Mahabharata · Chapter 7.98

bāṇe tasminnikṛtte tu dhṛṣṭadyumne ca mokṣite /
tena vṛṣṇipravīreṇa yuyudhānena sañjaya //

amarṣito maheṣvāsaḥ sarvaśastrabhṛtāṃ varaḥ /
naravyāghraṃ śineḥ pautraṃ droṇaḥ kimakarodyudhi //
sañjaya uvāca /

samprasrutakrodhaviṣo vyāditāsyaśarāsanaḥ /
tīkṣṇadhāreṣudaśanaḥ sitanārācadaṃṣṭravān //

saṃrambhāmarṣatāmrākṣo mahoraga iva śvasan /
naravīraḥ pramuditaḥ śoṇairaśvairmahājavaiḥ //

utpatadbhirivākāśe krāmadbhiriva parvatam /
rukmapuṅkhāñśarānasyanyuyudhānamupādravat //

śarapātamahāvarṣaṃ rathaghoṣabalāhakam /
kārmukairāvṛtaṃ rājannārācabahuvidyutam //

śaktikhaṅgāśanidharaṃ krodhavegasamutthitam /
droṇameghamanāvāryaṃ hayamārutacoditam //

dṛṣṭvaivābhipatantaṃ taṃ śūraḥ parapurañjayaḥ /
uvāca sūtaṃ śaineyaḥ prahasanyuddhadurmadaḥ //

enaṃ vai brāhmaṇaṃ śūraṃ svakarmaṇyanavasthitam /
āśrayaṃ dhārtarāṣṭrasya dharmarājabhayāvaham //

śīghraṃ prajavitairaśvaiḥ pratyudyāhi prahṛṣṭavat /
ācāryaṃ rājaputrāṇāṃ satataṃ śūramāninam //
sañjaya uvāca /

evamuktastataḥ sūtaḥ sātyakasyāvahadratham / tato rajatasaṅkāśā mādhavasya hayottamāḥ /
droṇasyābhimukhāḥ śīghramagacchanvātaraṃhasaḥ //

tatastau droṇaśaineyau yuyudhāte parantapau /
śarairanekasāhasraistāḍayantau parasparam //

iṣujālāvṛtaṃ vyoma cakratuḥ puruṣarṣabhau / pūrayāmāsaturvīrāvubhau daśa diśaḥ śaraiḥ /
meghāvivātapāpāye dhārābhiritaretaram //

na sma sūryastadā bhāti na vavau ca samīraṇaḥ /
haṣujālāvṛtaṃ ghoramandhakāraṃ samantataḥ //

anādhṛṣyamivānyeṣāṃ śūrāṇāmabhavattadā /
andhakārīkṛte loke droṇaśaineyayoḥ śaraiḥ //

tayoḥ śīghrāstraviduṣordroṇasātvatayostadā /
nāntaraṃ śaravṛṣṭīnāṃ dadṛśe narasiṃhayoḥ //

iṣūṇāṃ sannipātena śabdo dhārābhighātajaḥ /
śuśruve śakramuktānāmaśanīnāmiva svanaḥ //

nārācairvyatividdhānāṃ śarāṇāṃ rūpamābabhau /
āśīviṣavidaṣṭānāṃ sarpāṇāmiva bhārata //

tayorjyātalanirghoṣaḥ śuśruve yuddhaśauṇḍayoḥ /
ajasraṃ śailaśṛṅgāṇāṃ vajreṇāhanyatāmiva //

ubhayostau rathau rājaṃste cāśvāstau ca sārathī /
rukmapuṅkhaiḥ śaraichannāścitrarūpā babhustadā //

nirmalānāmajihmānāṃ nārācānāṃ viśāmpate /
nirmuktāśīvipābhānāṃ sampāto'bhūtsudāruṇaḥ //

ubhayoḥ patite chatre tathaiva patitau dhvajau /
nikṛntatoḥ śaraistīkṣṇairdroṇasātyakayo raṇe //

ubhau rudhirasiktāṅgāvubhau ca vijayaiṣiṇau / sravadbhiḥ śoṇitaṃ gātraiḥ prasrutāviva vāraṇau /
anyonyamabhyavidhyetāṃ jīvitāntakaraiḥ śaraiḥ //

garjitotkṛṣṭasannādāḥ śaṅkhadundubhiniḥsvanāḥ /
upāramanmahārāja vyājahāra na kaścana //

tuṣṇīmbhūtānyanaukāni yodhā yuddhādupāraman /
dadarśa dvairathaṃ tābhyāṃ jātakautūhalo janaḥ //

rathino hastiyantāro hayārohāḥ padātayaḥ /
avaikṣantācalairnetraiḥ parivārya nararṣabhau //

hastyanīkānyatiṣṭhanta tathānīkāni vājinām /
tathaiva rathavāhinyaḥ prativyūhya vyavasthitāḥ //

muktāvidrumacitraiśca maṇikāñcanabhūṣitaiḥ /
dhvajairābharaṇaiścitraiḥ kavacaiśca hiraṇmayaiḥ //

vaijayantīpatākābhiḥ paristomāṅgakambalaiḥ /
vimalairniśitaiḥ śastrairhayānāṃ ca prakīrṇakaiḥ //

jātarūpamayībhiśca rājatībhiśca mūrdhasu /
gajānāṃ kumbhamālābhirdantaveṣṭaiśca bhārata //

sabalākāḥ sakhadyotāḥ sairāvataśatahadāḥ /
adṛśyantoṣṇaparyāye meghānāmiva vāgurāḥ //

apaśyannasmadīyāśca te ca yaudhiṣṭhirāḥ sthitāḥ /
tadyuddhaṃ yuyudhānasya droṇasya ca mahātmanaḥ //

vimānāgragatā devā brahmasomapurogamāḥ /
siddhacāraṇasaṅkhāśca vidyādharamahoragāḥ //

gandharvā dānavā yakṣā rākṣasāpsarasaḥ khagāḥ / gatapratyāgatākṣepaiścitairastravighātibhiḥ /
vividhairvismayaṃ jagmustayoḥ puruṣasiṃhayoḥ //

hastalāghavamastreṣu darśayantau mahābalau /
anyonyamabhividhyetāṃ śaraistau droṇasātyakī //

tato droṇasya dāśārhaḥ śarāṃściccheda saṃyuge /
patribhiḥ sudṛḍhairāśu dhanuścaiva mahādyuteḥ //

nimeṣāntaramātreṇa bhāradvājo'paraṃ dhanuḥ /
sajyaṃ cakāra tadapi cicchedāsya sa sātyakiḥ //

tatastvaranpunardroṇo dhanurhasto vyatiṣṭhata /
sajyaṃ sajyaṃ dhanuścāsya ciccheda niśithaiḥ śaraiḥ //

evamekaśataṃ chinnaṃ dhanuṣāṃ dṛḍhadhanvinā /
na cāntaraṃ tayordṛṣṭaṃ sandhāne cchedane'pi ca //

tato'sya saṃyuge droṇo dṛṣṭvā karmātimānuṣam /
yuyudhānasya rājendra manasaitadacintayat //

etadastrabalaṃ rāme kārtavīrye dhanañjaye /
bhīṣme ca puruṣavyāghre yadidaṃ sātvatāṃ vare //

taṃ cāsya manasā droṇaḥ pūjayāmāsa vikramam /
lāghavaṃ vāsavasyeva samprekṣya dvijasattamaḥ //

tutoṣāstravidāṃ śreṣṭhastathā devāḥ savāsavāḥ /
na tāmālakṣayāmāsurlaghutāṃ śīghracāriṇaḥ //

devāśca yuyudhānasya gandharvāśca viśāmpate /
siddhacāraṇasaṅghāśca vidurdroṇasya karma tat //

tato'nyaddhanurādāya droṇaḥ kṣatriyamardanaḥ /
astrairastravidāṃ śreṣṭho yodhayāmāsa bhārata //

tasyāstrāṇyastramāyābhiḥ pratihatya sa sātyakiḥ /
jaghāna niśitairbāṇaistadadbhutamivābhavat //

tasyātimānuṣaṃ karma dṛṣṭvā'nyairasamaṃ raṇe /
yuktaṃ yogena yogajñāstāvakāḥ samapūjayan //

yadastramasyati droṇastadevāsyati sātyakiḥ /
tamācāryo'tha sambhrānto'yodhayacchatrutāpanaḥ //

tataḥ kruddho mahārāja dhanurvedasya pāragaḥ /
vadhāya yuyudhānasya divyamastramudairayat //

tadāgneyaṃ mahāghoraṃ ripughnamupalakṣya saḥ /
divyamastraṃ maheṣvāso vāruṇaṃ samudairayat //

hāhākāro mahānāsīddṛṣṭvā divyāstradhāriṇau /
na vicerustadā'kāśe bhūtānyākāśagānyapi //

astre te vāruṇāgneye yadā bāṇaiḥ samāhite /
na yāvadabhyapadyetāṃ vyāvartadatha bhāskaraḥ //

tato yudhiṣṭhiro rājā bhīmasenaśca pāṇḍavaḥ /
nakulaḥ sahadevaśca paryarakṣanta sātyakim //

dhṛṣṭadyumnamukhaiḥ sārdhaṃ virāṭaśca sakekayaḥ /
matsyāḥ sālveyasenāśca droṇamājagmurañjasā //

duḥśāsanaṃ puraskṛtya rājaputrāḥ sahasraśaḥ /
droṇamabhyupapadyanta sapatnaiḥ parivāritam //

rajasā saṃvṛte loke śarajālasamāvṛte // sarvamāvignamabhavanna prājñāyata kiñcana /

sainyena rajasā dhvaste nirmaryādamavartata // tenāntareṇa pārthastu raṇe jitvā mahāripūn /

atikrāntastadā yuddhaṃ kṛtvā paryavatasthivān //