Mahabharata · Chapter 7.99

vartamāne tadā yuddhe droṇasya saha pāṇḍubhiḥ / parivartamāna āditye tatra sūrye ca raśmibhiḥ /
rajasā kīryamāṇāśca mandībhūtāśca kauravāḥ //

tiṣṭhatāṃ yudhyamānānāṃ punarāvartatāmapi /
bhajyatāṃ jayatāṃ caiva jagāma tadahaḥ śanaiḥ //

tathā teṣu viṣakteṣu sainyeṣu jayagṛddhiṣu /
arjuno vāsudevaśca saindhavāyaiva jagmatuḥ //

rathamārgapramāṇaṃ tu kaunteyo niśitaiḥ śaraiḥ /
cakāra yaṃ ca panthānaṃ yayau tena janārdanaḥ //

yatrayatra ratho yāti pāṇḍavasya mahātmanaḥ /
tatratatraiva dīryante senāstava viśāmpate //

rathaśikṣāṃ tu dāśārho darśayāmāsa vīryavān /
uttamādhamamadhyāni maṇḍalāni vidarśayan //

te tu nāmāṅkitā bāṇāḥ kālajvalanasannibhāḥ /
snāyunaddhāḥ suparvāṇaḥ pṛthavo dīrghagāminaḥ //

vaiṇavāścāyasāścogrā grasanto vividhānarīn /
rudhiraṃ patagaiḥ sārdhaṃ prāṇināṃ papurāhave //

rathasthito'grataḥ krośaṃ yānasyatyarjunaḥ śarān /
rathe krośamatikrānte tasya te ghnanti śātravān //

tārkṣyamārutaraṃhobhirvājibhiḥ sādhuvāhibhiḥ /
yathā'gacchaddhṛṣīkeśaḥ kṛtsnaṃ vismāpayañjagat //

na tathā gacchati rathastapanasya viśāmpate /
nendrasya na tu rudrasya nāpi vaiśravaṇasya ca //

nānyasya samare rājangatapūrvastathā rathaḥ /
yathā yayāvarjunasya manobhiprāyaśīghragaḥ //

praviśya tu raṇe rājankeśavaḥ paravīrahā /
senāmadhye hayāṃstūrṇaṃ codayāmāsa bhārata //

tatastasya rathaughasya madhyaṃ prāpya hayottamāḥ /
kṛcchreṇarathamūhustaṃ kṣutpipāsāsamanvitāḥ //

kṣatāśca bahubhiḥ śastrairyuddhaśauṇḍairanekaśaḥ /
maṇḍalāni vicitrāṇi viceruste muhurmuhuḥ //

hatānāṃ vājināgānāṃ rathānāṃ ca naraiḥ saha /
upariṣṭādatikrāntāḥ śailābhānāṃ sahasraśaḥ //

śrameṇa mahatā yuktāste hayā vātaraṃhasaḥ /
mandavegagatā rājansaṃvṛttāstatra saṃyuge //

etasminnantare vīrāvāvantyau bhrātarau nṛpa /
sahasenau samārcchetāṃ pāṇḍavaṃ klāntavāhanam //

tāvarjunaṃ catuḥṣaṣṭyā saptatyā ca janārdanam /
śarāṇāṃ ca śatairaśvānavidhyetāṃ mudānvitau //

tāvarjuno mahārāja navabhirnataparvabhiḥ /
ājaghāna raṇe kruddho marmajño marmabhedibhiḥ //

tatastau tu śaraugheṇa bībhatsuṃ sahakeśavam /
ācchādayetāṃ saṃrabdhau siṃhanādaṃ ca cakratuḥ //

tayostu dhanuṣī muṣṭau bhallābhyāṃ śvetavāhanaḥ / ciccheda samare tūrṇaṃ bhūya eva dhanañjayaḥ /
athānyairviśikhaistūrṇaṃ dhvajau ca kanakojjvalau //

athānye dhanuṣī rājanpragṛhya samare tadā /
pāṇḍavaṃ bhṛśasaṅkruddhāvardayāmāsatuḥ śaraiḥ //

tayostu bhṛśasaṅkruddhaḥ śarābhyāṃ pāṇḍunandanaḥ /
dhanuṣī cicchide tūrṇaṃ bhūya eva dhanañjayaḥ //

tathānyairviśikhaistūrṇaṃ rukmapuṅkhaiḥ śilāśitaiḥ /
jaghānāśvāṃstathā sūtau pārṣṇī ca sapadānugau //

jyeṣṭhasya ca śiraḥ kāyātkṣurapreṇa nyakṛntata /
sa papāta hataḥ pṛthvyāṃ vātarugṇa iva drumaḥ //

vindaṃ tu nihataṃ dṛṣṭvā hyanuvindaḥ pratāpavān /
hatāśvaṃ rathamutsṛjya gadāṃ gṛhya mahābalaḥ //

abhyavartata saṅgrāme bhrāturvadhamanusmaran /
gadayā rathināṃ śreṣṭho nṛtyanniva mahārathaḥ //

anuvindastu gadayā lalāṭe madhusūdanam /
spaṣṭvā nākampayatkruddho mainākamiva parvatam //

tasyārjunaḥ śaraiḥ ṣaḍbhirgrīvāṃ pādau bhujau śiraḥ /
nicakarta sa sañchannaḥ papātādricayo yathā //

tatastau nihatau dṛṣṭvā tayo rājanpadānugāḥ /
abhyadruvanta saṅkruddhāḥ kirantaḥ śataśaḥ śarān //

tānarjunaḥ śaraistūrṇaṃ nihatya bharatarṣabha /
vyarocata yathā vahnirdāvaṃ dagdhvā himātyaye //

tayoḥ senāmatikramya kṛcchrādiva dhanañjayaḥ /
vibabhau jaladaṃ hitvā divākara ivoditaḥ //

taṃ dṛṣṭvā kuravastrastāḥ prahṛṣṭāścābhavanpunaḥ /
abhyavartanta pārthaṃ ca samantādbharatarṣabha //

śrāntaṃ cainaṃ samālakṣya jñātvā dūre ca saindhavam /
siṃhanādena mahatā sarvataḥ paryavārayan //

tāṃstu dṛṣṭvā susaṃrabdhānutsmayanpuruṣarbhaḥ /
śanakairiva dāśārhamarjuno vākyamabravīt //

śarārditāśca glānāśca hayā dūre ca saindhavaḥ /
kimihānantaraṃ kāryaṃ sādhiṣṭhaṃ tava rocate //

brūhi kṛṣṇa yathātattvaṃ tvaṃ hi prājñatamaḥ sadā /
bhavannetrā raṇe śatrūnvijeṣyantīha pāṇḍavāḥ //

mama tvanantaraṃ kṛtyaṃ yadvai tattvaṃ nibodha me /
hayānvimucya hi sukhaṃ viśalyānkuru mādhava //
sañjaya uvāca /

evamuktastu pārthena keśavaḥ pratyuvāca tam /
mamāpyetanmataṃ pārtha yaditaṃ te prabhāṣitam //
arjuna uvāca /

ahamāvārayiṣyāmi sarvasainyāni keśava /
tvamapyatra yathānyāyaṃ kuru kāryamanantaram //
sañjaya uvāca /

so'vatīrya rathopasthādasambhrānto dhanañjayaḥ /
gāṇḍīvaṃ dhanurādāya tasthau girivivācalaḥ) //

tamabhyadhāvankrośantaḥ kṣatriyā jayakāṅkṣiṇaḥ /
idaṃ chidramiti jñātvā dharaṇīsthaṃ dhanañjayam //

tamekaṃ rathavaṃśena mahatā paryavārayan /
vikarṣantaśca cāpāni visṛjantaśca sāyakān //

śastrāṇi ca vicitrāṇi kruddhāstatra vyadarśayan /
chādayantaḥ śaraiḥ pārthaṃ meghā iva divākaram //

abhyadravanta vegena kṣatriyāḥ kṣatriyarṣabham /
narasiṃhaṃ rathodārāḥ siṃhaṃ mattā iva dvipāḥ //

tatra pārthasya bhujayormahadbalamadṛśyata /
yatkruddho bahulāḥ senāḥ sarvataḥ samavārayat //

astrairastrāṇi saṃvārya dviṣatāṃ sarvato vibhuḥ /
iṣubhirbubhistūrṇaṃ sarvāneva samāvṛṇot //

tatrāntarikṣe bāṇānāṃ pragāḍhānāṃ viśāmpate /
saṅgharṣeṇa mahārciṣmānpāvakaḥ samajāyata //

tatratatra maheṣvāsaiḥ śvasadbhiḥ śoṇitokṣitaiḥ /
hayairnāgaiśca sambhinnairnadadbhiścārikarśana //

saṃrabdhaiścāribhirvīraiḥ prārthayadbhirjayaṃ mṛdhe /
ekasthairbahubhiḥ kruddhairūṣmeva samajāyata //

śarormiṇaṃ dhvajāvartaṃ nāganakraṃ duratyayam /
padātimatsyakalilaṃ śaṅkhadundubhiniḥsvanam //

asaṅkhyeyamapāraṃ ca rajo nīramatīva ca /
uṣṇīṣakamaṭhaṃ chatrapatākāphenamālinam //

rathasāgaramakṣobhyaṃ mātaṅgāṅgaśilācitam /
velābhūtastadā pārthaḥ patribhiḥ samavārayat //
[dhṛtarāṣṭra uvāca /

arjune dharaṇīṃ prāpte hayahaste ca keśave /
etadantaramāsādya kathaṃ pārtho na ghātitaḥ //
sañjaya uvāca /

sadyaḥ pārthiva pārthena niruddhāḥ sarvapārthivāḥ /
rathasthā dharaṇīsthena vākyamacchāndasaṃ yathā //

sa pārthaḥ pārthivānsarvānbhūmisthopi rathasthitān / eko nivārayāmāsa lobhaḥ sarvaguṇāniva // ]

tato janārdanaḥ saṅkhye priyaṃ puruṣasattamam /
asambhrānto mahābāhurarjunaṃ vākyamabravīt //

udapānamihāśvānāṃ nālamasti raṇe'rjuna /
parīpsante jalaṃ ceme peyaṃ na tvavagāhanam //

idamastītyasambhrānto bruvannastreṇa medinīm /
abhihatyārjunaścakre vājipānaṃ saraḥ śubham //

[haṃsakāraṇḍavākīrṇaṃ cakravākopaśobhitam /
suvistīrṇaṃ prasannāmbhaḥ praphullavarapaṅkajam //

kūrmamatsyagaṇākīrṇamagādhamṛṣisevitam / āgacchannāradamunirdarśanārthaṃ kṛtaṃ kṣaṇāt // ]

śaravaṃśaṃ śarasthūṇaṃ śarācchādanamadbhutam /
śaraveśmākarotpārthastvaṣṭevādbhutakarmakṛt //

tataḥ prahasya govindaḥ sādhusādhvityathābravīt /
śaraveśmani pārthena kṛte tasminmahātmanā //