasampada eva ca //

samāsaktaṃ mahīpāla kuru me hitamīpsitam / yudve hyayaṃ rudrakalpastvaṃ ca brahmasamo'nagha /
tasmācchaktau yuvāṃ jetuṃ macchatrūndivi vā surān //

sa yathā śalya karṇo'yaṃ śvantāśvaṃ kṛṣṇasārathim /
pramathya hanyātkaunteyaṃ tathā nītirvidhīyatām //

tvayi rājyaṃ sukhaṃ caiva jīvitaṃ jayameva ca /
samāsaktaṃ mahīpāla kuru me hitamīpsitam //

saṃyacchāsya hayāntrājanmatpriyārthaṃ parantapa //