Mahabharata · Chapter 8.19

yudhiṣṭhiraṃ mahārāja visṛjantaṃ śarānbahūn /
svayaṃ duryodhano rājā pratyagṛhṇādabhītavat //

tamāpatantaṃ sahasā tava putraṃ mahāratham /
dharmarājo drutaṃ vid्dhvā tiṣṭhatiṣṭheti cābravīt //

sa tu taṃ prativivyādha navabhirniśitaiḥ śaraiḥ /
sārathiṃ cāsya bhallena bhṛśaṃ kruddho'bhyatāḍayat //

tato yudhiṣṭhiro rājansvarṇapuṅkhāñśilīmukhān /
duryodhanāya cikṣepa trayodaśa śilāśitān //

caturbhiścaturo vāhāṃstasya hatvā mahārathaḥ /
pañcamena śiraḥ kāyātsāratheśca samākṣipat //

ṣaṣṭhena tu dhvajaṃ rājñaḥ saptamena tu kārmukam / aṣṭamena tathā khaṅgaṃ pātayāmāsa bhūtale /
pañcabhirnṛpatiṃ cāpi dharmarājo'rdayadbhṛśam //

hatāśvāttu rathāttasmādavaplutya sutastava /
uttamaṃ vyasanaṃ prāpto bhūmāvevāvatiṣṭhata //

taṃ tu kṛcchragataṃ dṛṣṭvā karṇadrauṇikṛpādayaḥ /
abhyavartanta sahasā parīpsanto narādhipam //

atha pāṇḍusutāḥ sarve parivārya yudhiṣṭhiram /
anvayuḥ samare rājaṃstato yuddhamavartata //

tatastūryasahasrāṇi prāvādyanta mahāmṛdhe //

kṣvelāḥ kilakilāśabdāḥ prādurāsanmahīpate /
yatrābhyagacchansamare pāñcālāḥ kauravaiḥ saha //

narā naraiḥ samājagmurvāraṇā varavāraṇaiḥ /
rathāśca rathibhiḥ sārdhaṃ hayāśca hayasādibhiḥ //

dvandvānyāsanmahārāja prekṣaṇīyāni saṃyuge /
vividhānyapyacintyāni śastravantyuttamāni ca //

te śūrāḥ samare sarve citraṃ laghu ca suṣṭhu ca /
ayudhyanta mahāvegāḥ parasparavadhaiṣiṇaḥ //

anyonyaṃ samare jaghnuryodhavratamanuṣṭhitāḥ /
na hi te samaraṃ cakruḥ pṛṣṭhato vai kathañcana //

muhūrtameva tadyudvamāsīnmadhuradarśanam /
tata unmattavadrājannirmaryādamavartata //

rathī nāgaṃ samāsādya dārayanniśitaiḥ śaraiḥ /
preṣayāmāsa kālāya śaraiḥ sannataparvabhiḥ //

nāgā hayānsamāsādya vikṣipanto bahūnraṇe /
dārayāmāsuratyugraṃ tatratatra tadātadā //

hayārohāśca bahavaḥ parivārya hayottamān /
talaśabdaravāṃścakruḥ sampatantastatastataḥ //

dhāvamānāṃstatastāṃstu dravamāṇānmahāgajān /
pārśvataḥ pṛṣṭhataścaiva nijaghnurhayasādinaḥ //

vidrāvya ca bahūnaśvānnāgā rājanmadotkaṭāḥ /
viṣāṇaiścāpare jaghnurmamṛduścāpare bhṛśam //

sāśvārohāṃśca turagānviṣāmairvivyadhū ruṣā /
apare cikṣipurvegātpragṛhyātibalāstadā //

pādātairāhatā nāgā vivareṣu samantataḥ /
cakrurārtasvaraṃ ghoraṃ dudruvuśca diśo daśa //

padātīnāṃ tu sahasā pradrutānāṃ mahāhave /
utsṛjyābharaṇaṃ tūrṇamavavavrū raṇājire //

nimittaṃ manyamānāstu pariṇāmya mahāgajāḥ /
jagṛhurbibhiduścaiva citrāṇyābharaṇāni ca //

tāṃstu tatra prasaktānvai parinvārya padātayaḥ /
hastyārohānnijaghnuste mahāvegā balotkaṭāḥ //

apare hastibhirhastaiḥ khaṃ vikṣiptā mahāhave /
nipatanto viṣāṇāgrairbhṛśaṃ vidvāḥ suśikṣitaiḥ //

apare sahasā gṛhya viṣāṇaireva sūditāḥ /
senāntaraṃ samāsādya kecittatra mahāgajaiḥ //

kṣuṇṇagātrā mahārāja vikṣipya ca punaḥpunaḥ /
apare vyajanānīva vibhrāmya nihatā mṛdhe //

puraḥsarāśca nāgānāmapareṣāṃ viśāmpate /
śarīrāṇyatividvāni tatratatra raṇājire //

pratimāneṣu kumbheṣu dantaveṣṭeṣu cāpare /
nigṛhītā bhṛśaṃ nāgāḥ prāsatomaraśaktibhiḥ //

nigṛhya ca gajāḥ kecit pārśvasthairbhṛśadāruṇaiḥ /
rathāśvasādibhistatra sambhinnā nyapatanbhuvi //

sahayāḥ sādinastatra tomareṇa mahāmṛdhe /
bhūmāvamṛdranvegena sacarmāṇaṃ padātinam //

cachā sāvaraṇānkāṃścittatratatra viśāmpate / rathānnāgāḥ samāsādya parigṛhya ca māriṣa /
vyākṣipansahasā tatra ghorarūpe bhayānake //

nārācairnihatāścāpi gajāḥ peturmahābalāḥ /
parvatasyeva śikharaṃ vajrarugṇaṃ mahītale //

yodhā yodhānsamāsādya muṣṭibhirvyahananyudhi /
keśeṣvanyonyamākṣipya cikṣipurbibhiduśca ha //

udyamya ca bhujānanye nikṣipya ca mahītale /
padā coraḥ samākramya sphurato'pāharacchiraḥ //

patataścāparo rājanvijahārāsinā śiraḥ /
mṛtamanyo mahārāja padā tāḍitavāṃstadā //

jīvataśca tathaivānyaḥ śastraṃ kāye nyamajjayat / muṣṭiyuddhaṃ mahaccāsīdyodhānāṃ tatra bhārata /
tathā keśagrahaścogro bāhuyuddhaṃ ca bhairavam //

samāsaktasya cānyena avijñātastathā'paraḥ /
jahāra samare prāṇānnānāśastairanekadhā //

saṃsakteṣu ca yodheṣu vartamāne ca saṅkule /
kabandhānyutthitāni syuḥ śataśo'tha sahasraśaḥ //

śoṇitaiḥ sicyamānāni śastrāṇi kavacāni ca /
mahārāgānuraktāni vastrāṇīva cakāśire //

evametanmahadyudvaṃ dāruṇaṃ śastrasaṅkulam /
unmattagaṅgāpratimaṃ śabdenāpūrayajjagat //

naiva sve na pare rājanvijñāyante śarāturāḥ /
yodvavyamiti yudhyante rājāno jayagṛdvinaḥ //

svānsve jaghnurmaharāja parāṃścaiva samāgatān /
ubhayoḥ senayorvīrairvyākulaṃ samapadyata //

rathairbhagnairmahārāja vāraṇaiśca nipātitaiḥ /
hayaiśca patitaistatra naraiśca vinipātitaiḥ //

agamyarūpā pṛthivī kṣaṇena samapadyata /
kṣaṇenāsīnmahīpāla kṣatajaughapravartinī //

pāñcālānahatatkarṇastrigartāṃśca dhanañjayaḥ /
bhīmasenaḥ kurūnrājanhastyanīkaṃ ca sarvaśaḥ //

evameṣa kṣayo vṛttaḥ kurupāṇḍavasenayoḥ /
aparāhṇe gate sūrye kāṅkṣatāṃ vipulaṃ yaśaḥ //