Mahabharata · Chapter 7.86

hanta te sampravakṣyāmi sarvaṃ pratyakṣadarśivān /
śuśrūṣasva sthiro bhūtvā tava hyapanayo mahān //

gatodake setubandho yādṛktādṛgayaṃ tava /
vilāpo niṣphalo rājanmā śuco bharatarṣabha //

anatikramaṇīyo'yaṃ kṛtāntasyādbhuto vidhiḥ /
mā śuco bharataśreṣṭha diṣṭametatpurātanam //

yadi tvaṃ hi purā dyūtātkuntīputraṃ yudhiṣṭhiram /
nivartayethāḥ putrāṃśca na tvāṃ vyasanamāvrajet //

yuddhakāle punaḥ prāpte tadaiva bhavatā yadi /
nivartitāḥ syuḥ saṃrabdhā na tvāṃ vyasanamāvrajet //

duryodhanaṃ cāvidheyaṃ badhnīyāstvaṃ purā yadi /
avekṣya kauravānrājanprāpsyase tvaṃ mahadyaśaḥ //

tatte buddhivyatīcāramupalapsyanti tajjanāḥ /
pāñcālā vṛṣṇayaḥ sarve ye cānye'pi narādhipāḥ //

sa kṛtvā pitṛkarma tvaṃ putraṃ saṃsthāpya satpathe /
vartethā yadi dharmeṇa na tvāṃ vyasanamāvrajet //

tvaṃ tu prājñatamo loke hitvā dharmaṃ sanātanam /
duryodhanasya karṇasya śakuneścānvagā matam //

tatte vilapitaṃ sarvaṃ mayā rājanniśāmitam /
arthe niviśamānasya viṣamiśraṃ yathā madhu //

na tathā manyate kṛṣṇo na ca rājā yudhiṣṭhiraḥ /
na bhīṣmo naiva ca droṇo yathā tvaṃ manyase nṛpa //

vyajānīta yadā tu tvāṃ lubdhaṃ dharmapravādinam /
tadāprabhṛti kṛṣmastvāṃ na tathā bahumanyate //

paruṣāṇyucyamānāṃśca yathā pārthānupekṣase /
tasyānubandhaḥ prāptastvāṃ putrāmāṃ rājyakāmuka //

pitṛpaitāmahaṃ rājyamapāvṛttaṃ tvayā'nagha /
atha pārthairjitāṃ kṛtsnāṃ pṛthivīṃ pratyapadyathāḥ //

pāṇḍunā nirjitaṃ rājyaṃ kauravāṇāṃ yaśastathā /
etaccāpyadhikaṃ bhūyaḥ pāṇḍavairdharmacākhibhiḥ //

teṣāṃ tattādṛśaṃ karma tvāmāsādya suniṣphalam /
yatpitryāddhaṃśitā rājyāttvayehāmiṣagṛddhinā //

yatpunaryuddhakāle tvaṃ putrāngarhayase nṛpa /
bahudhā vyāharandoṣānna tadadyopapadyate //

na hi rakṣanti rājāno yudhyanto jīvitaṃ raṇe /
camūṃ vigāhya pārthānāṃ yudhyante kṣatriyarṣabhāḥ //

yāṃ tu kṛṣṇārjunau senāṃ yāṃ sātyakivṛkodarau /
rakṣeranko nu tāṃ yudhyeccamūmanyatra kauravāt //

yeṣāṃ yoddhā guḍākeśo yeṣāṃ mantrī janārdanaḥ /
yeṣāṃ ca sātyakiryoddhā yeṣāṃ yoddhā vṛkodaraḥ //

ko hi tānviṣahedyoddhuṃ martyadharmā dhanurdharaḥ /
anyatra kauraveyebhyo ye vā teṣāṃ padānugāḥ //

yāvattu śakyate kartumantarajñairjanādhipaiḥ /
kṣatradharmarataiḥ śūraistāvatkurvanti kauravāḥ //

yathā tu puruṣavyāghrairyuddhaṃ paramasaṅkaṭam /
kurūṇāṃ pāṇḍavaiḥ sārdhaṃ tatsarvaṃ śṛṇu tattvataḥ //