Mahabharata · Chapter 8.20

atitīvrāṇi duḥkhāni duḥsahāni bahūni ca /
tvatto'haṃ sañjayāśrauṣaṃ putrāṇāṃ caiva saṅkṣayam //

yathā tvaṃ me kathayase yathā yudvamavartata /
na santi sūta kauravyā iti me niścitā matiḥ //

duryodhanaśca virathaḥ kṛtastatra mahārathaḥ /
dharmaputraḥ kathaṃ cakre tasya vā nṛpatiḥ katham //

aparāhṇe kathaṃ yudvamabhavadromaharṣaṇam /
tanmamācakṣva tattvena kuśalo hyasi sañjaya //
sañjaya uvāca /

saṃsakteṣu tu sainyeṣu vadhyamāneṣu bhāgaśaḥ /
rathamanyaṃ samāsthāya putrastava viśāmpate //

krodhena mahatā yuktaḥ saviṣo bhujago yathā / duryodhanaḥ samālakṣya dharmarājaṃ yudhiṣṭhiram /
provāca sūtaṃ tvarito yāhiyāhīti bhārata //

tatra māṃ prāpaya kṣipraṃ sārathe yatra pāṇḍavaḥ /
dhriyamāṇātaprateṇa rājā rājati daṃśitaḥ //

sa sūtaścodito rājñā rājñaḥ syandanamuttamam /
yudhiṣṭhirasyābhimukhaṃ preṣayāmāsa saṃyuge //

tato yudhiṣṭhiraḥ krudvaḥ prabhinna iva kuñjaraḥ /
sārathiṃ codayāmāsa yāhi yatra suyodhanaḥ //

tau samājagmaturvīrau bhrātarau rathasattamau //

sametya ca mahāvīrau saṃrabdhau yudvadurmadau /
vavarṣaturmaheṣvāsau śarairanyonyamāhave //

tato duryodhano rājā dharmaśīlasya māriṣa /
śilāśitena bhallena dhanuściccheda saṃyuge //

taṃ nāmṛṣyata saṅkruddho hyavamānaṃ yudhiṣṭhiraḥ /
apavidhya dhanuśchinnaṃ krodhasaṃraktalocanaḥ //

anyatkārmukamādāya dharmaputraścamūmukhe /
duryodhanasya ciccheda dhvajaṃ kārmukameva ca //

athānyadvanurādāya putraste bharatarṣabha / yudhiṣṭhirasya cikṣepa śarānkanakabhūṣaṇān /
rukmapuṅkhānprasannāgrānsaviṣāniva pannagān //

tāvanyonyaṃ susaṅkruddhau śastravarṣāṇyamuñcatām /
siṃhāviva susaṃrabdhau parasparajigīṣayā //

jaghnatustau raṇe'nyonyaṃ nardamānau vṛṣāviva /
antaraṃ mārgamāṇau ca ceratustau mahārathau //

tataḥ pūrṇāyatotsṛṣṭaiḥ śaraistau tu kṛtavraṇau /
virejaturmahārāja kiṃśukāviva puṣpitau //

tato rājanvimuñcantau siṃhanādānmuhurmuhuḥ /
talayośca tathā śabdāndhanuṣaśca mahāhave //

śaṅkhaśabdavarāṃścaiva cakratustau nareśvarau /
anyonyaṃ tau mahārāja pīḍayāñcakraturbhṛśam //

tato yudhiṣṭhiro rājā putraṃ tava śaraistribhiḥ /
ājaghānorasi kruddho vajravegairdurāsadaiḥ //

prativivyādha taṃ tūrṇaṃ tava putro mahīpatiḥ /
pañcabhirniśitairbāṇaiḥ svarṇapuṅkhaiḥ śilāśitaiḥ //

tato duryodhano rājā śaktiṃ cikṣepa bhārata /
sarvapāraśavīṃ tīkṣṇāṃ maholkāpratimāṃ tadā //

tāmāpatantīṃ sahasā dharmarājaḥ śitaiḥ śaraiḥ /
tribhiściccheda sahasā taṃ ca vivyādha pañcabhiḥ //

nipapāta tataḥ sā'tha svarṇadaṇḍā mahāsvanā /
nipatantī maholkeva vyarājacchikhisannibhā //

śaktiṃ vinihatāṃ dṛṣṭvā putrastava viśāmpate /
navabhirniśitairbhallairnijaghāna yudhiṣṭhiram //

so'tividvo balavatā śatruṇaā śatrutāpanaḥ /
duryodhanaṃ samuddiśya bāṇaṃ jagrāha satvaraḥ //

samādhatta ca taṃ bāṇaṃ dhanurmadhye mahābalaḥ /
cikṣepa ca mahārāja tataḥ krudvaḥ parākramī //

sa tu bāṇaḥ samāsādya tava putraṃ mahāratham /
vyāmohayata rājānaṃ dharaṇīṃ ca dadāra ha //

tato duryodhanaḥ kruddho gadāmudyamya vegitaḥ /
vidhitsuḥ kalahasyāntaṃ dharmarājamupādravat //

tamudyatagadaṃ dṛṣṭvā daṇḍahastamivāntakam /
dharmarājo mahāśaktiṃ prāhiṇottava sūnave //

dīpyamānāṃ mahāvegāṃ maholkāṃ jvalitāmiva /
yamadaṇḍanibhāṃ ghorāṃ kālarātrimivāparām //

rathasthaḥ sa tayā vidvo varma bhittvā stanāntare /
bhṛśaṃ saṃvignahṛdayaḥ papāta ca mumoha ca //

nabhastamāha ca tataḥ pratijñāmanupālaya /
nāyaṃ vadhyastava nṛpa ityuktaḥ sa nyavartata //

tatastvaritamāgamya kṛtavarmā tavātmajam /
pratyapadyata rājānaṃ nimnaṃ vyasanārṇave //

gadāmādāya bhīmo'pi hemapaṭṭapariṣkṛtām /
abhidudrāva vegena kṛtavarmāṇamāhave //

evaṃ tadabhavadyuddhaṃ tvadīyānāṃ paraiḥ saha /
aparāhṇe mahārāja kāṅkṣatāṃ vijayaṃ yudhi //