Scripture Library

Mahabharata · Chapter 7.89

7.89.1

codayāśvānhṛṣīkeśa yatra durmarṣaṇaḥ sthitaḥ /
etadbhittvā gajānīkaṃ pravekṣyāmyarivāhinīm //
sañjaya uvāca /

7.89.2

evamukto mahābāhuḥ keśavaḥ savyasācinā /
acodayaddhayāṃstatra yatra durmarṣaṇaḥ sthitaḥ //

7.89.3

sa samprahārastumulaḥ sampravṛttaḥ sudāruṇaḥ /
ekasya ca bahūnāṃ ca rathanāganarakṣayaḥ //

7.89.4

tataḥ sāyakavarṣeṇa parjanya iva vṛṣṭimān /
parānavākiratpārthaḥ parvatāniva nīradaḥ //

7.89.5

te cāpi rathinaḥ sarve tvaritāḥ kṛtahastavat /
avākiranbāṇajālaistatra kṛṣṇadhanañjayau //

7.89.6

tataḥ kruddho mahābāhurvāryamāṇaḥ parairyudhi /
śirāṃsi rathināṃ pārthaḥ kāyebhyo'pāharaccharaiḥ //

7.89.7

uddhāntanayanairvakraiḥ sandaṣṭauṣṭhapuṭaiḥ śubhaiḥ /
sakuṇḍalaśirastrāṇairvasudhā samakīryata //

7.89.8

puṇḍarīkavanānīva vidhvastāni samantataḥ /
vinikīrṇāni yodhānāṃ vadanāni cakāśire //

7.89.9

suvarṇacitrābharaṇāḥ saṃsiktā rudhireṇa ca /
saṃsaktā iva dṛśyante meghasaṅghāḥ savidyutaḥ //

7.89.10

śirasāṃ patatāṃ rājañśabdo'bhūdvasudhātale /
kālena paripakvānāṃ tālānāṃ patatāmiva //

7.89.11

kabandha utthitaḥ kaścidviṣphārya saśaraṃ dhanuḥ / kiñcitkhaṅgaṃ viniṣkṛṣya bhujenodyamya tiṣṭhati /
gṛhītvā'nyasya keśeṣu śiro nṛtyati cāparaḥ //

7.89.12

patitāni na jānanti śirāṃsi puruṣarṣabhāḥ /
amṛṣyamāṇāḥ saṅgrāme kaunteyaṃ jayagṛddhinaḥ //

7.89.13

hayānāmuttamāṅgaiśca hastihastaiśca medinī /
bāhubhiśca śirobhiśca vīrāṇāṃ samakīryata //

7.89.14

ayaṃ pārthaḥ kutaḥ pārthaḥ pārtho'yamiti sarvaśaḥ / tiṣṭha pārthehi māṃ pārtha kva yāsīti ca jalpatām /
tava sainyeṣu yodhānāṃ pārthabhūtamivābhavat //

7.89.15

anyonyamapi cājaghnurātmānamapi cāpare /
pārthabhūtamamanyanta janāḥ kālena mohitāḥ //

7.89.16

niṣṭanantaḥ sarudhirā visañjñā gāḍhavedanāḥ /
śayānā bahavo vīrāḥ kīrtayantaḥ svabāndhavān //

7.89.17

sabhiṇḍipālāḥ saprāsāḥ saśaktyṛṣṭiparaśvathāḥ /
sanirvyūhāḥ sanistriṃśāḥ saśarāsanatomarāḥ //

7.89.18

sabāṇavarmābharaṇāḥ sagadāḥ sāṅgadā raṇe /
mahābhujagasaṅkāśā bāhavaḥ parighopamāḥ //

7.89.19

udveṣṭanti viceṣṭanti sañceṣṭanti ca sarvaśaḥ /
vegaṃ kurvanti saṃrabdhā nikṛttāḥ parameṣubhiḥ //

7.89.20

yo yaḥ sma samare pārthaṃ pratisañcarate naraḥ /
tasyatasyāntako bāṇaḥ śarīramupasarpati //

7.89.21

nṛtyato rathamārgeṣu dhanurvyāyacchatastathā /
na kaścittatra pārthaśca dadṛśe'ntaramaṇvapi //

7.89.22

yattasya ghaṭamānasya kṣipraṃ vikṣipataḥ śarān /
lāghavātpāṇḍuputrasya vyasmayanta pare janāḥ //

7.89.23

hastinaṃ hastiyantāramaśvamāśvikameva ca /
abhinatphalguno bāṇai rathinaṃ ca sasārathim //

7.89.24

āvartamānamāvṛttaṃ yudhyamānaṃ ca pāṇḍavaḥ /
pramukhe tiṣṭhamānaṃ ca na kañcinna nihanti saḥ //

7.89.25

yathodayanvai gagane sūryo hanti mahattamaḥ /
tathā'rjuno gajānīkamavadhītkaṅkapatribhiḥ //

7.89.26

hastibhiḥ patitairbhinnaistava sainyamadṛśyata /
antakāle yathā bhūmirvyavakīrṇā mahīdharaiḥ //

7.89.27

yathā madhyandine sūryo duṣprekṣyaḥ prāṇibhiḥ sadā /
tathā dhanañjayaḥ kruddho duṣprekṣyo yudhi śatrubhiḥ //

7.89.28

tattathā tava putrasya sainyaṃ yudhi parantapa /
prabhagnaṃ drutamāvignamatīva śarapīḍitam //

7.89.29

māruteneva mahatā meghānīkaṃ vyadīryata /
prakālyamānaṃ tatsainyaṃ nāśakatprativīkṣitum //

7.89.30

pratodaiścāpakoṭībhirhunkāraiḥ sādhuvāhitaiḥ /
kaśāpārṣṇyabhighātaiśca vāgbhirugrābhireva ca //

7.89.31

codayanto hayāṃstūrṇaṃ palāyante sma tāvakāḥ /
sādino rathinaścaiva pattayaścārjunārditāḥ //

7.89.32

pārṣṇyaṅguṣṭhāṅkuśairnāgaṃ codayantastathā'pare /
śaraiḥ sammohitāścānye tamevābhimukhā yayuḥ //

7.89.33

tava yogha hatotsāhā vibhrāntamanasastadā //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0