Mahabharata · Chapter 7.96

rājansaṅgrāmamāścaryaṃ śṛṇu kīrtayato mama /
kurūṇāṃ pāṇḍavānāṃ ca yathā yuddhamavartata //

bhāradvājaṃ samāsādya vyūhasya pramukhe sthitam /
ayodhayanraṇe pārthā droṇānīkaṃ bibhitsavaḥ //

rakṣamāṇaḥ svathaṃ vyūhaṃ droṇo'pi saha sainikaiḥ /
ayodhayadraṇe pārthānprārthayāno mahadyaśaḥ //

vindānuvindāvāvantyau virāṭaṃ daśabhiḥ śaraiḥ /
ayodhayadraṇe pārthānprārthayāno mahadyaśaḥ //

vindānuvindāvāvantyau virāṭaṃ daśabhiḥ śaraiḥ /
parākrāntau parākramya yodhayāmāsa sānugau //

teṣāṃ yuddhaṃ samabhavaddāruṇaṃ śoṇitodakam /
siṃhasya dvipamukhyābhyāṃ prabhinnābhyāṃ yathā vane //

bāhlīkaṃ rabhasaṃ yuddhe yājñasenirmahābalaḥ /
ājaghne viśikhaistīkṣṇairghorairmarmāsthibhedibhiḥ //

bāhlīko yājñaseniṃ tu hemapuṅkhaiḥ śilāśitaiḥ /
ājaghāna bhṛśaṃ kruddho navabhirnataparvabhiḥ //

tadyuddhamabhavaddhoraṃ śaraśaktisamākulam /
bhīrūṇāṃ trāsajananaṃ śūrāṇāṃ harṣavardhanam //

tābhyāṃ tatra śarairmuktairantarikṣaṃ diśastathā /
abhavatsaṃvṛtaṃ sarvaṃ na prājñāyata kiñcana //

śaibyo govāsano yuddhe kāśyaputraṃ mahāratham /
sasainyo yodhayāmāsa gajaḥ pratigajaṃ yathā //

bāhlīkarājaḥ saṅkruddho draupadeyānmahārathān /
manaḥ pañcendriyāṇīva śuśubhe yodhayanraṇe //

ayodhayaṃste subhṛśaṃ taṃ śaraughaiḥ samantataḥ /
indriyāṇi yathā dehaṃ śaśvaddehavatāṃ vara //

vārṣṇeyaṃ sātyakiṃ yuddhe putro duḥśāsanastava /
ājaghne sāyakaistīkṣṇairnavabhirnataparvabhiḥ //

so'tividdho balavatā maheṣvāsena dhanvinā /
īṣanmūrcchāṃ jagāmāśu sātyakiḥ satyavikramaḥ //

samāśvastastu vārṣṇeyastava putraṃ mahāratham /
vivyādha daśabhistūrṇaṃ sāyakaiḥ kaṅkapatribhiḥ //

tāvanyonyaṃ dṛḍhaṃ viddhāvanyonyaśarapīḍitau /
rajetuḥ samare rājanpuṣpitāviva kiṃśukau //

alambusastu saṅkruddhaḥ kṛntibhojaśarārditaḥ /
aśobhata bhṛśaṃ lakṣmyā puṣpāḍhya iva kiṃśukaḥ //

kuntibhojaṃ tato rakṣo viddhvā bahubhirāyasaiḥ /
anadadbhairavaṃ nādaṃ vāhinyāḥ pramukhe tava //

tatastau samare śūrau yodhayantau parasparam /
dadṛśuḥ sarvasainyāni śakrajambhau yathā purā //

śakuniṃ rabhasaṃ yuddhe kṛtavairaṃ ca bhārata /
mādrīputrau ca saṃrabdhau śaraiścārdayatāṃ bhṛśam //

tumulaḥ sa mahānrājanprāvartata janakṣayaḥ /
tvayā sañjanito'tyarthaṃ karṇena ca vivardhitaḥ //

rakṣitastava putraiśca krodhamūlo hutāśanaḥ /
ya imāṃ pṛthivīṃ rājandagdhuṃ sarvāṃ samudyataḥ //

śakuniḥ pāṇḍuputrābhyāṃ kṛtaḥ sa vimukhaḥ śaraiḥ /
na sma jānāti kartavyaṃ yuddhe kiñcitparākramam //

vimukhaṃ cainamālokya mādrīputrau mahārathau /
vavarṣatuḥ punarbāṇairyathā meghau mahāgirim //

sa vadhyamāno bahubhiḥ śaraiḥ sannataparvabhiḥ /
samprāyājjavanairaśvairdroṇānīkāya saubalaḥ //

ghaṭotkacastathā śūraṃ rākṣasaṃ tamalāmudham /
abhyayādrabhasaṃ yuddhe vegamāsthāya madhyamam //

tayoryuddhaṃ mahārāja citrarūpamivābhavat /
yādṛśaṃ hi purāvṛttaṃ rāmarāvaṇayormṛdhe //

tato yudhiṣṭhiro rājā madrarājānamāhave /
viddhvā pañcāśatā bāṇaiḥ punarvivyādha saptabhiḥ //

tataḥ pravavṛte yuddhaṃ tayoratyadbhutaṃ nṛpa /
yathā pūrvaṃ mahadyuddhaṃ śambarāmararājayoḥ //

viviṃśatiścitraseno vikarṇaśca tavātmajaḥ /
ayodhayanbhīmasenaṃ mahatyā senayā vṛtāḥ //