Mahabharata · Chapter 7.90

tasminprabhagne sainyāgre vadhyamāne kirīṭinā /
ketu tatra raṇe vīrāḥ pratyudīyurdhanañjayam //

āhosvicchakaṭavyūhaṃ praviṣṭā moghaniścayāḥ //
droṇamāśritya tiṣṭhanti prākāramakutobhayāḥ //
sañjaya uvāca /

tathā'rjunena sambhagne tasmiṃstava bale'nagha /
hatavīre hatotsāhe palāyanakṛtakṣaṇe //

pākaśāsaninā'bhīkṣṇaṃ vadhyamāne śarottamaiḥ /
na tatra kaścitsaṅgrāme śaśākārjunamīkṣitum //

tatastava suto rājandṛṣṭvā sainyaṃ tathāgatam /
duḥśāsano bhṛśaṃ kruddho yuddhāyārjunamabhyagāt //

sakāñcanavicitreṇa kavacena samāvṛtaḥ /
jāmbūnadaśirastrāṇaḥ śūrastīvraparākramaḥ //

nāgānīkena mahatā grasanniva mahīmimām /
duḥśāsano mahārāja savyasācinamāvṛṇot //

hādena gajaghaṇṭānāṃ śaṅkhānāṃ ninadena ca /
jyākṣepaninadaiścaiva virāveṇa ca dantinām //

bhūrdiśaścāntarikṣaṃ ca śabdenāsītsamāvṛtam / yuvarājo balaślāghī piṅgalaḥ priyadarśanaḥ /
sa muhūrtaṃ pratibhayo dāruṇaḥ samapadyata //

tāndṛṣṭvā patatastūrṇamaṅkuśairabhicoditān /
vyālambahastānsaṃrabdhānsapakṣāniva parvatān //

siṃhanādena mahatā narasiṃho dhanañjayaḥ / tadācalaghanaprakhyaṃ patākāśatasaṅkulam / gajānīkamamitrāṇāmabhito vyadhamaccharaiḥ //

mahormiṇamivoddhūtaṃ śvasanena mahārṇavam /
kirīṭī tadgajānīkaṃ prāviśanmakaro yathā //

khamāśrita ivādityaḥ pratapansa yugakṣaye /
dadṛśe dikṣu sarvāsu pārthaḥ parapurañjanaḥ //

khuraśabdena cāśvānāṃ nemighoṣeṇa tena ca /
tena cotkruṣṭaśabdena jyāninādena tena ca //

nānāvāditraśabdena pāñcajanyasvanena ca / devadattasya ghoṣeṇa gāṇḍīvaninadena ca /
mandavegā narā nāgā babhūvuste vicetasaḥ //

śarairāśīviṣasparśairnirbhinnāḥ savyasācinā /
te gajāḥ samasīdanta magnāḥ paṅkārṇaveṣviva //

yugapacca samāviṣṭaiḥ śarairgāṇḍīvadhanvanaḥ / anekaśatasāhasrairdrumā madhukarairiva /
puṅkhāvaśiṣṭairbahubhiḥ śoṇitotpīḍavāhibhiḥ //

ārāvaṃ paramaṃ kṛtvā vadhyamānāḥ kirīṭinā /
nipeturaniśaṃ bhūmau chinnapakṣā ivādrayaḥ //

apare dantaveṣṭeṣu kumbheṣu ca kaṭeṣu ca /
śaraiḥ samarpitā nāgāḥ krauñcavadvyanadanmuhuḥ //

gajaskandhagatānāṃ ca puruṣāṇāṃ kirīṭinā /
chidyante cottamāṅgāni bhullaiḥ sannataparvabhiḥ //

sakuṇḍalānāṃ patatāṃ śirasāṃ dharaṇītale /
padmānāmiva saṅghātaiḥ pārthaścakre nivedanam //

yantrabaddhā vikavacā vraṇārtā rudhirokṣitāḥ /
bhramatsu yudhi nāgeṣu manuṣyā vilalambire //

kecidekena bāṇena suyuktena supatriṇā /
dvau trayaśca vinirbhinnā nipeturdharaṇītale //

apare madasaṃrabdhā mātaṅgāḥ parvatopamāḥ /
sārohā nyapatanbhūmau drumavanta ivācalāḥ //

maurvī dhvajaṃ dhanuścaiva yugamīṣāṃ tathaiva ca /
rathināṃ kuṭṭayāmāsa bhallaiḥ sannataparvabhiḥ //

na sandadhanna cākarṣanna vimuñcanna codvahan /
maṇḍalenaiva dhanuṣā nṛtyanpārthaḥ sma dṛśyate //

atividdhāśca nārācairvamanto rudhiraṃ mukhaiḥ /
muhūrtānnyapatannanye vāraṇā vasudhātale //

utthitānyagaṇeyāni kabandhāni samantataḥ /
adṛśyanta mahārāja tasminparamasaṅkule //

sacāpāḥ sāṅgulitrāṇāḥ sakhaṅgāḥ sāṅgadā raṇe /
adṛśyanta bhujāśchinnā hemābharaṇabhūṣitāḥ //

sūpaskarairadhiṣṭhānairīṣādaṇḍakabandhuraiḥ /
cakrairvimathitairakṣairbhagnaiśca bahudhā yugaiḥ //

carmacāpadharaiścaiva vyavakīrṇaistatastataḥ /
sragbhirābharaṇairvastraiḥ patitaiśca mahādhvajaiḥ //

nihatairvāraṇairaśvaiḥ kṣatriyaiśca nipātitaiḥ /
adṛśyata mahī tatra dāruṇapratidarśanā //

evaṃ duḥśāsanabalaṃ vadhyamānaṃ kirīṭinā /
samprādravanmahārāja vyathitaṃ sahanāyakam //

evaṃ bale drute yāte rājaputraṃ mahāratham /
vivyādha daśabhirbāṇaistiṣṭhatiṣṭheti cābravīt //

jīvitena kathaṃ gantā duruktaṃ yāvadadya te /
tadvākyasadṛśaṃ karma kuru tvaṃ yadi manyase //

evamuktvā tato rājā pārthaḥ pārthivamardanaḥ /
bhṛśaṃ kruddho mahārāja avidhyattanayaṃ tava //

tato duḥśāsanastrastaḥ sahānīkaḥ śarārditaḥ /
droṇaṃ trātāramākāṅkṣañśakaṭavyūhamabhyagāt //