Mahabharata · Chapter 8.21

tataḥ karṇaṃ puraskṛtya tvadīyā yudvadurmadāḥ /
punarāvṛtya saṅgrāmaṃ cakrurdevāsuropamam //

dviradanararathāśvaśaṅkhaśabdaiḥ parihṛṣitā vividhaiśca śastrapātaiḥ / dviradarathapadātisādisaṅghāḥ parikupitābhimukhāḥ prajaghnire te //

śitaparaśvathasāsipaṭṭasai-- riṣubhiranekavidhaiśca sūditāḥ / dviradarathahayā mahāhave varapuruṣaiḥ puruṣāśca vāhanaiḥ //

kamaladinakarendusannibhaiḥ sitadaśanaiḥ sumukhākṣināsikaiḥ / ruciramakuṭakuṇḍalairmahī puruṣaśirobhirupastṛtā babhau //

parighamusalaśaktitaumarai-- rnakharabhuśuṇḍigadāśatairhatāḥ / dviradanarahayāḥ sahasraśo rudhiranadīpravahāstadā'bhavan //

prahatarathanarāśvakuñjaraṃ pratibhayadarśanamulbaṇavraṇam / tadahitahatamābabhau balaṃ pitṛpatirāṣṭramiva prajākṣaye //

atha tava naradeva sainikā-- stava ca sutāḥ surasūnusannibhāḥ / amitabalapuraḥ sarā raṇe kuruvṛṣabhāḥ śiniputramabhyayuḥ //

tadatirudhirabhīmamābabhau puruṣavarāśvarathadvipākulam / lavaṇajalasamudvatasvanaṃ balamasurāmarasainyasaprabham //

surapatisamavikramastata-- stridaśavarāvarajopamaṃ yudhi / dinakarakiraṇaprabhaiḥ pṛṣatkai ravitanayo'bhyahanacchinipravīram //

tamapi sarathavājisārathiṃ śinivṛṣabho vividhaiḥ śaraistvaran / bhujagaviṣasamaprabhai raṇe puruṣavaraṃ samavāstṛṇottadā //

śinivṛṣabhaśarairnipīḍitaṃ tava suhṛdo vasuṣeṇamabhyayuḥ / tvaritamatirathā ratharṣabhaṃ dviradarathāśvapadātibhiḥ saha //

tadudadhinibhamādravadbalaṃ tvaritataraiḥ samabhidrutaṃ paraiḥ / drupadasutamukhaistadā'bhavat puruṣarathāśvagajakṣayo mahān //

atha puruṣavarau kṛtāhnikau bhavamabhipūjya yathāvidhi prabhum / arivadhakṛtaniścayau drutaṃ tava balamarjunakeśavau sṛtau //

jaladaninadaniḥsvanaṃ rathaṃ pavanavidhūtapatākaketanam / sitahayamupayāntamantikaṃ kṛtamanaso dadṛśustadā'rayaḥ //

atha viṣphārya gāṇḍīvaṃ rathe nṛtyannivārjunaḥ /
śarasambādhamakarotkhaṃ diśaḥ pradiśastathā //

rathānvimānapratimānmajjayansāyudhadhvajān /
sasārathīṃstadā bāṇairabhrāṇīvānilo'vadhīt //

gajāngajaprayantṝṃśca vaijayantyāyudhadhvajān /
sādino'śvāṃśca pattīṃśca śarairninye yamakṣayam //

tamantakamiva kruddhamanivāryaṃ mahāratham /
duryodhano'bhyayādeko nighnanbāṇairajihmagaiḥ //

tasyārjuno dhanuḥ sūtamaśvānketuṃ ca sāyakaiḥ /
hatvā saptabhirekena cchatraṃ ciccheda patriṇā //

navamaṃ ca samādhāya vyasṛjatprāṇaghātinam /
duryodhanāyeṣuvaraṃ taṃ drauṇiḥ saptadhā'cchinat //

tato drauṇerdhanuśchitvā hatvā cāśvarathāñśaraiḥ /
kṛpasyāpi tadatyugraṃ dhanuściccheda pāṇḍavaḥ //

hārdikyasya dhanuśchittvā dhvajaṃ cāśvāṃstadā'vadhīt /
duḥśāsanasyeṣvasanaṃ chittvā rādheyamabhyayāt //

atha sātyakimutsṛjya tvarankarṇo'rjunaṃ tribhiḥ /
vidvvā vivyādha viṃśatyā kṛṣṇaṃ pārthaṃ punaḥpunaḥ //

na glānirāsītkarṇasya kṣipataḥ sāyakānbahūn /
raṇe vinighnataḥ śatrūnkruddhasyeva śatakratoḥ //

atha sātyakirāgatya karṇaṃ viddvā śitaiḥ śaraiḥ /
navatyā navabhiścograiḥ śatena punarārpayat //

tataḥ pravīrāḥ pārthānāṃ sarve karṇamapīḍayan /
yudhāmanyuḥ śikhaṇḍī ca draupadeyāḥ prabhadrakāḥ //

uttamaujā yuyutsuśca yamau pārṣata eva ca /
cedikārūśamātsyānāṃ kekayānāṃ ca yadbalaṃ //

cekitānaśca balavāndharmarājaśca suvrataḥ /
ete rathāśvadviradaiḥ pattibhiścogravikramaiḥ //

parivārya raṇe karṇaṃ nānāśastrairavākiran /
bhāṣanto vāgbhirugrābhiḥ sarve karṇavadhe dhṛtāḥ //

tāṃ śastravṛṣṭiṃ bahudhā karṇaśchittvā śitaiḥ śaraiḥ /
apovāhāstravīryeṇa drumaṃ bhaṅktveva mārutaḥ //

rathinaḥ samahāmātrāngajānaśvānsasādinaḥ /
pattivrātāṃśca saṅkrudvo nighnankarṇo vyadṛśyata //

tadvadhyamānaṃ pāṇḍūnāṃ balaṃ karṇāstratejasā /
viśastrapatradehāsu prāya āsītparāṅmukham //

atha karṇāstramastreṇa pratihatyārjunaḥ smayan /
diśaṃ khaṃ caiva bhūmiṃ ca prāvṛṇoccharavṛṣṭibhiḥ //

musalānīva sampetuḥ parighā iva ceṣavaḥ /
śataghnya iva cāpyanye vajrāṇyugrāṇi cāpare //

tairvadhyamānaṃ tatsainyaṃ sapattyaśvarathadvipam /
nimīlitākṣamatyarthaṃ babhrāma ca nanāda ca //

niṣkaivalyaṃ tadā yudvaṃ prāpuraśvanaradvipāḥ /
hanyamānāḥ śarairārtāstadā bhītāḥ pradudruvuḥ //

tvadīyānāṃ tadā yudve saṃsaktānāṃ jayaiṣiṇām /
girimastaṃ samāsādya pratyapadyata bhānumān //

tamasā ca mahārāja rajasā ca viśeṣataḥ /
na kiñcitpratyapaśyāma śubhaṃ vā yadi vā'śubham //

te trasyanto maheṣvāsā rātriyudvasya bhārata /
apayānaṃ tataścakruḥ sahitāḥ sarvayodhibhiḥ //

kauraveṣvapayāteṣu tadā rājandinakṣaye /
jayaṃ sumanasaḥ prāpya pārthāḥ svaśibiraṃ yayuḥ //

vāditraśabdairvividhaiḥ siṃhanādaiḥ sagarjitaiḥ /
parānuvahantaśca stuvantaścācyutārjunau //

kṛte'vahāre tairvīraiḥ sainikāḥ sarva eva te /
āśīrvācaḥ pāṇḍaveṣu prāyuñjanta nareśvarāḥ //

tataḥ kṛte'vahāre ca prahṛṣṭāstatra pāṇḍavāḥ /
niśāyāṃ śibiraṃ gatvā nyavasanta nareśvarāḥ //

tato rakṣaḥ piśācāśca śvāpadāścaiva saṅghaśaḥ /
jagmurāyodhanaṃ ghoraṃ rudrasyākrīḍasannibham //