Mahabharata · Chapter 8.16

yuyutsaṃ tava putrasya drāvayantaṃ balaṃ mahat /
ulūko nyapatattūrṇaṃ tiṣṭhatiṣṭheti cābravīt //

yuyutsuśca tato rājañśitadhāreṇa patriṇā /
ulūkaṃ tāḍayāmāsa vajreṇeva mahābalam //

ulūkastu tataḥ kruddhastava putrasya saṃyuge /
kṣurapreṇa dhanuśchittvā tāḍayāmāsa karṇinā //

tadapāsya dhanuśchinnaṃ yuyutsarvegavattaram /
anyadādatta sumahaccāpaṃ saṃraktalocanaḥ //

śākuniṃ tu tataḥ ṣaṣṭyā vivyādha bharatarṣabha /
sārathiṃ tribhirānarcchattaṃ ca bhūyo vyavidhyata //

ulūkastaṃ tu viṃśatyā vidvvā svarṇavibhūṣitaiḥ /
athāsya samare kruddho dhvajaṃ ciccheda kāñcanam //

sa cchinnayaṣṭiḥ sumahāñśīryamāṇo mahādhvajaḥ /
papāta pramukhe rājanyuyutsoḥ kāñcanadhvajaḥ //

dhvajamunmathitaṃ dṛṣṭvā yuyutsuḥ krodhamūrcchitaḥ /
ulūkaṃ pañcabhirbāṇairājaghāna stanāntare //

ulūkastasya samare tailadhautena māriṣa /
śiraściccheda bhallena yanturbharatasattama //

tacchinnamapatadbhūmau yuyutsoḥ sārathestadā /
tārārūpaṃ yathā citraṃ nipapāta mahītale //

jaghāna caturo'śvāṃśca taṃ ca vivyādha pañcabhiḥ /
so'tividvo balavatā pratyapāyādrathāntaram //

taṃ nirjitya raṇe rājannulūkastvarito yayau /
pāñcālānsṛñjayāṃścaiva vinighnanniśitaiḥ śaraiḥ //

śatānīkaṃ mahārāja śrutakarmā sutastava /
vyaśvasūtarathaṃ cakre nimeṣārdhādasambhramaḥ //

hatāśve tu rathe tiṣṭhañśatānīko mahārathaḥ /
gadāṃ cikṣepa saṅkruddhastava putrasya māriṣa //

sā kṛtvā syandanaṃ bhasma hayāṃścaiva sasārathīn /
papāta dharaṇīṃ tūrṇaṃ dārayantīva bhārata //

tāvubhau virathau vīrau kurūṇāṃ kīrtivardhanau /
vyapākrametāṃ yudvāttu prekṣamāṇau parasparam //

putrastu tava sambhrānto viviṃśo rathamāruhat /
śatānīko'pi tvaritaḥ prativindhyarathaṃ gataḥ //

sutamomaṃ tu śakunirvidvvā tu niśitaiḥ śaraiḥ /
nākampayata saṅkrudvo vāryogha iva parvatam //

sutasomastu taṃ dṛṣṭvā pituratyantavairiṇam /
śarairanekasāhasraiśchādayāmāsa bhārata //

tāñśarāñśakunistūrṇaṃ cicchedānyaiḥ patatribhiḥ /
laghvastraścitrayodhī ca jitakāśī ca saṃyuge //

nivārya samare cāpi śarāṃstānniśitaiḥ śaraiḥ /
ājaghāna susaṅkruddhaḥ sutasomaṃ tribhiḥ śaraiḥ //

nākampayata saṅkruddho vāryogha iva parvatam / tasyāśvānketanaṃ sūtaṃ tilaśo vyadhamaccharaiḥ /
śyālastava mahārāja tata uccukruśurjanāḥ //

hatāśvo virathaścaiva chinnaketuśca māriṣa /
dhanvī dhanurvaraṃ gṛhya rathādbhūmāvatiṣṭhata //

vyasṛjatsāyakāṃścaiva svarṇapuṅkhāñśilāśitān / chādayāmāsuratha te tava śyālasya taṃ ratham /
śaḷabhānāmiva vrātāḥ śaravrātā mahāratham //

sañchādyamāno'pi dṛḍhaṃ vivyathe naiva saubalaḥ /
pramamātha śarāṃstasya śaravrātairmahāyaśāḥ //

tatrātuṣyanta yodhāśca sidvāścāpi divi sthitāḥ / sutasomasya tatkarma dṛṣṭvā'śradveyamadbhutam /
rathasthaṃ śakuniṃ yattu padātiḥ samayodhayat //

tasya tīkṣṇairmahāvegairbhallaiḥ sannataparvabhiḥ /
vyahanatkārāmukaṃ rājaṃstūṇīrāṃścaiva sarvaśaḥ //

sa cchinnadhanvā virathaḥ khaṅgamudyamya cānadat /
vaidūryotpalavarṇābhaṃ dantidantamayatsarum //

bhrāmyamāṇaṃ tatastaṃ tu vimalāmbaravarcasam /
kāladaṇḍopamaṃ mene sutasomasya dhīmataḥ //

so'caratsahasā khaṅgī maṇḍalāni sahasraśaḥ /
caturdaśa mahārāja śikṣābalasamanvitaḥ //

bhrāntamuddhāntamāviddhamāplutaṃ viplutaṃ sṛtam /
sampātasamudīrṇe ca darśayāmāsa saṃyuge //

saubalastu tatastasya śarāṃścikṣepa vīryavān /
tānāpatata evāśu ciccheda paramāsinā //

tataḥ kruddho mahārāja saubalaḥ paravīrahā /
prāhiṇotsutasomāya śarānāśīviṣopamān //

ciccheda tāṃstu khaṅgena śikṣayā ca balena ca /
darśayam̐llāghavaṃ yuddhe tārkṣyatulyaparākramaḥ //

tasya sañcarato rājanmaṇḍalāvartane tadā /
kṣurapreṇa sutīkṣṇena khaṅgaṃ ciccheda suprabham //

sa cchinnaḥ sahasā bhūmau nipapāta mahānasiḥ /
adharmasya sthitaṃ haste sutsarostatra bhārata //

chinnamājñāya nistriṃśamavaplutya padāni ṣaṭ /
prāvidhyata tataḥ śeṣaṃ sutasomo mahārathaḥ //

tacchittvā saguṇaṃ cāpaṃ raṇe tasya mahātmanaḥ /
papāta dharaṇīṃ tūrṇaṃ svarṇavajravibhūṣitam //

sutasomastato'gacchacchrutakīrtermahāratham /
saubalo'pi dhanurgṛhya ghoramanyatsudurjayam //

abhyayātpāṇḍavānīkaṃ nighnañśatrugaṇānbahūn /
tatra nādo mahānāsītpāṇḍavānāṃ viśāmpate //

saubalaṃ samare dṛṣṭvā vicarantamabhītavat / tānyanīkāni dṛptāni śastravanti mahānti ca /
drāvyamāṇānyadṛśyanta saubalena mahātmanā //

yathā daityacamūṃ rājandevarājo mamarda ha /
tathaiva pāṇ़vīṃ senāṃ saubaleyo vyanāśayat //