Mahabharata · Chapter 7.97

tathā tasminpravṛtte tu saṅgrame romaharṣaṇe /
kauraveyāṃstridhābhūtānpāṇḍavāḥ samupādravan //

jalasandhaṃ mahābāhuṃ bhīmaseno'bhyavartata /
yudhiṣṭhiraḥ sahānīkaḥ kṛtavarmāṇamāhave //

kiraṃstu śaravarṣāṇi rocamāna ivāṃśumān /
dhṛṣṭadyumno mahārāja droṇamabhyadravadraṇe //

tataḥ pravavṛte yuddhaṃ tvaratāṃ sarvadhanvinām /
kurūṇāṃ pāṇḍavānāṃ ca saṅkruddhānāṃ parasparam //

saṅkṣaye tu tathābhūte vartamāne mahābhaye /
dvandavībhūteṣu sainyeṣu yudhyamāneṣvabhītavat //

droṇaḥ pāñcālaputreṇa balī balavatā saha /
yadakṣipatpṛṣatkaughāṃstadadbhutamivābhavat //

puṇḍarīkavanānīva vidhvastāni samantataḥ /
cakrāte droṇapāñcālyau nṛṇāṃ śīrṣāṇyanekaśaḥ //

vinikīrṇāni vīrāṇāmanīkeṣu samantataḥ /
vastrābharaṇaśastrāṇi dhvajavarmāyudhāni ca //

tapanīyatanutrāṇāḥ saṃsiktā rudhireṇa ca / kovidārā ivābhānti puṣpitāstatra bhārata /
tāvakāḥ samare yodhāḥ pāṇḍaveyāśca vikṣatāḥ //

kuñjarāśvanarānye pātayanti sma patribhiḥ /
tālamātrāṇi cāpāni vikarṣanto mahārathāḥ //

asicarmāṇi cāpāni śirāṃśi kavacāni ca /
viprakīryanta śūrāṇāṃ samprahāre mahātmanām //

utthitānyagaṇeyāni kabandhāni samantataḥ /
adṛśyanta mahārāja tasminparamasaṅkule //

gṛdhrāḥ kaṅkā bakāḥ śyenā vāyasā jambukāstathā /
bahuśaḥ piśitāśāśca tatrādṛśyanta māriṣa //

bhakṣayantaśca māṃsāni pibantaścāpi śoṇitam /
vilumpamānāḥ keśāṃśca majjāśca bahudhā nṛpa //

ākarṣantaḥ śarīrāṇi śarīrāvayavāṃstathā /
narāśvagajasaṅghānāṃ śirāṃśi ca tatastataḥ //

kṛtāstrā raṇaśikṣābhirdīkṣitā raṇaśālinaḥ /
raṇe jayaṃ prārthayānā bhṛśaṃ yuyudhire tadā //

asimārgānbahuvidhānviceruḥ sainikā raṇe /
ṛṣṭibhiḥ śaktibhiḥ prāsaiḥ śūlatomarapaṭṭasaiḥ //

gadābhiḥ parighaiścānyairāyudhaiśca bhujairapi /
anyonyaṃ jaghnire kruddhā yuddharaṅgatā narāḥ //

rathino rathibhiḥ sārdhamaśvārohāśca sādibhiḥ /
mātaṅgā varamātaṅgaiḥ padātāśca padātibhiḥ //

kṣībā ivānye conmattā raṅgeṣviva ca vāraṇāḥ /
uccukruśurathānyonyaṃ jaghnuranyonyameva ca //

vartamāne tathā yuddhe nirmaryāde viśāmpate /
dhṛṣṭadyumno hayānaścairdroṇasya vyatyamiśrayat //

te hayāḥ sādhvaśobhanta miśritā vātaraṃhasaḥ /
pārāvatasavarṇāśca raktaśoṇāśca saṃyuge //

pārāvatasavarṇāste raktaśoṇavimiśritāḥ /
hayāḥ śuśubhire rājanmeghā iva savidyutaḥ //

dhṛṣṭadyumnastu samprekṣya droṇamabhyāśamāgatam /
asicarmādade vīro dhanurutsṛjya bhārata //

cikīrṣurduṣkaraṃ karma pārṣataḥ paravīrahā /
īṣāyāḥ samatikramya droṇasya rathamāviśat //

atiṣṭhadyugamadhye sa yugasannahaneṣu ca /
jaghanārdheṣu cāśvānāṃ tatsainyānyabhyapūjayan //

khaṅgena caratastasya śoṇāśvānadhitiṣṭhataḥ /
na dadārśāntaraṃ droṇastadadbhutamivābhavat //

yathā śyenasya patanaṃ vaneṣvāmiṣagṛddhinaḥ /
tathaivāsīdabhīsārastasya droṇaṃ jighāṃsataḥ //

tataḥ śaraśatenāsya śatacandraṃ samākṣipat /
droṇo drupada putrasya khaṅgaṃ ca daśabhiḥ śaraiḥ //

hayāṃścaiva catuḥṣaṣṭyā śarāṇāṃ jaghnivānbalī /
dhvajaṃ chatraṃ ca bhallābhyāṃ tathā tau pārṣṇisārathī //

athāsmai tvarito bāṇamaparaṃ jīvitāntakam /
dhṛṣṭadyumnāya cikṣepa vajraṃ vajradharo yathā //

taṃ caturdaśabhistīkṣṇairbāṇaiściccheda sātyakiḥ /
grastamācāryamukhyena dhṛṣṭadyumnaṃ vyamocayat //

siṃheneva mṛgaṃ grastaṃ narasiṃhena māriṣa /
droṇādvai mocayāmāsa pāñcālyaṃ śinipuṅgavaḥ //

sātyakiṃ prekṣya goptāraṃ pāñcālyaṃ ca mahāhave /
śarāṇāṃ tvarito droṇaḥ ṣaḍviṃśatyā samārpayat //

tato droṇaṃ śineḥ pautro grasantamapi sṛñjayān /
pratyavidhyacchitairbāṇaiḥ ṣaḍviṃśatyā stanāntare //

tataḥ sarve rathāstūrṇaṃ pāñcālyā jayagṛddhinaḥ /
sātvatābhisṛte droṇe dhṛṣṭadyumnamavākṣipan //