Mahabharata · Chapter 7.83

sukhena rajanī vyuṣṭā kaccitte madhusūdana /
kaccijjñānāni sarvāṇi prasannāni tavācyuta //
sañjāya uvāca /

vāsudevo'pi tadyuktaṃ pratyuvāca yudhiṣṭhiram /
darśanādeva te saumya na kiñcidaśubhaṃ mama //
sañjaya uvāca /

tataśca prakṛtīḥ kṣattā nyavedayadupasthitāḥ /
anujñātaśca rājñā sa prāveśayata taṃ janam //

virāṭaṃ bhīmasenaṃ ca dhṛṣṭadyumnaṃ ca sātyakim /
cedipaṃ dhṛṣṭaketuṃ ca drupadaṃ ca mahāratham //

śikhaṇ़ḍinaṃ yamau caiva cekitānaṃ sakekayam /
yuyupsuṃ caiva kauravyaṃ pāñcālyaṃ cottamaujasam //

yudhāmanyu subāhuṃ ca draupadeyāṃśca sarvaśaḥ /
etāṃśca suhṛdaścānyāndarśayāmāsa pāṇḍavam //

anujñātāśca pārthena svāsīnā āsaneṣu te /
sarveṣvatha parārdhyeṣu yathārhaṃ vandya pāṇḍavam //

ekasminnāsane vīrāvupaviṣṭau mahābalau /
kṛṣṇaśca yuyudhānaśca vedyāmiva hutāśanau //

tato yudhiṣṭhirasteṣāṃ śṛṇvatāṃ madhusūdanam /
abravītpuṇḍarīkākṣamābhāṣya madhuraṃ vacaḥ //

ekaṃ tvāṃ vayamāśritya sahasrākṣamivāmarāḥ /
prārthayāmo jayaṃ yuddhe śāśvatāni sukhāni ca //

tvaṃ hi rājyavināśaṃ ca dviṣadbhiśca nirākriyām /
kleśāṃśca vividhānkṛṣṇa sarvāṃstānapi vettha naḥ //

tvayi sarveśa sarveṣāmasmākaṃ bhaktavatsala /
sukhamāyattamatyarthaṃ yātrā ca madhusūdana //

sa tathā kuru vārṣṇeya yathā tvayi mano mama /
arjunasya yathā satyā pratijñā syāccikīrṣitā //

sa bhavāṃstārayatvasmādduḥkhāmarṣamahārṇavāt /
parāṃ titīrṣatāmadya pluvo no bhava mādhava //

nahi tatkurute yodhaḥ kārtavīryasamo'pi yaḥ /
yudhi yatkuruṣe kṛṣṇa sārathyaṃ tvaṃ samāsthitaḥ //

yathaiva sarvāsvāpatsu pāsi vṛṣṇīñjanārdana /
tathaivāsmānmahābāho vṛjināttrātumarhasi //

tvamagādhe'plave magnānpāṇḍavānkurusāgare /
samuddhara pluvo bhūtvā śaṅkhacakragadādhara //

namaste devadeveśa sanātana viśātana /
viṣṇo jiṣṇo hare kṛṣṇa vaikuṇṭha puruṣottama //

nāradastvāṃ samācakhyau purāṇamṛṣisattamam /
varadaṃ śārṅgiṇaṃ śreṣṭhaṃ tatsatyaṃ kuru mādhava //

ityuktaḥ puṇḍarīkākṣo dharmarājena saṃsadi /
toyameghasvano vāgmī pratyuvāca yudhiṣṭhiram //
vāsudeva uvāca /

sāmareṣvapi lokeṣu sarveṣu na tathāvidhaḥ /
śarāsanadharaḥ kaścidyathā pārtho dhanañjayaḥ //

vīryavānastrasampannaḥ parākrānto mahābalaḥ /
yuddhaśauṇḍaḥ sadāmarṣī tejasā paramo nṛṇām //

sa yuvā vṛṣabhaskandho dīrghabāhurmahābalaḥ /
siṃharṣabhagatiḥ śrīmāndviṣataste haniṣyati //

ahaṃ ca tatkariṣyāmi tathā kuntīsuto'rjunaḥ /
dhārtarāṣṭrasya sainyāni dhakṣyatyagnirivendhanam //

adya taṃ pāpakarmāṇaṃ kṣudraṃ saubhadraghātinam /
apunardarśanaṃ mārgamiṣubhiḥ kṣepsyate'rjunaḥ //

tasyādya gṛdhrāḥ śyenāśca caṇḍagomāyavastathā /
bhakṣayiṣyanti māṃsāni ye cānye puruṣādakāḥ //

yadyasya devā goptāraḥ sendrāḥ sarve tathā'pyasau /
rājadhānīṃ yamasyādya hataḥ prāpsyati durmatiḥ //

nihatya saindhavaṃ jiṣṇuradya tvāmupayāsyati /
viśoko vijvaro rājanbhava śānti puraskṛtaḥ //