Mahabharata · Chapter 8.17

dhṛṣṭadyumnaṃ kṛpo rājanvārayāmāsa saṃyuge /
yathā dṛṣṭvā vane siṃhaṃ śarabho vārayedyudhi //

nirudvaḥ pārṣatastena gautamena balīyasā /
padātpadaṃ vicalituṃ nāśakattatra bhārata //

gautamasya rathaṃ dṛṣṭvā dhṛṣṭadyumnarathaṃ prati /
vitresuḥ sarvabhūtāni kṣayaṃ prāptaṃ ca menire //

tadā jalpanti pāṇḍūnāṃ rathinaḥ sādinastathā /
droṇasya nidhanānnūnaṃ saṅkrudvo dvipadāṃ varaḥ //

śāradvato mahātejā divyāstravidudāradhīḥ /
api svasti bhavedadya dhṛṣṭadyumnasya gautamāt //

apīyaṃ vāhinī kṛtsnā mucyeta mahato bhayāt /
apyayaṃ brāhmaṇaḥ sarvānna no hanyātsamāgatān //

yādṛśaṃ dṛśyate rūpamantakapratimaṃ raṇe /
gamiṣyatyadya padavīṃ bhāradvājasya gautamaḥ //

ācāryaḥ kṣiprahastaśca vijayī ca sadā yudhi /
astravānvīryasampannaḥ krodhena ca samanvitaḥ //

pārṣataśca mahāyudve vimukho'dyābhilakṣyate / ityevaṃ vividhā vācastāvakānāṃ paraiḥ saha /
vyaśrūyanta mahārāja tayostatra samāgame //

viniḥśvasya tataḥ krodhātkṛpaḥ śāradvato nṛpa /
pārṣataṃ cārdayāmāsa niśceṣṭaṃ sarvamarmasu //

sa hanyamānaḥ samare gautamena mahātmanā /
kartavyaṃ na sma jānāti mohena mahatā vṛtaḥ //

tamabravīttato yantā kañcitkṣemaṃ tu pārṣata /
īdṛśaṃ vyasanaṃ yuddhe na te dṛṣṭaṃ mayā kvacit //

daivayogāttu te bāṇā nāpatanmarmabhedinaḥ /
preṣitā dvijamukhyena marmāṇyuddiśya sarvataḥ //

vyāvartaye rathaṃ tūrṇaṃ nadīvegamivārṇavāt /
avadhyaṃ brāhmaṇaṃ manye yena te vikramo hataḥ //

dhṛṣṭadyumnastato rājañśanakairabravīdvacaḥ /
muhyate me manastāta gātrasvedaśca jāyate //

vepathuśca śarīre me romaharṣaśca sārathe /
varjayanbrāhmaṇaṃ yuddhe śanairyāhi yato'rjunaḥ //

arjunaṃ bhīmasenaṃ vā samare prāpya sārathe /
kṣemamadya bhavenmahyamiti me naiṣṭhikī matiḥ //

tataḥ prāyānmahārāja sārathistvarayanhayān /
yato bhīmo maheṣvāso yuyudhe tava sainikaiḥ //

pradrutaṃ ca rathaṃ dṛṣṭvā dhṛṣṭadyumnasya māriṣa /
kirañśaraśatānyeva gautamo'nuyayau tadā //

śaṅkhaṃ ca pūrayāmāsa muhurmuhurarindamaḥ /
pārṣataṃ trāsayāmāsa mahendro namuciṃ yathā //

śikhaṇḍinaṃ tu samare bhīṣmamṛtyuṃ durāsadam /
hārdikyo vārayāmāsa smayanniva muhurmuhuḥ //

śikhaṇḍī tu samāsādya hṛdikānāṃ mahāratham /
pañcabhirniśitairbhallairjatrudeśe samāhanat //

kṛtavarmā tu saṅkraddho bhittvā ṣaṣṭyā patatribhiḥ /
dhanurekena ciccheda hasanrājanmahārathaḥ //

athānyadvanurādāya drupadasyātmajo balī /
tiṣṭhatiṣṭheti saṅkruddho hārdikyaṃ pratyabhāṣata //

tato'sya navatiṃ bāṇānrukmapuṅkhānsutejanān /
preṣayāmāsa rājendra te'syābhraśyanta varmaṇaḥ //

vitathāṃstānsamālakṣya patitāṃśca mahītale /
kṣurapreṇa sutīkṣṇena kārmukaṃ cicchide bhṛśam //

athainaṃ chinnadhanvānaṃ bhagnaśṛṅgamivarṣabham /
aśītyā mārgaṇaiḥ kruddho bāhvorurasi cārpayat //

kṛtavarmā tu saṅkruddho mārgaṇaiḥ kṣatavikṣataḥ /
vavāma rudhiraṃ gātraiḥ kumbhavakrādivodakam //

rudhireṇa pariklinnaḥ kṛtavarmā tvarājata /
varṣeṇa kledito rājanyathā gairikaparvataḥ //

athānyadvanurādāya samārgaṇaguṇaṃ prabhuḥ /
śikhaṇḍinaṃ bāṇagaṇaiḥ skandhadeśe vyatāḍayat //

skandhadeśasthitairbāṇaiḥ śikhaṇḍī tu vyarājata /
śākhāpraśākhāvipulaḥ sumahānpādapo yathā //

tāvanyonyaṃ bhṛśaṃ vidvvā rudhireṇa samukṣitau / popluyamānau hi yathā mahāntau śoṇitahade /
tadvadvirejaturvīrau śoṇitena pariplutau //

yathā ca kiṃśukau phullau puṣpamāse samāgate / rudhirokṣitasarvāṅgau raktacandanarūṣitau /
bhujagāviva saṅkruddhau rejatustau narottamau //

tāvubhau śaravanunnāṅgau parasparaśarakṣatau /
anyonyaśṛṅgābhihatau rejaturvṛṣabhāviva //

anyonyasya vadhe yatnaṃ kurvāṇau tau mahārathau /
rathābhyāṃ ceratustatra maṇḍalāni sahasraśaḥ //

kṛtavarmā mahārāja pārṣataṃ niśitaiḥ śaraiḥ /
raṇe vivyādha saptatyā svarṇapuṅgaiḥ śilāśitaiḥ //

tato'sya samare bāṇaṃ bhojaḥ praharatāṃ varaḥ /
jīvitāntakaraṃ ghoraṃ vyasṛjattvarayā'nvitaḥ //

sa tenābhihato rājanmūrcchāmāśu samāviśat /
dhvajayaṣṭiṃ ca sahasā śiśriye kaśmalāvṛtaḥ //

apovāha raṇāttūrṇaṃ sārathī rathināṃ varam /
hārdikyaśarasantaptaṃ niḥśvasantaṃ punaḥpunaḥ //

parājite tataḥ śūre drupadasyātmaje prabho /
vyadravatpāṇḍavī senā vyadhamānā samantataḥ //