Mahabharata · Chapter 7.87

tasyāṃ niśāyāṃ vyuṣṭāyāṃ droṇaḥ śastrabhṛtāṃ varaḥ /
svānyanīkāni sarvāṇi prākrāmadvyūhituṃ tataḥ //

śūrāṇāṃ garjatāṃ rājansaṅkruddhānāmamarṣiṇām /
śrūyante sma giraścitrāḥ parasparavadhaiṣiṇām //

viṣphārya ca dhanūṃṣyanye jyāḥ pare parimṛjya ca /
viniḥśvasantaḥ prākrośankvedānīṃ sa dhanañjayaḥ //

vikośānsutsarūnanye kṛtadhārānsamāhitān /
pītānākāśasaṅkāśānasīnkecicca cikṣipuḥ //

carantastvasimārgāṃśca dhanurmārgāṃśca śikṣitāḥ /
saṅgrāmamanasaḥ śūrā dṛśyante sma sahasraśaḥ //

saghaṇṭāścandanādigdhāḥ svarṇavajravibhūṣitāḥ / samutkṣipya gadāścānye paryapṛcchanta pāṇḍavam /

anye balamadonmattāḥ parighairbāhuśālinaḥ /
cakruḥ sambādhamākāśamucchritendradhvajopamaiḥ //

nānāpraharaṇaiścānye vicitrasragalaṅkṛtāḥ /
saṅgrāmamanasaḥ śūrāstatratatra vyavasthitāḥ //

kvārjunaḥ kva sa govindaḥ kva ca mānī vṛkodaraḥ /
kva ca te suhṛdasteṣāmāhvayante raṇe tadā //

tataḥ śaṅkhamupādhmāya tvarayanvājinaḥ svayam /
itastatastānracayandroṇaścarati vegitaḥ //

teṣvanīkeṣu sarveṣu sthiteṣvāhavanandiṣu /
bhāradvājo mahārāja jayadrathamathābravīt //

tvaṃ caiva saumadattiśca karṇaścaiva mahārathaḥ /
aśvatthāmā ca śalyaśca vṛṣasenaḥ kṛpastathā //

śataṃ cāśvasahasrāṇāṃ rathānāmayutāni ṣaṭ /
dviradānāṃ prabhinnānāṃ sahasrāṇi caturdaśa //

padātīnāṃ sahasrāṇi daṃśitānyekaviṃśatiḥ /
gavyūtiṣu trimātrāsu māmanāsādya tiṣṭhata //

tatrasthaṃ tvāṃ na saṃsoḍhuṃ śaktā devāḥ savāsavāḥ /
kiṃ punaḥ pāṇḍavāḥ sarve samāśvasihi saindhava //
sañjaya uvāca /

evamuktaḥ samāśvastaḥ sindhurājo jayadrathaḥ / samprāyātsahagāndhārairvṛtastaiśca mahārathaiḥ /
varmibhiḥ sādibhiryattaiḥ prāsapāṇihayasthitaiḥ //

cāmarāpīḍinaḥ sarve jāmbūnadavibhūṣitāḥ /
jayadrathasya rājendra hayāḥ sādhupravāhinaḥ //

te caikasaptasāhasrāstrisāhasrāśca saindhavāḥ //

mattānāṃ suvirūḍhānāṃ hastyārohairviśāradaiḥ /
hastināṃ bhīmarūpāṇāṃ varmiṇāṃ raudrakarmiṇām //

adhyardhena sahasreṇa putro durmarṣaṇastava /
agrataḥ sarvasainyānāṃ yotsyamāno vyavasthitaḥ //

tato duḥśāsanaścaiva vikarṇaśca tavātmajau /
sindhurājārthasiddhyarthamagrānīke vyavasthitau //

dīrgho dvādaśagavyūtiḥ paścārdhe pañcavistṛtaḥ /
vyūhastu cakraśakaṭo bhāradvājena nirmitaḥ //

nānānṛpatibhirvīraistatratatra vyavasthitaiḥ /
rathāśvagajapattyoghairdroṇena vihitaḥ svayam //

paścārdhe tasya padmastu garbhavyūhaḥ punaḥ kṛtaḥ /
sūcīpadmasya garbhastho gūḍho vyūhaḥ kṛtaḥ punaḥ //

evametaṃ mahāvyūhaṃ vyūhya droṇo vyavasthitaḥ /
sūcīmukhe maheṣvāsaḥ kṛtavarmā vyavasthitaḥ //

anantaraṃ ca kāmbhojo jalasandhaśca māriṣa /
duryodhanaśca karṇaśca tadanantarameva ca //

tataḥ śatasahasrāṇi yodānānamanivartinām /
vyavasthitāni sarvāṇi śakaṭe mukharakṣiṇām //

teṣāṃ ca pṛṣṭhato rājā balena mahatā vṛtaḥ /
jayadrathastato rājā sūcīpārśve vyavasthitaḥ //

śakaṭasya tu rājendra bhāradvājo mukhe sthitaḥ /
nātra tasyābhavadbhodo jugopainaṃ tataḥ svayam //

śvetavarmāmbaroṣṇīṣo vyūḍhorasko mahābhujaḥ / dhanurvisphārayandroṇastasthau kruddha ivāntakaḥ /
tasya sainyasya sarvasya netā goptā ca vīryavān //

tākinaṃ śoṇahayaṃ vedīkṛṣṇājinadhvajam /
droṇasya rathamālokya prahṛṣṭāḥ kuravo'bhavan //

siddhacāraṇasaṅghānāṃ vismayaḥ sumahānabhūt /
droṇena vihitaṃ dṛṣṭvā vyūhaṃ kṣubdhārṇavopamam //

saśailasāgaravanāṃ nānājanapadākulām /
grasedvyūhaḥ kṣitiṃ sarvāmiti bhūtāni menire //

bahurathamanujāśvapattināgaṃ pratibhayaniḥsvanamadbhutānurūpam /
ahitahṛdayabhedanaṃ mahadvai śakaṭamavekṣya kṛtaṃ nananda rājā //