Mahabharata · Chapter 7.95

praviṣṭayormahārāja pārthavārṣṇeyayo raṇe /
duryodhane prayāte ca pṛṣṭhataḥ puruṣarṣabhe //

javenābhyadravandroṇaṃ mahatā niḥsvanena ca /
pāṇḍavāḥ somakaiḥ sārdhaṃ tato yuddhamavartata //

tadyuddhamabhavattīvraṃ tumulaṃ romaharṣaṇam /
kurūṇāṃ pāṇḍavānāṃ ca vyūhasya purato'dbhutam //

rājankadācinnāsmābhirdṛṣṭaṃ tādṛṅka ca śrutam /
yādṛṅmadhyagate sūrye yuddhamāsīdviśāmpate //

dhṛṣṭadyumnamukhāḥ pārthā vyūḍhānīkāḥ prahāriṇaḥ /
droṇasya sainyaṃ te sarve śaravarṣairavākiran //

vayaṃ droṇaṃ puraskṛtya sarvaśastrabhṛtāṃ varam /
pārṣatapramukhānpārthānabhyavarṣāma sāyakaiḥ //

mahāmeghāvivodīrṇau miśravātau himātyaye /
senāgre pracakāśete rucire rathabhūṣite //

sametya tu mahāsene cakraturvegamuttamam /
jāhnavīyamune nadyau prāvṛṣīvolbaṇodake //

nānāśastrapurovāto dvipāśvarathasaṃvṛtaḥ /
gadāvidyunmahāraudraḥ saṅgrāmajalado mahān //

bhāradvājānilodbhūtaḥ śaradhārāsahasravān /
abhyavarṣanmahāraudraṃ pāṇḍusenāgnimuddhatam //

samudramiva gharmānte viśanghoro mahānilaḥ /
vyakṣobhayadanīkāni pāṇḍavānāṃ dvijottamaḥ //

te'pi sarvaprayatnena droṇameva samādravan /
bibhitsanto mahāsetuṃ vāryoghāḥ prabalā iva //

vārayāmāsa tāndroṇo jalaughamacalo yathā /
pāṇḍavānsamare kruddhānpāñcālāṃśca sakekayān //

athāpare ca rājānaḥ parivṛtya samantataḥ /
mahābalā raṇe śūrāḥ pāñcālānanvavārayan //

tato raṇe naravyāghraḥ pārṣataḥ pāṇḍavaiḥ saha /
sañjaghānāsakṛddroṇaṃ bibhitsurarivāhinīm //

yathaiva śaravarṣāṇi droṇo varṣati pārṣate /
tathaiva śaravarṣāṇi dhṛṣṭadyumno'pyavarṣata //

sanistriṃśapurovātaḥ śaktiprāsarṣṭisaṃvṛtaḥ /
jyāvidyuccāpasaṃhādo dhṛṣṭadyumnabalāhakaḥ //

śaradhārāśmavarṣāṇi vyasṛjatsarvato diśam /
nighnanrathavarāśvaughānplāvayāmāsa vāhinīm //

yaṃyamārcchaccharairdroṇaḥ pāṇḍavānāṃ rathavrajam /
tatastataḥ śarairdroṇamapākarṣata pārṣataḥ //

tathā tu yatamānasya droṇasya yudhi bhārata /
dhṛṣṭadyumnaṃ samāsādya tridhā sainyamabhidyata //

bhojameke'bhyavartanta jalasandhaṃ tathā'pare /
pāṇḍavairhanyamānāśca droṇamevāpare yayuḥ //

saṅghaṭṭayati sainyāni droṇastu rathināṃ varaḥ /
vyadhamaccāpi tānyasya dhṛṣṭadyumno mahārathaḥ //

dhārtarāṣṭrāstathā bhūtā vadhyante pāṇḍusṛñjayaiḥ /
agopāḥ paśavo'raṇye bahubhiḥ śvāpadairiva //

kālaḥ sma grasate yodhāndhṛṣṭadyumnena mohitān /
saṅgrāme tumule tasminniti sammenire janāḥ //

kunṛpasya yathā rāṣṭraṃ durbhikṣavyādhitaskaraiḥ /
drāvyate tadvadāpannā pāṇḍavaistava vāhinī //

arkaraśmivimiśreṣu śastreṣu kavaceṣu ca /
cakṣūṃṣi pratyahanyanta sainyena rajasā tathā //

tridhā bhūteṣu sainyeṣu vadhyamāneṣu pāṇḍavaiḥ /
amarṣitastato droṇaḥ pāñcālānvyadhamaccharaiḥ //

mṛdgatastānyanīkāni nighnataścāpi sāyakaiḥ /
babhūva rūpaṃ droṇasya kālāgneriva dīpyataḥ //

rathaṃ nāgaṃ hayaṃ cāpi pattinaśca viśāmpate /
ekaikeneṣuṇā saṅkhye nirbibheda mahārathaḥ //

pāṇ़ḍavānāṃ tu sainyeṣu nāsti kaścitsa bhārata /
dadhāra yo raṇe bāṇāndroṇacāpacyutānprabho //

tatpacyamānamarkeṇa droṇasāyakatāpitam /
babhrāma pārṣataṃ sainyaṃ tatratatraiva bhārata //

hanyamānaṃ tu tatsainyaṃ bhāradvājena sarvataḥ /
śarairagniśikhākārairdahyate bharatarṣabha //

tathaiva pārṣatenāpi kālyamānaṃ balaṃ tava /
abhavatsarvato dīptaṃ śuṣkaṃ vanamivāgninā //

bādhyamāneṣu sainyeṣu droṇapārṣatasāyakaiḥ /
tyaktvā prāṇānparaṃ śaktyā yudhyante svargalipsavaḥ //

tāvakānāṃ pareṣāṃ ca yudhyatāṃ bharatarṣabha /
nāsītkaścinmahārāja yo'tyākṣītsaṃyugaṃ bhayāt //

bhīmasenaṃ tu kaunteyaṃ sodaryāḥ paryavārayan /
viviṃśatiścitraseno vikarṇaśca mahārathaḥ //

vindānuvindāvāvantyau kṣemadhūrtiśca vīryavān /
trayāṇāṃ tava putrāṇāṃ traya evānuyāyinaḥ //

bāhlīkarājastejasvī kulaputro mahārathaḥ /
sahasenaḥ sahāmātyo draupadeyānavārayat //

śaibyo govāsano rājā yodhairdaśaśatāvaraiḥ /
kāśyasyābhibhuvaḥ putraṃ parākrāntamavārayat //

ajātaśatruṃ kaunteyaṃ jvalantamiva pāvakam / madrāṇāmīśvaraḥ śalyo rājā rājānamāvṛṇot /

duḥśāsanastvavasthāpya svamanīkamamarṣaṇaḥ /
sātyakiṃ prayayau kruddhaḥ śūro rathavaraṃ yudhi //

svakenāhamanīkena sannaddhaḥ kavacāvṛtaḥ /
catuḥśatairmaheṣvāsaiścekitānamavārayam //

śakunistu sahānīko mādrīputrāvavārayat /
gāndhārakaiḥ saptaśataiścāpaśaktyasipāṇibhiḥ //

vindānuvindāvāvantyau virāṭaṃ matsyamārcchatām /
prāṇāṃstaktvā maheṣvāsau mitrārthe'bhyudyatāyudhau //

śikhaṇḍinaṃ yājñaseniṃ rundhānamaparājitam /
bāhlīkaḥ pratisaṃyattaḥ parākrāntamavārayat //

dhṛṣṭadyumnaṃ tu pāñcālyaṃ krūraiḥ sārdhaṃ prabhadrakaiḥ /
āvantyaḥ sahasauvīraiḥ kruddharūpamavārayat //

ghaṭotkacaṃ tathā śūraṃ rākṣasaṃ krūrakarmiṇam /
alāmudho'dravattūrṇaṃ kruddhamāyāntamāhave //

alambusaṃ rākṣasendraṃ kuntibhojo mahārathaḥ /
sainyena mahatā yuktaḥ kruddharūpamavārayat //

saindhavaḥ pṛṣṭhatastvāsītsarvasainyasya bhārata /
rakṣitaḥ parameṣvāsaiḥ kṛpaprabhṛtibhī rathaiḥ //

tasyāstāṃ cakrarakṣau dvau saindhavasya bṛhattamau /
drauṇirdakṣiṇato rājansūtaputraśca vāmataḥ //

pṛṣṭhagopāstu tasyāsansaumadattipurogamāḥ /
kṛpaśca vṛṣasenaśca śalaḥ śalyaśca durjayaḥ //

nītimanto maheṣvāsāḥ sarve yuddhaviśāradāḥ /
saindhavasya vidhāyaivaṃ rakṣāṃ yuyudhire tataḥ //